BIESOZY 31 - Mara Bible RV (BSI)

Bei Lemua biesozy

¹ Hezy he Bei Lemua hnohta a nô ta a pachupa biesozy a châ.

² Hy ei sawchapawpa, khâpa ma na tao? Ei chhi tawhta a puapa y, khâpa ma na tao? Ei bietai sawchapawpa, khâpa ma na tao?

³ Na thatlôna cha chanôzy pie leipa la, Na hroziezy chhao beizy a paraotuhpazy pie khah y.

⁴ Hy Lemua y, kresawhti he beizy châta châ leipa ta, Beizy cha kresawhti ama do awpa châ vei; Ryureituhpazy chhao sahma ama do awpa châ vei.

⁵ Ama do khiahta cha ryhpa my aw ei ta, Pasataopazy adona ama pahleipa pathlei aw.

⁶ Leidia haipazy hnohta sahma pie u la, Palôh pasapazy hnohta kresawhti pie teh u.

⁷ Doh ei sala ama dyhchhiena my ei sala, Ama pachârôhna amâ thei khao leina hâh ta.

⁸ Reihpathlie thei leipazy châta na pakah â la, Vâchhiepazy a duakheipa ta na pakah â mah y.

⁹ Na pakah âpa ta siana ta ryureih la, Dyhchhiepa nata phahlapazy adona a duakhei mah y.

Lapinô phapa palyupalihna

¹⁰ Lapinô phapa ahy ma a hmô thei aw? Lapinô phapa cha lôsôhpazy hlâta a sôh via syulyu.

¹¹ A vahpa palôh ta ano cha ngâ ta, Athôhna hmô leipa ta y aw vei.

¹² A hro chhôh noh zydua liata a vahpa châta Chhiena lâ châ leipa ta phana lâ sai ta hmo a taopa tyh.

¹³ Mietaku hmi nata pala rih dipa tlua ta, A ku ta palôhtlâhpa ta a hria tyh.

¹⁴ Sôhryhpa balyhzy hawhta châ ta, Lâhlapi tawhta niedozy a vaw tlôkhei tyh.

¹⁵ Azo ta thyu ta, A chhôhkha nie awpa patohpatia ta, A chakaotuhpa laihsazy chhao ama nie awpa tovyuhzy a pie tyh ei.

¹⁶ Lyu hnei thei nawpa ta saduthliepa ta chalei ta, A hriapasana ta a hmôpa sôh hmâpa ta kre sadô a tao.

¹⁷ Thatlôna ta a chai a saih ta, A bâh thazy a patlô tyh.

¹⁸ A sôhpaliepa â thôh tahpa pahno ta, Zâ ta chhao a meiôh thi beih vei.

¹⁹ Raha ku liata a ku soh ta, A ku ta lahmi a patu.

²⁰ Dyhchhiepazy lâta a ku pazawh ta, Phahlapazy lâta a ku a paza tyh.

²¹ A chhôhkha châta dâhaw chi leipa ta, A chhôhkha zydua poh saihlawpa a pabu ei.

²² Ano châta chhao rakhô pohzy tao ta, A chysia cha pala rih dipa nata sainohpa a châ.

²³ Thokhy chhikaozy liata râh machâzy hnohta a vahpa â tyu nota, A vahpa cha zawpi pahnopa a châ.

²⁴ Pala rih dipa chysiazy taopa ta zuah ta, Chaisaihzy sôhdaohpa lâ a paphao tyh.

²⁵ A chysia cha thatlôna nata rônahna châ ta, A ly kawpa ta daihti a vaw tlô awpa a mokhâh tyh.

²⁶ Sona ta a pakah â ta, A paleih liata nôphana pachuna bie a y.

²⁷ A chhôhkha khihsatôhtuna a phapa ta mohôh ta, Thathina viahchhâ nie vei.

²⁸ A sawzy thyu ei ta, “Nohlaonô” tah ei ta, A vahpa chhao thyu ta a lapinô cha reithaipa ta,

²⁹ “Chanô hluhpi tao pha kaw sai ei ta, Châhrasala na ly khai ha ei,” a tah.

³⁰ Khoiah hneina cha dôveina châ ta, Chhithaina chhao hraoleipa a châ; Abeipa a chituhpa chanô deikua cha reithaipa a châ aw.

³¹ A hriapasana theilâpazy vâta lapinô cha palyupalih la, A hmotaopazy ta thokhy chhikaozy liata ano cha reithai mawh sy.