BIESOZY 29 - Mara Bible RV (BSI)

¹ Khâ chhoreipa chhao ta a kuh a chhapa cha, Eikhapi ta thliepa châ aw ta, Tlâh thei khao aw vei.

² Mosiapazy ta ryu ama rei nahta, Zawpi a ly ei ta; Moleipazy ta ryu ama rei nahta, Zawpi amâ hrô tyh.

³ Sona a pasôpa sawchapawpa cha a paw palysa ta, Âzuahnô a pakyhpa deikua cha a paw sôh a papai tyh.

⁴ Abei ta adona ta râh padua ta, Hmopiepa a latuhpa deikua ta cha a parao tyh.

⁵ A vaih a reithai pakheipa cha, A phei sao â parai khâhpa a châ.

⁶ Moleipa cha a paraona liata a ao ta, Mosiapa deikua cha hla sa ta a tha a pha.

⁷ Mosiapa cha dyhchhiepazy adona pahno ta, Moleipa deikua cha, Cha hawhpa pahnona kyh liata a novâh vei.

⁸ Mohnaotuhpazy ta khihpi pakâ ei ta, Asopazy deikua cha hiehâhna ama padia tyh.

⁹ Chyhsa sopa ta chyhsa hrupa ryureina liata â ngiakhei khiahta cha, Ahrupa cha hiehâhpa nata pahneiparâpa ta y ta, Aryhna y thei vei.

¹⁰ Thisaih dâhphipazy cha chyhsa phapa a hao ei ta, Chyhsa dopazy hrona ama tei tyh.

¹¹ Ahrupa cha a hiehâhna zydua reih papua ta, Asopa deikua cha nyu ta â chalihkhei tyh.

¹² Ryureituhpa ta haipa bie a nathlie khiahta cha, A beimachâ zydua chhao ama molei tyh.

¹³ Dyhchhiepa nata tlybaituhpa a tyh ei ta, Abeipa ta ama mo a pavâsa raihrie ei.

¹⁴ Dyhchhiepazy châta â dopa ta a pachiatuhpa abei cha, Chhâzaw ta a beidyuchhai â duah aw.

¹⁵ Sôsi nata rana ta sona pie ta, Ano y ta paysapa hawti deikua cha, A nô châta nozana a tlôkhei tyh.

¹⁶ Moleipazy ama pôh nahta, Moleina chhao pôh ta; Châhrasala mosiapazy ta ama paopa ama hmô aw.

¹⁷ Na sawchapawpa cha chhorei la, Thlalôhpa ta cha paysa aw ta; Palôh lyna a cha pie aw.

¹⁸ Hmiasai y leina liata cha phopi leidia ei ta, Ryhpa a zyhpa deikua cha vânoh a to aw.

¹⁹ Chakaotuhpa cha bie dei ta chhorei awpa châ vei, A novâh hra sala tao hlei aw vei.

²⁰ Bie rei a chhaohdaolaohpa na hmô tyh ma? Cha chyhsa hlâta cha ahrupa châta hnabeiseihna a y via.

²¹ A hawti no tawhta a sei a dao palaopa cha, A chhâna lâta sâlâpa chyhsa ta a papua aw.

²² Chyhsa pathichhiepa cha ahryuna pathyu ta, Chyhsa hiehâhpa ta hmo hluhpi a parao tyh.

²³ Chyhsa cha â palaina ta ano panawh aw ta, Chyhsa areisipa deikua cha palyupalihna a hlao aw.

²⁴ Parutuhpa â pakaohpa cha ano hrona a haopa châ ta, Chhiesana bie thei ta, châhrasala reih vei.

²⁵ Chyhsapa cha a china ta anosasy khoheih a chôkhâh ta, Abeipa a ngâtuhpa deikua cha â boh aw.

²⁶ Chyhsa hluhpi ta ryureituhpa khokheina tlua ei ta, Châhrasala Abeipa tawh deita ta chyhsa ta adona a hmô tyh.

²⁷ Chyhsa doleipa cha mosiapa châta pasichhihpa châ ta, Chyhsa dopa chhao moleipa châta pasichhihpa a châ hra.