BIESOZY 26 - Mara Bible RV (BSI)

¹ Nopi noh nata dâhaw tlapa a khyh leipa ta, Sâh hria daihti nata vâsuapa â khyh leipa hawhta, Palyupalihna chhao ahrupa nata a khyh vei.

² Boby a viapa hawhta nata siviah â zawpa hawhta, A chhâpa y leipa ta chhiesapa cha a pai aw.

³ Chheina ri cha arâ châta châ ta, Chhâri cha alâ châta châ ta, Sôsi cha ahrupa ky châta a châ.

⁴ Ahrupa cha a hruzie hawhta a chhy khah y, Chataleipatala ano hawhta na châ pathlei aw na.

⁵ Ahrupa cha a hruzie hawhta a chhy teh, Chataleipatala asopa hawhta â pachâ pathlei aw na.

⁶ Ahrupa ku liata bietapa a paphaopa cha, Ano phei tai pachhô ta atudaina ti a dohpa a châ.

⁷ Ahrupazy hmao liata bieso cha, Pheisypa pheizy â pathliah thlâhthlipa hawhta a châ.

⁸ Ahrupa hnohta palyupalihna hlâpa cha, Cheisiah liata cheichâ lô pataohpa hawhta a châ.

⁹ Ahrupazy pakah liata bieso cha, Sahma paripa ku liata ahloh buh hawhta a châ.

¹⁰ Ahrupa nata a khiekhâ a pahâhpa rai pahriasapa cha, Likathaipa ta chyhsa to hmah a paphaopa hawhta a châ.

¹¹ I ta a palipa a nie heih tyhpa hawhta, Ahrupa chhao ta a hruzie a palâsa chanei heih tyh.

¹² Ano mokhaoh liata â pasosa kawpa chyhsa na hmô tyh ma? Cha hawhpa chyhsa hlâta cha, Ahrupa châta hnabeiseihna a y via.

¹³ Thathipa ta, “Lâpi liata chakeibarôhneipa y ta, Lâlaizy liata chakeibarôhneipa a y,” a tah ty.

¹⁴ Ochhi a baolie liata â pahiehpa hawhta, Thathipa cha a rakhô liata â paliepatheih.

¹⁵ Thathipa cha a ku beikoh liata a ku ny ta, A pakah lâ chalo heih awpa dâhdei chhao hoh vei.

¹⁶ Hmo a laichadai thaipa pasari hlâ chhao ta, Thathipa cha ano mo liata â pasosa via tyh.

¹⁷ Mohropazy ahryuna liata a chahraohpa cha, I a vaw râpa nakao liata patupa hawhta a châ.

¹⁸ Meirei nata châtai nata thina hiepatlatuhpa ahrupa hawhta,

¹⁹ A vaih a dôveituhpa ta, “Sai na ei so bao!” a tah tyh.

²⁰ Tho chhâ ta mei a thipa hawhta, Hohiahpa y leina liata cha ahryuna chhao â chalih.

²¹ Meihei cha meihô châta châ ta, Tho cha mei pati nawpa a châpa hawhta, A paphôh thaipa chyhsa cha ahryuna a pa-iatuhpa a châ.

²² Hohiahpa biezy cha pati pahâhpa hawhta châ ta, Py chhôh lâ a zu tyh.

²³ Palôh chhiepa hnei ta a hmao a pahnia kaw heih tlôhpa cha, Alei beih tâkâ ta pahupa hawhta a châ.

²⁴ Ahaona a hneipa cha a hmao liata nyuthu tyh ta, A palôh liata deikua cha dôveina a paveih tyh.

²⁵ Bie phapa a reipa chhao ta zo khah y, A palôh liata hmo pasichhihpa miasari a vaopa a châ.

²⁶ Ahaona a hneipa cha dôveina ta khupa a châpa chhao ta, A moleina cha tlâh pahnopa ta palâsapa a châ aw.

²⁷ Khaohtlô a chaopa cha a chhôh liata tla aw ta, Alô a pahluahpa chhao ano â vaw hlua thlu heih aw.

²⁸ Paleih haihthaipa cha a pasasapazy a hao ta, Papyupahlyna pakheipa pakah chhao paraona rai a hria tyh.