BIESOZY 24 - Mara Bible RV (BSI)

¹ Chyhsa moleipazy uahva leipa la, Ama hry liata a hlao awpa chhao tlaichhai khah y.

² Ama palôh ta thachahra hmâna kyh patuapalua ei ta, Ama hmao ta tymâna bie a reihpa ama châ.

³ O cha sona ta sapa châ ta, Novâhna ta paduapa a châ;

⁴ Chhôhpadâhpazy chhao pahnona ta taopa châ ta, Hmo ngiapa nata hmo sôhpazy ta pabiepa a châ.

⁵ Chyhsa sopa cha thatlôpa châ ta, Pahnona a hneipa ta a hmotaotheina a papôhsa tyh.

⁶ Ryhraona sopa tao khai tawhta hrâ na sie awpa châ ta, Ryhraokheituhpa hluhna liata pahniena a y tyh.

⁷ Ahrupa châta sona cha a sâh tu ha ta, Thokhy chhikao liata a pakah â vei.

⁸ Hmo pha leipa tao awpa ta ryh a raopa cha, Paraopakeituhpa ama tah aw.

⁹ Ahrupa ryhraona cha moleina châ ta, Chyhsa mohnao a hmâhpa cha, Chyhsapa châta pasichhihpa a châ.

¹⁰ Tymâna noh liata na panao thlâh ha khiahta cha, Na thatlôna a chyh kaw tahna a châ.

¹¹ Thi awpa ta a chhipazy cha pachha la, Thie awpazy cha pachha thlyu teh.

¹² “Pachâ teh, he hmo he pahno ma pi,” Na tah khiahta cha, Palôh khopathliahtuhpa ta pahnopa ta, Na hro a vaotuhpa ta pahno thlâh ha ta, Chyhsa to ama hmotaopa lymâ hawhta viari a thô aw ei.

¹³ Ei sawchapawpa y, kheihti cha pha ta, nie la, Kheithlawh ti thlôhpa a thlaohpazy ta na pakah lôhrâ patlô mawh sy.

¹⁴ Sona cha na hro châta a châ tahpa pahno la, Na hmô khiahta cha hmialâ daihti hnei chi ta, Na hnabeiseihna lei aw vei.

¹⁵ Hy moleipa, mosiapa pahrâna su a byh leipa la, A o liata thachahra hmâ thlu khah y.

¹⁶ Mosiapa cha ei sari pao hra sala thyu heih tyh ta, Moleipazy deikua cha ei kha chhie atyhna liata amâ hluah tyh.

¹⁷ Na chariahpa a pao nota a ly leipa la, Â chapia nota na palôh thapha khah sy.

¹⁸ Chataleipatala Abeipa ta hmô aw ta a ly leipa aw ta, A chô liata a pathiiana a lapa pathlei aw na.

¹⁹ Hmo pha leipa a taotuhpazy vâta na pachâ a parôh leipa la, Moleipazy uahva hra khah y.

²⁰ Chyhsa chhiepa châta hmialâ daihti y leipa ta, Moleipa meiôh cha pachhaipa a châ aw.

²¹ Ei sawchapawpa y, Abeipa chipa ta abei chhao chi la, Cha hawhta a y leipazy cha a pahlao khah y.

²² Abeipa nata abei ta ama chô liata raona eikhapi ta patlôsa aw ei ta, Kheihawhpa chhiena ma ama patlôsa thlu aw tahpa ahy a pahno aw?

Chyhsa sopa bieso hropazy

²³ Hezy chhao he chyhsa sopa biereipazy a châ. Pachiana liata khokhei viapa hneipa pha vei.

²⁴ Moleipa hnohta, “Nâ do na,” a tahpa cha, Phopizy ta chhiesapa aw ei ta, Râhzy ta chyhuh ama sapa aw.

²⁵ Moleipa thailei a pachâtuhpazy deikua cha a ly aw ei ta, Ama chô liata byhnâ phapazy a vaw tlô aw.

²⁶ Achhyna dopa piepa cha, Hmao liata sypa hawhta a châ.

²⁷ Khôtho lâta na rai a chhuanoh la, Lyu liata na raizy a ngoh tawhta, Na o cha sa mah y.

²⁸ A chhâpa y leipa ta na vaih kyh liata pahnokheituhpa ta y leipa la, Na hmao ta dôvei khah y.

²⁹ “Ei chô liata a taopa hawhta ano chô liata tao aw na ta, A hmotaopa viari ei thô aw,” tah khah y.

³⁰ Thathipa lyu chapia na ta, Pahnona a phahlapa kre sadô ei chapia.

³¹ Moh teh u, ahloh buhzy ta pahli khai ha ta, Thlahbeizy ta lyu hmia zydua khupa ta, A dôhna alô diahpai chhao a cho khai haw.

³² Cha cha ei hmô nahta pachâ na ta, Moh na ta hetana heta pachuna ei dao.

³³ Buakha a môpa ta, Buakha tla-uah chi ta, Buakha ku chakhipa ta nâ pahâ chhôh ta,

³⁴ Dyhchhiena ta hraotuhpa hawhta cha vaw tlô thlu aw ta, Phahlana ta chaihrai chhaopa chyhsa hawhta a cha vaw tlô thlu aw.