BIESOZY 17 - Mara Bible RV (BSI)

¹ Atudaih ngâna o liata kyhchhi pati niepa hlâta cha, Adyryh kawpa ta laochhohpa bawpa a pha via.

² Sei sopa cha maophyuhna a tlôkheituhpa sawchapaw chô liata ryureih aw ta, Unawhpa pakha hawhta a zibeipa ryu a to hra aw.

³ Pathaisana beih cha tâkâ châta châ ta, Patina mei chhao ngôh châta a châ; Abeipa deikua cha palôh a pasia tyh.

⁴ Hmo pha leipa a taotuhpa cha moleipa hmaokah nathlie tyh ta, Haihthaipa chhao chochhiepa paleih lâ a nah a pachôh tyh.

⁵ Sipasapa a mohnaopa cha, Ano Taotuhpa palôh pasasa ta; Mohropa chhiena liata a lypa chhao, Hriena khôkhâh aw vei.

⁶ Samohzy cha machâpazy lakho châ ei ta, Sawzy rônahna chhao ama pawzy a châ.

⁷ Reih phapa cha ahrupa nata a khyh leipa ta, Hmao haihthaipa chhochhi abeisaw nata â khyh lei pachai.

⁸ Panaopapana cha a pietuhpa châta dyu hawhta châ ta, Â heina lâ maihta a hlaotloh lymâ.

⁹ Kyhpachâna a tluapa cha, Paraona a khupa châ ta; Paraona a reih chanei ngâ thlâh hapa deikua cha, Viasazy a pachhaih tyh.

¹⁰ Ahrupa ei za kha chheipa hlâta cha, Asopa ei kha rapa â ngia pathu via.

¹¹ Chyhsa moleipa cha chakhia nawpa sai tlua ta, Chavâta lyuhchâpa nô­chhiepa tua thlupa a châ aw.

¹² Ahrupa a hru nota a tyh awpa hlâta cha, Chavyh a taw la hapa a tyh awpa ngâh â chhih via.

¹³ Chhiena ta phana a thôtuhpa cha, Hmo phaleipa ta a o puasai aw vei.

¹⁴ Ahryuna athaona cha ti pasapa hawhta châ ta, Chavâta ahryuna a pua hlâta a hneisai ha mah y.

¹⁵ Moleipa thai a pachâsatuhpa cha, Abeipa châta pasichhihpa châ ta; Mosiapa thailei a pachâsatuhpa chhao, Abeipa châta pasichhihpa a châ.

¹⁶ Ahrupa cha palôh a hnei leipa châ ta, Chavâta sona chalei nawpa ta a ku liata sôh sopa cha, Khâpa ma a phahnai aw?

¹⁷ Viasa cha khatino rai ta kyhpachâ ta, Unawhpa deikua cha tymâna daihti châta a pihpa a châ.

¹⁸ Pahnona a phahlapa cha bie a taih ta, A vaihzy mohmô ta sôhkâ a sokhâh tyh.

¹⁹ Moleina hmo taopa a pahâh kawpa cha, A hryuchhia a khohpa châ ta; A chhikao a pasâhpa chhao, Raona a tluapa a châ.

²⁰ Palôh akopa chyhsa cha hmo phapa hmô leipa ta, Paleih haihthaipa chhao chhiena â tyh tyh.

²¹ Ahrupa a satuhpa cha anosasyh ta pachâ a parôh ta, Ahrupa paw cha alyna hnei vei.

²² Palôh thaphapa cha thohna phapa châ ta, Palôh pasapa deikua cha ruzy a pahi tyh.

²³ Moleipa cha arulâta panaopapana la ta, Adona lâpizy a parao tyh.

²⁴ Sona cha novâhna a hneipa hmiakô liata y ta, Ahrupa mo deikua cha kaokih liata a y tyh.

²⁵ Sawchapaw hrupa cha a paw pachârôhna châ ta, Ano a satuhpa nô palôh pasana a châ.

²⁶ Mosiapa hriepa cha pha leipa ta, Nôpawpazy amâ dona vâta tupa chhao pha vei.

²⁷ Bierei a chadopa cha chyhsa sopa châ ta, A reikah a sôhpa chhao chyhsa novâhpa a châ.

²⁸ Ahrupa chhao â chalih thlâh ha khiahta cha, Asopa hawhta pachâpa châ ta; A hmao a mo khiahta cha, Chyhsa novâhpa hawhta a ngiahpa a châ.