BIESOZY 2 - Mara Bible RV (BSI)

Sona sôzie

¹ Ei sawchapawpa y, ei biezy a pyhpa ta, Ei biepiepazy paso pha la;

² Sona lâ na nah pachôhpa ta, Novâhna lâ na palôh pahei la;

³ Chatatly, pahno thaina padopa ta, Novâhna hnei awpa ta thata awh la,

⁴ Sona cha tâkâ tluapa hawhta tlua la, Ryubyh nyupa tluapa hawhta na tlua khiahta cha,

⁵ Abeipa china kyh liata na novâh aw ta, Khazohpa pahnona nâ huah aw.

⁶ Sona cha Abeipa piepa châ ta, A pakah tawhta pahnona nata novâhna a pua.

⁷ Chyhsa dopa châta sona patapa pachôpa ta, Ngâchhihpa ta a ypazy châta ano cha vyhphao a châ.

⁸ Adona lâpizy vaih ta, A mopathaihpazy hrozie a vaih tyh.

⁹ Chatanachata siana nata adona kyh liata na novâh aw ta, Akhongâhna nata lâpi phapa to kyh na no a vâh aw.

¹⁰ Sona cha na palôh chhôh liata a ngia aw ta, Pahnona cha na hro châta kho â chhih kaw aw.

¹¹ Pahnona ta cha mokhâh aw ta, Novâhna ta a cha vaih aw.

¹² Moleipa lâpi tawhta cha pachha aw ta, Chyhsa paviasana bie a reihpazy tawhta a cha pachha aw.

¹³ Âmo zohna lâpizy a chhih awpa ta, Siana lâpizy a tleisai hapa ama châ.

¹⁴ Moleina hmo taopa liata ama thapha ta, Molei chochhiena a lypazy ama châ.

¹⁵ Ama lâpi a kokaliepazy châ ei ta, Chyhsa dôvei khohna hro a hneipazy ama châ.

¹⁶ Sona ta khichhai chanô tawhta cha pachha aw ta, Chihropa chanô reikah thaina tawhta a cha pachha aw.

¹⁷ Cha chanô cha a thyutlia nota â kaolâhpa siesai ta, A Khazohpa biehrai a my hapa a châ.

¹⁸ A o cha thina liata a pamôh ta, Athipazy lâta a lâpizy a sie.

¹⁹ Ano a pangai hapa cha ahy hmah kua heih khao leipa ei ta, Hrona lâpizy hmô heih thei khao veih ei.

²⁰ Chavâta lâpi phapa a chhih la, Siana lâpi liata sie mah y.

²¹ Adopazy cha râh liata pahrâ aw ei ta, Phapakipazy cha râh liata ama y thlâh ha aw.

²² Hmoparaopazy deikua cha râh tawhta chhawh pathlahpa châ aw ei ta, Piehpiepazy cha râh tawhta phiapa ama châ aw.