BIESOZY 16 - Mara Bible RV (BSI)

Hro nata nôchâ biesozy

¹ Palôh achhuahna cha chyhsapa eih châ ta, Paleih achhyna deikua cha Abeipa tawhta a châ.

² Ano mo liata cha chyhsa ta a hrozie zydua a pathaihpa hawhta hmô ta, Abeipa deikua cha palôh kho a pathliah tyh.

³ Na raizy Abeipa pavao sa la, Nâ chhuahpazy a hlaotloh aw.

⁴ Abeipa ta hmo to a chhâpa hneipa ta tao ta, Moleipa chhao he chhiena noh châta a taopa a châ.

⁵ Palôh laipa chyhsa cha Abeipa châta pasichhihpa châ ta, Hriena khôkhâh cheita aw vei.

⁶ Kyhpachâna nata ngâchhihna ta moleina chatlai ta, Abeipa chipa vâta chyhsa ta moleina a siesai tyh.

⁷ A hroziezy ta Abeipa a palysapa chyhsa cha, A chariahpazy taihta ano nata a ryh awpa ta Abeipa ta a taopa tyh.

⁸ Adoleipa ta sôh hluhpi hneipa hlâta cha, A sia kawpa ta a chyhta hneipa a pha via.

⁹ Chyhsapa palôh ta a lâpi pachâhpady ta, A lâsie a chhituhpa deikua cha Abeipa a châ.

¹⁰ Abei hmao liata Khazohpa bietapa y ta, Pachiana liata a pakah ta pachia chhei aw vei.

¹¹ Khopathliahna dopa nata thliena dopa zy he Abeipa eih châ ta, Sykhao liata khopathliahna lô zydua chhao ano taopa sai a châ.

¹² Beidyuchhai cha siana ta paduapa a châpa vâta, Hmo pha leipa taopa cha beizy châta pasichhihpa a châ.

¹³ Hmao siapa cha abei alyna châ ta, Biedopa a reihpa cha a pasô tyh.

¹⁴ Abei pathiiana cha thina lyuhchâpa châ ta, Châhrasala chyhsa sopa ta cha a padia thei aw.

¹⁵ Abei hmia khaihpa liata hrona y ta, A khokheina cha châhvâ vâsua meihdo hawhta a châ.

¹⁶ Ngôh hlâta sona hneipa pha via syulyu ta, Tâkâ vyuhpa ta novâhna tlao a tlyh awpa a châ.

¹⁷ Chyhsa dopa lâlai cha moleina chahrih ta, A lâpi a phapa ta a vaihpa cha a hrona a pabohsa.

¹⁸ Apalaina cha raona hmia lâta sie ta, Akhotlâhna palôh chhao paona hmia lâta a sie.

¹⁹ Apalaipazy hry liata hraona sôh a raipa hlâta cha, Sipasapazy hry liata areisina palôh phaopa a pha via.

²⁰ Bie pakhâta ta a pachâpa cha hmo phapa hmôpapua aw ta, Abeipa a ngâpa cha byhnâ a to aw.

²¹ Palôh sopa cha hmo yzie a pahno thaipa tahpa châ aw ta, Reikah thlôhpa ta chyhsa a pahnie tyh.

²² Novâhna cha a hneituhpa châta hrona tihnawh châ ta, Hruna deikua cha ahrupazy châta hriena a châ.

²³ Asopa palôh ta a pakah pasosa ta, A hmao liata thaina a baichha tyh.

²⁴ Bie phapa cha kheihthlawh hawh châ ta, Hro châta thlôh ta, ru châta hnatlâna a châ.

²⁵ Chyhsapa pachâ ta lâpi dopa a lyupa y ta, A chhâna lâta deikua thina lâpi a châ tyh.

²⁶ Ahriapasapa cha ano aohkhopa châta hriapasa ta, A pakah aohkhopa ta a pahriasa tyh.

²⁷ Chyhsa dyutlai leipa cha hmo pha leipa tao a chhuah tyh ta, A hmaozy cha mei sahpa hawhta a châ.

²⁸ Ngâchhih leipa chyhsa cha ahryuna chi hie ta, Bieparu rei a hmâhpa chhao viasazy a pachhaih ty.

²⁹ Chyhsa hro chhiepa ta a vaih dôvei tyh ta, Lâpi pha leipa liata â chhi tyh.

³⁰ A mo vo a chakhyhpa cha hmo doleipa tao â chhuahpa châ ta, A hmao a papiepa chhao hmo pha leipa a tlôkhei tyh.

³¹ Luh pawhpa cha rônahna lakho châ ta, Siana hro vâta hmôpa a châ.

³² Chyhsa palôh pasipa cha, Thatlôpa hlâta pha via ta; Ano palôh chô liata bie a hnei theipa chhao, Khihpi a latuhpa hlâta a pha via.

³³ Nuby cha byhpi chô liata a daopa châ ta, Biechhâna deikua cha Abeipa tawhta a châ tyh.