BIESOZY 27 - Mara Bible RV (BSI)

¹ Mylâ ta hmo a vaw y awpa a palaikhei khah y, Cha noh chata khâpa ma a vaw tlôkhei aw tahpa pahno tlôh chi va.

² Nâma pakah ta a reithai leipa la, Mohropa ta tlao cha reithai sala; Nâma hmao ta châ leipa sala, Khichhaipa hmao ta tlao cha reithai mawh sy.

³ Alô cha a hri ta, Sadi chhao â hri; Châhrasala ahrupa ta chyhsa a patypamâpa cha, Cha miano hlâta â hri via.

⁴ Hiehâhna cha a nôchhie ta, pathiiana chhao â tlao, Châhrasala ahy ma hiatliana hmiakô liata a duah thei aw?

⁵ Kyhpachâna â nyupa hlâta cha, A lâhâh ta rapa a pha via.

⁶ Viasa ta hmah paphaopa cha ngâ lei nawpa y leipa ta, Chariahpa apahnâna deikua cha a pakheipa a châ.

⁷ Rihbiepa châta cha kheihti chhao pasi a chhih ta, Nodipa châta deikua cha hmo khapa zydua chhao a thlôh khai.

⁸ A o a viavisaipa chyhsa cha, A bu a zaw saipa pavaw hawhta a châ.

⁹ Sathaw nata ropahâhpa ta palôh palysa ta, Viasa ryhraokheina bie phapa chhao a thlôh ngaita.

¹⁰ Nâma viasa nata na paw viasa a paphasai leipa la, Chhiena nâ tyhna noh ta na unawhpa o pangai khah y. Lâhlapi liata unawhpa hlâta cha, Lâhnia liata a y pa na opa phapa a pha via.

¹¹ Ei sawchapawpa y, so la, ei palôh palysa mah y, Chatanachata nâ reipachhietuhpazy ei chhy thei aw ei.

¹² Asopa cha chichhihpa hmô thaipa ta a nyusai ta, Sona a phahlapa deikua cha chatôh ta pasa a tao tyh.

¹³ Khichhaipa châta sôhkâ a sohpa cha, A chysia lapa la; Chihropa châta sôhkâ a sohpa chhao, A bietai châta a chysia lapa mah y.

¹⁴ Mydi kari ta thyu ta, A paro ngaitapa ta a vaih byhnâ a awpatuhpa cha, Ano châta chhie a sapa hawhta pachâpa a châ aw.

¹⁵ A hryu a pahâh kawpa lapinô cha, Avâ neih nota avâ di a tla ngâ thlâhpa nata miakha a châ.

¹⁶ Cha hawhpa lapinô pakhâ a chhuahpa cha, Thlih pakhâpa nata miakha châ ta; Ku chachâh lâta sathaw patupa nata miakha a châ.

¹⁷ Thua cha thua ta chatapa châ ta, Chyhsapa chhao chyhsa hropa ta a chata tyh.

¹⁸ Theiku kô a mohôhpa ta a thei nie aw ta, A zibeipa a chakaopa chhao palyupalihpa a châ aw.

¹⁹ Ti liata hmia tyhpa â lapa hawhta, Chyhsapa palôh cha chyhsapa châna a palâsa tyh.

²⁰ Athihkhih nata Chhokhih zy ta â daih tahpa ama hnei leipa hawhta, Chyhsapa mo ta â dai tahna rai hnei vei.

²¹ Pathaisana beih cha tâkâ châta châ ta, Patina mei chhao ngôh châta a châ; Chyhsapa deikua cha, Reithai a hlaona daihti liata pasiana â tyh tyh.

²² Ahrupa sôkhaoh liata sâh chhaota Sôkhaih ta daih hra la, Ahruna ta ano cha siesai hlei aw vei.

²³ Na mietaku zawzy duahmo pahno pasia la, Na sahroh zawzy a phapa ta vaih mah y.

²⁴ Hneirônazy cha chhâzaw châta châ leipa ta, Bei lakho chhao chhâ zydua châta châ vei.

²⁵ Sibiepa raoh ta si panyupa kaw thaopa ta, Tlâhpizy liata âhnalasi pakhypa a châ tita,

²⁶ Mietakutawzy ta na chysia châ tôh aw ei ta, Miezy ta lyu ty ama châ tôh aw.

²⁷ Na pati châta mie sâhpiti â daihpa ta hnei aw chi ta, Na chhôhkha châta nie awpa y aw ta, Na sawchanôzy mohôhna châta chhao â khi aw.