BIESOZY 3 - Mara Bible RV (BSI)

Reingiah awpa ta pasyuna

¹ Ei sawchapawpa y, ei pachuna my leipa la, Na palôh ta ei biepiepazy a vao thlâh ha mah y.

² Hro pasina cha pie aw ta, Kô hluhpi cha pahrosapa ta, Thlalôhna a cha pie aw.

³ Ngâchhihna nata biehmeiseihpa ta châ heihsai khah sy; Na rao liata chazei la, Na palôh lôphiapa liata roh ha mah y.

⁴ Chatanachata Khazohpa nata chyhsa mohmô liata, Khokheina nata moh phana na hmô aw.

⁵ Na pathipalôh tlokhuh ta Abeipa ngâ la, Nâma pahnona liata a pahnieh khah y.

⁶ Na lâpi zydua ano pahnosa lymâ la, Na lâpizy a patlâsa lymâ aw.

⁷ Nâma pachâ ta a pasosa leipa la, Abeipa chi la, Moleina siesai mah y.

⁸ Cha cha na sapa châta tlâhna châ aw ta, Na rupazy châta thohna a châ aw.

⁹ Na hneina ta Abeipa palyupalih la, Na kôvei a daih tuachaipa zydua ta Abeipa cha palyupalih mah y.

¹⁰ Chatanachata na sawvâzy cha bie pakhô aw ta, Na kresawhti saohna lô beihzy cha, Kresawhti thiehpa ta a khô pathlah aw.

¹¹ Ei sawchapawpa y, Abeipa chhoreina cha, Papeisa leipa ta y leipa la; A cha ra tita, Na palôh pasa khah sy.

¹² Paw ta sawchapaw â lypa a rapa hawhta, Abeipa chhao ta a kyhpachâpa cha a ra tyh.

¹³ Sona a hmôpa cha nohlaopa châ ta, Novâhna a hneipa chhao nohlaopa a châ hra.

¹⁴ Sona tawhta athôhna cha tâkâ tawhta athôhna hlâta pha via ta, Sona papôhpa cha ngôh papôhpa hlâta a pha via.

¹⁵ Sona cha lôsôhpa hlâta sôh via ta, Na kho kawpa hmo kheihawhpa nata hmah Pakhopâ thei rimâ awpa châ vei.

¹⁶ A ku chachâh lâta hro pasina y ta, A chavei lâta hneirôna nata zachhihna a y.

¹⁷ A lâpizy cha lâpi khochhihpazy châ ta, A lâthlôh zydua cha thlalôhna lâthlôh a châ.

¹⁸ Ano â patupa maih châta hrona tho châ ta, Â ipa ta ano a patupazy cha thaphapa ta ama y.

¹⁹ Abeipa ta sona ta alei he bô ta, Novâhna ta avâzy khi a padua.

²⁰ A pahnona ta ti athupazy pasa ta, Meihdozy ta diati ama patlasa.

²¹ Ei sawchapawpa y, hezy he mopakhô leipa la, Sona patapa nata pahnona zy chhy lymâ mah y.

²² Na hro châta hrona châ aw ta, Na rao châta atobina a châ aw.

²³ Chatanachata na lâpi liata â bohpa ta sie aw chi ta, Na phei a chapia aw vei.

²⁴ Nâ zia tita chi leipa aw chi ta, A zia aw chi ta, mokuh pahâh kawpa ta nâ mô aw.

²⁵ Eikhapi ta chichhihpa a vaw tlô awpa a ngiaroh leipa la, Hmoparaopazy chô liata chhiena a vaw tlô awpa chhao a ngiaroh khah y.

²⁶ Abeipa cha na riahphana châ aw ta, Na phei khoheih liata a ao awpa tawhta a vaih aw.

²⁷ Tao theina na hnei khiahta cha, A to tlâhpazy châta hmo phapa pakhâ khah y.

²⁸ Na hnei thlâh hapa tlai ta, na vaih hnohta, “A di chy la, a vy heih mah y, Mylâ ei cha pie aw,” Na tah awpa châ vei.

²⁹ Cha ngâ ta na kiapâh liata a pahrâpa, Na opa chô liata hmo chhiepa tao a chhuah khah y.

³⁰ Châ pasasa leipa chyhsa cha, A chhâpa y leipa ta a dyuh khah y.

³¹ Thachahra a hmâhpa chyhsa cha uahva leipa la, A lâpi kheihawhpa hmahta a tlyh khah y.

³² Palôh a kopa cha Abeipa châta pasichhihpa châ ta, Palôh patlâpazy deikua cha Abeipa ngâpa chyhsazy ama châ.

³³ Abeipa chhiesana cha hmoparaopa­ o liata y ta, Mosiapa pahrâna deikua cha byhnâ a pie tyh.

³⁴ Mohnaotuhpazy cha mohnao ta, Areisipazy chô liata deikua ngiachhiena a palâsa tyh.

³⁵ Asopazy cha palyupalihna ryu to aw ei ta, Ahrupazy deikua cha nohzaona ama to aw.