BIESOZY 30 - Mara Bible RV (BSI)

Aku biesozy

¹ Hezy he Zake sawchapawpa Aku biesozy châ ta, Ithia hnohta reih ta, Ithia ta Ukâ hnohta a reipazy a châ.

² Hru tu ha na ta, Chyhsapa a châ tlâh chhao châ va na, Chyhsapa novâhna hnei va na.

³ Sona a vaw chu beih leipa na ta, Pathaihpa pahnona chhao a vaw chu beih va na.

⁴ Avâ lâ kiah ta a zâ chô heihpa cha ahy ma a châ tly? A ku ta thlih a chahupa cha ahy ma a châ tly? A poh ta ti a chatypa cha ahy ma a châ tly? Khizaw kaokih zydua a paduapa cha ahy ma a châ tly? A moh ahy ma a châ tly? A sawchapawpa moh ahy ma a châ tly? Na pahno mah tâh!

⁵ Khazohpa bie zydua â do tahpa pasiapa châ ha ta, Ano cha a chhaituhpazy châta vyhphao a châ.

⁶ A biezy baichha khah y, Chataleipatala cha ra aw ta, Haihthaipa ta hmôpa na châ pathlei aw na.

⁷ Hmo mia no cha hiah na ta, Ei thi hlâta na thlyu khah y.

⁸ Adoleina nata haipa zy kei tawhta lâhlapi lâ pasie ha la, Dyhchhiena tlyma hneirôna tlyma na pie leipa la, Ei ngiahpa rakha ta na pasa lymâ mah y.

⁹ Chataleipatala lôhrâtlôpa ta y aw na ta, “Abeipa cha ahy ma a châ?” tahpa ta, Ei châ paphasai pathlei aw na. Dyhchhiepa ei châ khiahta cha paru aw na ta, Khazohpa moh ei pachhie pathlei aw na.

¹⁰ Chakaotuhpa cha a zibeipa hnohta reipachhie beih khah y, Chataleipatala chhie cha sapa aw ta, Thailei pachâpa na châ pathlei aw na.

¹¹ Ama pawzy chô liata chhie a sapazy y ei ta, Ama nôzy byhnâ a awpa leipazy chhao ama y.

¹² Âmo mokhaoh liata pathaih â tah kawpazy y ei ta, Châhrasala ama puana pathaipa châ hlei veih ei.

¹³ Ama mo a sâh kawpazy chhao y ei ta, Ama mo vozy â sâh lâ sai ta a sai tyh.

¹⁴ Zaozi hâh a hneipazy y ei ta, Chaizôh naoh a hneipazy chhao ama y; Alei tawhta dyhchhiepazy palâ khai ei ta, Chyhsazy hry tawhta phahlapazy ama palâ tyh.

¹⁵ Chava ta sawchanô pano hnei ta, Ama moh cha, “Na pie teh” nata “Na pie teh” a châ. A lôhrâ a tlô beih leipa hmo mia thôh y ta, “Â daih” a tah beih leipa hmo mia palih a y.

¹⁶ Athihkhih nata chhi chohpa zy cha ama lôhrâtlô beih leipa ta, Alei chhao ti ta a lôhrâtlô beih hra leipa ta, Mei ta, “Â daih,” tah beih vei.

¹⁷ Paw a mohnaopa mokhaoh nata Nô a nawhtawpa mokhaoh cha, Saikao raawhzy ta thaoh aw ei ta, Vâkhiehzy ta ama nie aw.

¹⁸ Hmo mia thôh ei châta noâhchhih ngaitapa y ta, Ei no a vâh thei leipa mia palih a y:

¹⁹ Avâ liata pahmôh lâpi, Lôpanô chô liata parih lâpi, Tilaipi liah khophie liata balyh lâpi nata Chapaw ta laihsa a pangaina lâpi zy ei novâh thei vei.

²⁰ He he apheinô hro cha a châ: A nie khai tawhta a hmao a hru ta, “Moleina hmo khâpa hmah tao va na,” a tah tyh.

²¹ Hmo mia thôh vâta alei a chalyu ta, Mia palih ta a vi tita cha phaoh thei khao tyh vei:

²² Sei ta bei a châ tita, Ahrupa ta niedo lôhrâtlôpa ta a y tita,

²³ Chanô khochhih leipa ta vahpa a hnei tita nata Seichanô ta a zibeinô su â thla tita alei â chalyu tyh.

²⁴ Alei chô liana heta hmo chyhpata mia palih y ta, Châhrasala ama so ngaita:

²⁵ Hloia zaw cha thatlô lei kawpa châ ei ta, Châhrasala nopi nota nie awpa ama pachô.

²⁶ Tlâh pazupi zaw chhao pachyu lei kawpa châ ei ta, Châhrasala lôkâhpazy liata ama o ama tao.

²⁷ Khawsuzy ta bei hnei leipa ei ta, Châhrasala a hri hri ta ama sie.

²⁸ Zytôpuhpa chhao a kuzy ta a patu laih ta, Châhrasala abei ozy liata a pahrâ.

²⁹ Hmo mia thôh cha ama lâ chakâzie mopa ta rônah ngaita ei ta, Ama keih raizie a rônah ngaitapa mia palih a y:

³⁰ Chakeibarôhneipa cha râhsazy hry liata thatlô chaipa châ ta, Khâpa ta hmahta pasysa thei vei.

³¹ Awhkhypa cha a khotlâh kawpa ta awhpanô a charia ta, Mie tôhpa chhao mie panô hmia liata cha hawhta tao ta, A siehnaopa a hnei leipa bei chhao rônah kawpa ta a sie tyh.

³² Hru kawpa ta nâmasasyh a pasâhsapa ta, Hmo chhiepa tao awpa nâ chhuah khiahta cha, Na pakah a chahu mah y.

³³ Sâhpiti patlaopa ta sâhpiti kuapa papua ta, Hnapasu chamiehpa ta thi papua ta, Hie pahâhpa ta ahryuna a papua tyh.