BIESOZY 25 - Mara Bible RV (BSI)

Sawlawmaw bieso hropazy

¹ Hezy he Sawlawmaw biesozy châ hra ei ta, Zudâh bei Hezekia chyhsazy ta ama ro pachhuahpazy a châ.

² Bie nyupa cha Khazohpa rônahna châ ta, Abei rônahna deikua cha bie tluapapuapa a châ.

³ Avâzy â sâhpa nata alei â thupa hawhta, Abeizy palôh chhao a laichadai theipa châ vei.

⁴ Tâkâ tawhta a saiiepazy la ha la, Syudaihpa ta hmobaoh tao nawpa chhaichhi phapa hnei aw ta;

⁵ Abei mohmô tawhta moleipazy la ha la, A beidyuchhai cha siana ta paduapa a châ aw.

⁶ Abei hmiakô liata nâmasasyh ta a chhaodaolaoh leipa la, Chyhsa rônahpazy su liata a duah khah y.

⁷ Nôpawpazy mohmô ta â hnai lâ patyusapa hlâta, “He lâ a khy teh,” ama cha tahpa a pha via.

⁸ Ryureina liata chyhsa leih awpa a para khah y, A chhâna lâta na vaih ta maoh cha paphyuh aw ta, Tao awpa pahno leipa ta na y pathlei aw na.

⁹ Biepeipa na hneipa cha na vaih nata reih khoh u la, Mohropa bieru phuah khah y.

¹⁰ Chataleipatala a theituhpa ta maophyuhpa ta cha tao aw ta, Na moh chhiena chhâ thai khao leipa ta a y pathlei aw na.

¹¹ A daihtita ta bie reipa cha, Tâkâ byh liata ngôh epuh hawhta a châ.

¹² Ngôh rahy nata ngôh suapa atobina kho â chhihpa hawhta, Chyhsa sopa chhoreina chhao, Reingiahpa nakhaoh liata kho â chhih.

¹³ A tuahtuhpa châta lyuhchâpa ngâchhihpa cha, Sâh hria daihti liata dâhaw chakuapa hawhta châ ta, A zibeipazy hro a palysa tyh.

¹⁴ Hmo a pie leipa tlai ta piepa hawhta â reihpa cha, Vâsua ti a hnei leipa meihdo nata thlih hawhta a châ.

¹⁵ Palôh pasina ta ryureituhpa pahnie theipa châ ta, Paleih naipa ta ru a pakei thei.

¹⁶ Kheihti na hmô khiahta cha, Â daihpa rakha ta nie mah y; Na nie hluh tu khiahta cha, Na pali pathlei aw na.

¹⁷ Na vaih o tlykiah tu khah y, Cha ai aw ta a châ hao pathlei aw na.

¹⁸ A vaih chô liata pahnokheituhpa pakheipa ta a ypa chyhsa cha, Byuthô, zaozi nata châtai tiahpa hawhta a châ.

¹⁹ Tymâna daihti liata chyhsa ngâchhih leipa chô liata a pahniehpa cha, Hâh a charuapa nata phei a pahleihpa hawhta a châ.

²⁰ Palôh rietheipa châta hla sapa cha, Chasi noh ta chysia pahluhpa hawhta châ ta, Lôiah liata sahma thaopa baopa hawhta a châ.

²¹ Na chariahpa a no a di khiahta cha nie awpa pie la, A dâh a phi khiahta cha ti do awpa pie mah y.

²² A luh chô liata meihei iapa a pathlupa châ aw chi ta, Abeipa ta lymâ a cha pie aw.

²³ Maw thlih ta vâsua vaw tlôkhei ta, Kyh rei a hmâhpa paleih ta hiehâhna hmia a tlôkhei.

²⁴ A hryu nawpa sai a tlua thlâh hapa lapinô nata o laipa liata y khohpa hlâta la, Vâphuh chaki liata ypa a pha via.

²⁵ Râh hlapi tawhta thâtih phapa cha, Dâhphipa châta ti chakuapa hawhta a châ.

²⁶ Chyhsa siapa moleipa hmiakô liata a paopa cha, Vahtie panôpa nata tihnawh puapa hawhta a châ.

²⁷ Kheihti nie hluh tupa pha leipa ta, Rônahna tluapa chhao rônah hlei vei.

²⁸ Anosasyh â pahnie leipa chyhsa cha, Khihpi chopa thokhy a hnei leipa hawhta a châ.