BIESOZY 22 - Mara Bible RV (BSI)

¹ Hneirôna hlâta moh phana a tlyh via awpa châ ta, Tâkâ nata ngôh hlâta pasâhsapa a pha via.

² Hneirôhpazy nata sipasapazy a tyh ei ta, Ama zydua a taotuhpa cha Abeipa a châ.

³ Asopa cha chichhihpa hmô thaipa ta a nyusai ta, Sona a phahlapa deikua cha chatôh ta pasa a tao tyh.

⁴ Areisina nata Abeipa china lymâzy cha, Hneirôna, zana nata hrona zy a châ.

⁵ Palôh akopa lâpi liata ahlohzy nata khoheihzy y ta, A hro a vaihpa ta â hlasai aw ei.

⁶ Hawtipa cha a sie nawpa lâpi pachu la, A pitloh tita chhao siesai aw vei.

⁷ Hneirôhpa cha dyhchhiepa chô liata ryureih ta, Dyucheituhpa cha a pacheisatuhpa sei a châ.

⁸ Adoleina chi a tupa cha chhiena hria aw ta, A hiehâhna chôchahrei chhao a tlie aw.

⁹ Chyhsa riaphapa cha sipasapazy niedo â chhaih tyhpa vâ ei ta, Vânoh a to aw.

¹⁰ Chyhsa a mohnaopa cha papua u la, Ahryuna nata atuna zy â chalih aw.

¹¹ Palôh pathaihna pasô ta, A reikah a phapa cha, Abei chhao viasa ta â tao thei aw.

¹² Abeipa mo ta pahnona a hneipa chyhsa cha mokhâh ta, Piehpiepa bie deikua cha a thy pathlah tyh.

¹³ Thathipa cha, “Khôtho liata chakeibarôhneipa y ta, Lâlaizy liata eina thie aw,” a tah tyh.

¹⁴ Chanô sihryhpa pakah cha khaohtlô a thupa châ ta, Abeipa hie a pahâhpa cha cha liata a tla aw.

¹⁵ Hawtipa palôh liata hruna a bai ha ta, Sôsi ta chhoreina ta hruna cha lâhla lâ â chadai pai aw.

¹⁶ Ano hneirôna papôh nawpa ta dyhchhiepa tlybai ta, Hneirôhpa hnohta sôh nah thih a piepa cha, Dyhchhiena ta a tlô thlu aw.

Chyhsa sopa biezy

¹⁷ Na nah pachôhpa ta asopa biezy nathlie la, Ei sona a chuna châta na palôh hmâh mah y.

¹⁸ Na chhôh liata a vao awpa châta pha ta, Na hmao liata a y awpa châta a pha khai.

¹⁹ Abeipa na ngâ thei nawpa ta, Chazy cha tanoh cha pahnosa na ta, Nâ lia tlai ta ei cha pahnosa haw.

²⁰ Na châta bieso sythôh cha ropa na ta, Ryhraona nata pahnona zy ei cha ropa hih.

²¹ Chatanachata biedopa nata biehmeiseihpa pahno aw chi ta, Châ tuahtuhpazy hnohta biedopa na tlôkhei thei aw.

²² Sipasapa hrao khah y, Sipasapa a châ khaw; Pasataopa chhao thokhy chhikao liata tu lao khah y.

²³ Abeipa ta ama bie a duakhei tlôh aw ta, Âmo a hraotuhpazy hro a hrao hra aw.

²⁴ Hiehâh naopa chyhsa a viasa leipa la, Pathichhiepa chyhsa chhao a pakyh khah y.

²⁵ A hrozie hâ a la aw chi ta, Na hro châta khoheih a châ pathlei aw.

²⁶ Bie a taih thaipazy hry liata a hlao leipa la, Leibâh châta sôhkâ a sokhâhtuhpazy hry liata chhao a hlao khah y.

²⁷ Na pie awpa na hnei khao vei tita, Na rakhô ama châ daophi pâ pathlei aw.

²⁸ Châ pathlatuhpazy ta ama vaw bô hapa râhri lôbô hlôpa cha, Pasi cheita khah y.

²⁹ Rai a thai kawpa chyhsa cha moh tua, Abei hmiakô liata a duah aw ta, Chyhsa zawrâpa hmiakô liata a duah aw vei.