BIESOZY 28 - Mara Bible RV (BSI)

Moleipa nata mosiapa

¹ Ahy ta hmah ama chadai leipa chhao ta, Moleipazy cha a râpai ei ta; Mosiapazy deikua cha, Chakeibarôhneipa hawhta ama riah a pha.

² Râh ta hmo a parao nahta, Ryureituhpa hluhpi vaw pua tyh ei ta; Pahnona nata novâhna a hneipa ryureituhpa ry liata deikua cha, Râh â ipa ta bohpi â duah tyh.

³ Dyhchhiepa ta dyhchhie hropa a tlybai pachhuah heihpa cha, Vâsua ta nie awpa rai pahlôh leipa ta, Chichei a phy pathlah khai hapa hawhta a châ.

⁴ Ryhpa a heihsaituhpazy cha moleipazy reithai tyh ei ta, Ryhpa a zyhtuhpazy deikua ta cha moleipazy amâ dyuh tyh.

⁵ Chyhsa chhiepazy cha adona kyh ama novâh leipa ta, Abeipa a tluatuhpazy deikua cha adona kyh liata tlokhuh ama no a vâh.

⁶ Hrozie doleipa hneirôhpa hlâta cha, Â dona a hrokheipa dyhchhiepa a pha via.

⁷ Ryhpa a zyhpa cha sawchapaw sopa châ ta, Azohpazy viasa deikua cha a paw no a paza tyh.

⁸ A pôhna chadaipa ta a sôh a papôhsatuhpa cha, Dyhchhiepazy chô liata riaphapa châta a sôh cha a pachô.

⁹ Ryhpa nathlie khoh leipa ta a nah su hro lâ a paheipa cha, A thlahchhâna chhao pasichhihpa a châ.

¹⁰ Lâpi doleipa liata chyhsa dopa a pasiesatuhpa cha, Ano khaohtlô chaopa lia tlai ta tla aw ta; Chyhsa phapakipazy deikua cha, Ryu phapa ama to aw.

¹¹ Hneirôhpa cha ano mokhaoh liata a pasosa kaw ta, Châhrasala novâhna a hneipa dyhchhiepa ta Hneirôhpa châna dopa a hmô pasia aw.

¹² Mosiapazy ta pahniena ama to nahta, Palyupalihna rônahpa y ta; Moleipazy ama thyu nahta deikua cha, Chyhsazy amâ nyu tyh.

¹³ A moleinazy a phihtuhpa cha vânoh to leipa aw ta, A moleinazy palâhâh ta a siesaipa deikua cha zawngiahna a hmô aw.

¹⁴ Abeipa khâ a chipa chyhsa cha vânoh to aw ta, A palôh kuh khâ a pachhapa deikua cha chhiena lâ a tla aw.

¹⁵ Phopi dyhchhiepa chô liata ryureihtuh chhiepa cha, Chakeibarôhneipa a rôhpa hawhta châ ta, Chavyh a thyupa hawhta a châ.

¹⁶ Novâhna a phahlapa ryureituhpa cha, Tlybaituhpa nôchhiepa châ ta; Adoleipa ta athôhna hmôpa a haotuhpa deikua cha, A hro chhôh kôzy a pasisa aw.

¹⁷ Chyhsa thisaih maoh a phaohpa cha, Khaoh­tlô lâ a râ aw ta, Ahy ta hmah bao khah sy.

¹⁸ Adona ta a hrohpa cha pachhapa châ aw ta, A hroziezy adoleipa deikua cha eikhapi ta a pao aw.

¹⁹ A chhaohlei a palietuhpa cha, Nie awpa hluhpi hnei aw ta; Hraoleipa a chadaituhpa deikua cha, A phahlapa hluhpi a hnei aw.

²⁰ Chyhsa ngâchhihpa cha byhnâ hluhpi to aw ta, Hneirôh patoh a chhuahpa deikua cha hrie leipa ta pua aw vei.

²¹ Khokhei viapa hneipa pha leipa ta, Châhrasala viahchhâ tlâ kha vâta, Chyhsa ta hmo a parao thei.

²² Chyhsa riakhiehpa cha hneirôh awpa ta a para ta, Leina ta a vaw tlô thlu aw tahpa pahno vei.

²³ A paleih ta a reithai pakheipa hlâta cha, Chyhsa a chhoreituhpa ta hnôhlâ ta khokheina a hlao via aw.

²⁴ A paw tlyma a nô tlyma hrao ta, “Paraona châ vei,” a tahtuhpa cha, Paraotuhpa viasa a châ.

²⁵ Karâypa chyhsa cha ahryuna pathyu ta, Abeipa a ngâtuhpa deikua cha pathawhsapa a châ aw.

²⁶ Ano palôh a ngâtuhpa cha ahrupa châ ta, So thai kawpa ta a ypa deikua cha pachhapa a châ aw.

²⁷ Dyhchhiepa a pietuhpa cha a phahla leipa aw ta, A mo a pasopa deikua cha chhiesana thata â tyh aw.

²⁸ Moleipazy ama thyu nahta, Chyhsazy a nyu ei ta; Moleipazy ama leidia nahta, Mosiapazy ama pôh tyh.