BIESOZY 18 - Mara Bible RV (BSI)

¹ Ano dei ta a y nanopa cha ano khopa sai a tluapa châ ta, Sona dopa zydua a dyuhpa a châ.

² Ahrupa cha novâhna liata alyna hnei leipa ta, Ano palôh reipapuana lia deita ta â ly tyh.

³ Moleina a vaw y nahta, Papeisaleina vaw y tyh ta; Chyhsa za leina a y nahta, Nohzaona a y tyh.

⁴ Chyhsa pakah biezy cha ti athupa châ ta, Sona tihnawh cha vahtie loh zaolaopa hawhta a châ.

⁵ Moleipa khokhei viapa pha lei­pa ta, Mosiapa adona chhupa chhao pha vei.

⁶ Ahrupa hmao cha ahryuna tlôkhei ta, A pakah ta atuna a aw.

⁷ Ahrupa pakah cha ano raona châ ta, A hmao chhao a hro châta khoheih a châ.

⁸ Hohiahpa biezy cha pati pahâhpa hawhta châ ta, Py chhôh lâ a zu tyh.

⁹ A raihria liata chyhsa thathipa cha, Paraotuhpa unawhpa a châ.

¹⁰ Abeipa moh cha thokhy a sâhpa thatlôpa châ ta, Mosiapazy ta cha lâ a râ ei ta amâ boh tyh.

¹¹ Chyhsa hneirôhpa sôh cha â bohna khihpi thokhy châ ta, Thokhy a sâhpa hawhta a mothlaw liata a y tyh.

¹² Palôh laina cha raona hmia lâta sie ta, Areisina deikua cha palyupalihna hmia lâta a sie.

¹³ Bie thei pasia hlâta achhyna a piepa chyhsa cha, A hruna nata a maophyuhna a palâsa.

¹⁴ Palôh thatlôpa cha pasana tao thei ta, Palôh hmahphaopa deikua cha ahy ma a tao thei aw?

¹⁵ Palôh sopa cha pahnona hmô ta, Asopa nakhaoh chhao pahnona a tlua tyh.

¹⁶ Kuhria piepa cha a pietuhpa châta lâpi tao ta, Chyhsa rônahpazy hmiakô liata â chhi tyh.

¹⁷ A vaihzy a vy ei ta ama padei hlâta cha, A thaichâna bie a reih tuapa cha adopa hawhta â lâ tyh.

¹⁸ Nuby a daopa ta ahryuchhiana pachhâsa ta, A hryuh haipa thatlôpazy a pachhaih tyh ei.

¹⁹ Unawh pasasa hapa cha khihpi thatlôpa hlâta pahnie ru via ta, Cha hawpa ahryuna cha thokhy tlâh hawhta a châ.

²⁰ Chyhsa pakah thei ta a rih pabie ta, A hmao kôvei ta lôhrâtlôpa ta a y.

²¹ Paleih hmotaotheina liata thina nata hrona y ta, A pasôtuhpazy ta a theizy ama nie aw.

²² Lapinô a hmôpa cha hmo phapa a hmôpa châ ta, Abeipa khokheina a totuhpa a châ.

²³ Sipasapa cha â haw ta a haw tyh ta, Hneirôhpa deikua cha a chahrâh kawpa ta â chhy tyh.

²⁴ Viasa hluhpi hneipa cha raona châ thei ta, Châhrasala unawh hlâta â i viapa viasa a y.