BIESOZY 19 - Mara Bible RV (BSI)

¹ Chyhsa hrupa hmao haihthaipa châpa hlâta cha, Sipasapa ngâchhihpa châpa a pha via.

² Pahnona a phahlapa hro cha pha leipa ta, A phei a parapa chhao a sumiesumâ tyh.

³ Chyhsa ta ano hruna vâta a lâpi a raopa tlai cha, Abeipa chô liata palôh ruchhôna a hnei tyh.

⁴ Sôh ta viasa hluhpi pahneisa ta, Sipasapa deikua cha a viasapa taihta a pathlua.

⁵ Pahnokheituh pakheipa cha hrie leipa ta y leipa aw ta, Haipa hu a sopa chhao pua aw vei.

⁶ Chyhsa hluhpi ta riaphapa khokheina tlua ei ta, Hmosaipa a pietuhpa cha chyhsa to viasa a châ.

⁷ A unawhzy hmahta sipasapa cha amâ hao khiahta cha, A viasazy chhochhi ta cha khatlu ta ma amâ hla aw tly! Bie ta âmo cha a chadai ta, Châhrasala ama siesai syulyu haw.

⁸ Sona a hneipa cha a hro pasô ta, Novâhna a vaotuhpa chhao hmo phapa a hmô aw.

⁹ Pahnokheituh pakheipa cha hrie leipa ta y leipa aw ta, Haipa bie a reihpa cha a leidia aw.

¹⁰ Ahrupa nata phasana hro a khyh leipa ta, Sei ta abeisawzy chô liata ryu a reipa awpa chhochhi â khyh lei pachai.

¹¹ Sona ta chyhsa palôh pasisa ta, Pasasana mopakhôpa cha a rônahna a châ.

¹² Abei hiehâna cha chakeibarôhneipa a rôhpa hawhta châ ta, A khokheina deikua cha sibiepa chôta diati a tlapa hawhta a châ.

¹³ Sawchapaw hrupa cha, A paw châta chhiena châ ta; Lapinô paphôh thaipa chhao, Ti di a thlaoh ngâ thlâh hapa hawhta a châ.

¹⁴ O nata sôh zy cha pawzy tawhta ryuto châ ta, Lapinô sopa deikua cha Abeipa tawhta a châ.

¹⁵ Thathina ta mokuhthuna liata pangiasa ta, Chyhsa a ychakhyhpa cha nodi a tao aw.

¹⁶ Biepiepa a vaopa cha a hro a vaopa châ ta, A lâpizy a uasa leipa deikua cha a thi aw.

¹⁷ Dyhchhiepa chô liata a ria a phapa cha, A sôh Abeipa dyu a pacheisapa châ ta; Abeipa ta a dyuchei cha a thô aw.

¹⁸ Na sawchapawpa cha chhorei teh, Hnabeiseihna a y lah y; A leidia thlâh ha awpa ta pachâ khah y.

¹⁹ Pathi chhie ngaitapa chyhsa cha hriena â tyh aw, Na pachhapa chhao ta pachha chanei ngâ thlâh ha awpa a byuh aw.

²⁰ Pasopakâna bie nathlie la pachuna a pyh mah y, Achhâna liata sona na hmô aw.

²¹ Chyhsapa palôh liata achhuahna hluhpi y ta, Châhrasala a duah awpa cha Abeipa ryhraopa a châ tyh.

²² Chyhsapa khochhihna cha kyhpachâna a hneipa he châ ta, Haihthaipa hlâta cha sipasapa kho â chhih via.

²³ Abeipa china cha hrona tlôkhei ta, A hneipa maih palôh pahâ kawpa ta a pahâ ei ta, Chhiena ta âmo cha tly aw vei.

²⁴ Thathipa cha beikoh liata a ku ny ta, A pakah lâ chalo heih awpa dâhdei chhao hoh vei.

²⁵ Chyhsa a pasipasawhpa cha tu la, Sona a phahlapa ta sona a chu aw ta; Chyhsa sovâhpa cha chhorei la, A pahnona a pôh aw.

²⁶ A paw chô liata kupathla ta a nô a papuapa sawchapaw cha, Nozana nata nohzaona a tlôkheituhpa a châ.

²⁷ Ei sawchapawpa y, pachuna nathliepa na bâsai khiahta cha, Novâhna biezy na paviasai aw.

²⁸ Pahnokheituhpa leilôpa ta adona pahneisao ta, Moleipa pakah ta moleina a palâ tyh.

²⁹ Chyhsa pasipasawh a hmâhpazy châta hriena a mâ chiehpa ta y ta, Ahrupazy hnôhky chhao tu awpa ta a mâ chiehpa ta a y.