BIESOZY 21 - Mara Bible RV (BSI)

¹ Abei palôh cha Abeipa ku liata y ta, Vahtie ti hawhta a khona lâ maih a palosa tyh.

² Chyhsa cha ano mokhaoh liata a lâpi to â do tah ta, Abeipa deikua cha palôh kho a pathliah tyh.

³ Abeipa châta cha siana nata adona ta hmo taopa he, Atheihna hlâta a pyh tlâh a châ via.

⁴ Mo a sâhpa nata palôh laipa cha moleina châ ta, Cha cha moleipa meiôh a châ.

⁵ Achhuahna phapa a hneipa chyhsa tiamapa cha a dyhpha aw ta, Palôh charâpa chyhsa deikua cha dyhchhiena lâ a pangai aw.

⁶ Paleih haihthaipa ta sôh hmôpa cha, Ti hu a lei haipa nata thina khoheih a châ.

⁷ Moleipazy cha adona ama tao khoh leipa vâta, Âmo nôchhiena ta a phi pathlah aw ei.

⁸ Thailei a châpa lâpi cha a ko ta, Chyhsa pathaihpa hro deikua cha â do.

⁹ A hryu nawpa sai a tlua thlâh hapa lapinô nata o laipa liata y khohpa hlâta la, Vâphuh chaki liata ypa a pha via.

¹⁰ Moleipa hro cha moleina khoh ta, A vaihzy ta a mo liata khokheina hmô veih ei.

¹¹ Mohnao a hmâhpa hriepa a châ nahta, Sona a phahlapa vaw so ta; Chyhsa sopa cha pachupa a châ nahta, A pahnona â baichha tyh.

¹² Khazoh Siapa ta moleipa o cha mohpathli ta, Moleipazy cha raona lâta a thy tyh ei.

¹³ Sipasapa awna lâta a nah a chahupa cha, Ano chhao awh aw ta a chhypa châ aw vei.

¹⁴ Arulâta hmosai piepa ta hiehâhna padia ta, Kalachhôh liata panaopapana nyupa ta pathiiana rupa a padia tyh.

¹⁵ Pachiana dopa cha mosiapa alyna châ ta, Moleipa châta deikua cha raona a châ.

¹⁶ Sona lâpi a tleisaipa cha, Athipazy ypakhyna liata â pahâ aw.

¹⁷ Haosai a tlaichhaipa cha sipasapa châ aw ta, Kresawhti nata sathaw a tlaichhaipa chhao hneirôh aw vei.

¹⁸ Moleipa cha mosiapa châta chatlaina châ aw ta, Apaphasaituhpa chhao chyhsa dopa châta chatlaina a châ aw.

¹⁹ Chanô paphôhthaipa nata pathichhiepa pahrâ lâhpa hlâta la, Râhchawhpa liata pahrâpa a pha via.

²⁰ Chyhsa sopa pahrâna liata cha ryu sôhpa nata sathaw y ta, Chyhsa hrupa deikua cha a palâ khai ha tyh.

²¹ Siana nata ngâchhihna a chadaipa cha, Hrona, siana nata zana a hmô aw.

²² Chyhsa sopa cha pasaiphazy khihpi lâ kiah aw ta, Amâ pahniehna thokhy a pacho aw.

²³ A pakah paleih a vaihpa cha, Nôpona tawhta a hro a vaihpa a châ.

²⁴ Akhotlâhpa nata apatahsapa moh cha “Mohnaotuh” châ ta, Apalaina nata atahtheina ta hmo a tao tyhpa a châ.

²⁵ Thathipa cha a ku ta rai a hria khoh leipa vâta, A hmo khohpa ta ano cha a thie aw.

²⁶ Thathipa cha noh y ta khohlei khona sai ta bie ta, Mosiapa deikua cha pahlôh leipa ta tlao a pie tyh.

²⁷ Moleipa atheihna hlâpa cha pasichhihpa châ ta, Moleina palôh chhaota a hlâpa chhochhi cha pasi â chhih via pachai.

²⁸ Pahnokheituh pakheipa cha leidia aw ta, Bie a thei hmeiseihpa bie deikua cha â duah aw.

²⁹ Chyhsa moleipa cha hmiakawh kawpa ta y ta, Chyhsa dopa deikua cha a lâpizy a phapa ta a pachâ tyh.

³⁰ Kheihawhpa sona, novâhna nata ryhraothaina hmahta Abeipa cha pahnie aw vei.

³¹ Arâ cha adyuhna noh châta a mâ chiehpa ta y ta, Pahniena deikua cha Abeipa eih a châ.