BIESOZY 23 - Mara Bible RV (BSI)

¹ Ryureituhpa nata pati na dôh khoh tita, Na hmiakô liata ahy ma a y tahpa a phapa ta pachâ mah y.

² Niebaw a zoh kawpa na châ khiahta cha, Na rao liata chaizôh soh mah y.

³ A pati pahâhpazy tlaichhai kaw khah y, Dôveina pati ama châ.

⁴ Hneirôh awpa ta na rie a pathei tu leipa la, Â daihna rakha pahno awpa ta so thai kaw mah y.

⁵ Sôh cha na hmôpa nahta thlai a pai tyh; A mathlaw kaw thao ta, Pahmôh hawhta avâ lâ â zaw syulyu ha tyh.

⁶ Chyhsa mochhihpa viahchhâ cha nie leipa la, A pati pahâhpazy chhao tlaichhai hlei khah y.

⁷ A hryuh awpa sai pachâ ta, “Nie la, doh mah y,” cha tah taraw ta, A palôh hmeiseihpa liata deikua cha châ ly hlei vei.

⁸ A chyhta na niepa chhao pali lilaw aw chi ta, Na bie phapa tlao na papâpahria.

⁹ Ahrupa theina liata bie reih khah y, Na sona biezy a mohnao pathlei aw na.

¹⁰ Râhri lôbô hlôpazy pasie leipa la, Paw hnei leipazy lyu liata a ngia khah y.

¹¹ Âmo chatlaituhpa cha a thatlô tlôh ta, Âmo a duakheipa ta a châ dyuh pathlei aw na.

¹² Pachuna lâ na palôh pahei la, Na nah chhao pahnona biezy lâ pahei mah y.

¹³ Sawnawh chhoreipa a chalihsai khah y, Sôsi ta na tupa chhao ta thi aw vei.

¹⁴ Sôsi ta na tu khiahta cha, Athihkhih tawhta a hrona na pachha aw.

¹⁵ Ei sawchapawpa y, na palôh a so khiahta cha, Keima palôh chhao â ly aw.

¹⁶ Na hmao ta hmo dopa a rei tita, Ei palôh â ly ngaita aw.

¹⁷ Na palôh ta moleipazy uahva leipa sala, Noh y ta Abeipa chipa ta tlao y mah y.

¹⁸ Hmialâ daihti hnei aw chi ta, Na hnabeiseihna cha pahleipa châ aw vei.

¹⁹ Ei sawchapawpa y, nathliepa ta so la, Lâpi dopa liata na palôh soh mah y.

²⁰ Kresawhti iahzaipazy hry liata a hlao leipa la, Sa zohpazy hry liata chhao a hlao khah y.

²¹ Sahma paripa nata sa zohpa zy cha dyhchhiena lâ pangai aw ei ta, Tla-uahna ta âmo cha poh chypa a pabu aw ei.

²² Châ satuhpa na paw bie nathlie la, Na nô a nôpi tita mohnao khah y.

²³ Biehmeiseihpa chalei la zuah khao leipa la, Sona nata pachuna nata pahnona zy chalei mah y.

²⁴ Mosiapa paw cha a ly ngaita aw ta, Sawchapaw sopa paw chhao a saw chô liata â ly kaw aw.

²⁵ Na paw nata na nô thaphapa ta y ei sala, Châ satuhpa na nô cha a lypa ta y mawh sy.

²⁶ Ei sawchapawpa y, na palôh na pie la, Na mozy ta ei lâpizy moh mawh sy.

²⁷ Âzuahnô cha khaohtlô athupa châ ta, Apheinô chhao tikhaoh buahpa a châ.

²⁸ Hraotuhpa hawhta chyhsa a byh ta, Chyhsapazy hry liata ngâchhih leina a papôhsa.

²⁹ Ahy ma a hupo ta, ahy ma a pachâ a rôh? Ahy ma a hryuh ta, ahy ma a paphôh? Ahy ma a chhâpa y leipa ta hmah a phaoh? Ahy ma a mozy a saih khai haw?

³⁰ Âmo cha kresawhti dona liata a y parei tupazy châ ei ta, Kresawhti pahlaopa do awpa ta a puapazy ama châ.

³¹ Kresawhti a saih nota moh leipa la, Nyu liata a rôh â ngia kawpa chhao moh hra leipa la, A loh zaolao ngâpa chhao moh hra khah y.

³² A chhâna liata cha parih hawhta cha pachu aw ta, Vâzi hawhta a cha pachu aw.

³³ Na mo ta hmo nano kawpazy hmô aw ta, Na palôh ta bie chhiepazy a reih pathlei aw.

³⁴ Tilaipi liah liata a ziapa hawhta châ aw chi ta, Balyh pohraina tôh pawhmao liata a ziapa hawhta na châ pathlei aw na.

³⁵ “Na tu ei ta, pasa leipa na ta, Na chhei ei ta, pahno va na. Ei kaw hrapa nahta, Ei doh heih aw,” A tahpa na châ pathlei aw na.