BIESOZY 20 - Mara Bible RV (BSI)

¹ Kresawhti cha pahneisaotuhpa châ ta, Sahma cha tu a thyupa a châ; Chazy ta a dôvei theipa chyhsazy cha asopa châ veih ei.

² Abei hiehâhpa cha chakeibarôhneipa a rôhpa hawhta châ ta, Abei hie a pahâhpa chyhsa cha a hro châta chi â chhih.

³ Ahryuna a chalihsaipa cha zachhihna palâsa ta, Ahrupa deikua cha tu a thyu laih aw.

⁴ Thathipa cha chasipaw nota lei a palie hoh leipa vâta, Sâh hria daihti liata khâpa hmah hmô aw vei; Kudaopa ta a y aw.

⁵ Chyhsa palôh liata saduthliena cha ti athupa hawhta châ ta, Châhrasala novâhna a hneipa chyhsa ta cha a sy papua thei aw.

⁶ Mo hluhpi ta chyhsa phapa hawhta âmosasyh a reih ei ta, Chyhsa ngâchhihpa deikua ahy a hmô thei aw?

⁷ Mosiapa cha â dona hrokhei lymâ ta, A vaw pazi awpa a pathlazy thlaochhipa ta ama y aw.

⁸ Ryureina beidyuchhai liata a tyuhpa abei cha, A mo ta hmo pha leipa zydua a pahrua tyh.

⁹ “Ei palôh pathaihsa ha na ta, Ei moleina tawhta ei pathaih haw,” Ahy ma a tah thei tly?

¹⁰ Khopathliahna lô doleipa nata thliena ri doleipa zy cha, A miano ta Abeipa châta pasichhihpa a châ.

¹¹ Hawtipa chhao a hro a pathaih nata pathaih leizie zy, Â do nata do leizie zy, A hmotaopa liata anosasyh ta a palâsa tyh.

¹² Theina nah nata hmôna mo zy he, A miano ta Abeipa taopa sai a châ.

¹³ Amôpa tlaichhai khah y, Na dyhchhie pathlei aw na; Na mo padeih la, Niedo hluhpi na hnei aw.

¹⁴ Hmo chaleituhpa ta, “Pha vei, pha vei,” tah ta, Châhrasala chalei ta a pua tita cha â palaikhei kaw heih.

¹⁵ Ngôh y ta lôsôhpazy chhao a hluh kaw, Châhrasala novâhna hmaozy he lôsôhpa sôhpazy cha ama châ.

¹⁶ Khichhaipa châta sôhkâ a sohpa cha, A chysia lapa la; Chihropa châta sôhkâ a sohpa chhao, A bietai châta a chysia lapa mah y.

¹⁷ Dôveina ta viahchhâ hmôpa cha chyhsa châta pahâh kaw ta, A hnôhlâ ta deikua cha lochapo ta a pakah a bie aw.

¹⁸ Achhuahna cha ryureina ta a pa-i awpa châ ta, Hrâsie awpa chhao pasopakâna sopa ta tao awpa a châ.

¹⁹ Hohiahpa ta a khiekhâpa ta bieparu papua tyh ta, Chavâta pakah kawhpa chyhsa cha a pakyh khah y.

²⁰ A paw tlyma a nô tlyma chhie a sapa cha, Zoh kaluhna su liata a meiôh pachhaipa a châ aw.

²¹ Âthaona liata tararuahna ta râh hneipa cha, Achhâna lâta byhnâ châ khao tyh vei.

²² “Moleina cha viari ei thô aw,” tah khah y, Abeipa hâ la ano ta a cha pachha aw.

²³ Khopathliahna lô doleipazy cha Abeipa châta pasichhihpa châ ta, Thliena ri doleipazy chhao pha vei.

²⁴ Chyhsapa keih chakânazy cha Abeipa raopa châ ta, Kheihta ma chyhsa ta a lâpi a pahno thei aw?

²⁵ A chatlie baikhaipa ta Abeipa lâ hmo hlâ awpa bie a taihpa cha, Â taihtuhpa châta khoheih châ ta; Bietai tao khai tawhta pachâ pathi heihpa chhao, Â taihtuhpa châta khoheih a châ hra.

²⁶ Bei sopa cha moleipa pahrua thai ta, Ama chô liata tiaki a pahieh thlu tyh ei.

²⁷ Chyhsapa hrona hu cha Abeipa meiôh châ ta, A pôhpa chhôh liata a ypa zydua a palâsa tyh.

²⁸ Kyhpachâna nata biehmeiseihpa ta abei cha hrôbieh ta, Ngâchhihna ta a beidyuchhai cha pabohsapa a châ.

²⁹ Satliapazy rônahna cha ama thatlôna châ ta, Pawpipazy angiana deikua cha ama luh pawhpa a châ.

³⁰ Hmah yna taihta tupa ta moleina pathai ta; Chheinazy ta palôh chhôh chaipazy chhao a pathai tyh.