BIESOZY 15 - Mara Bible RV (BSI)

¹ Achhyna naipa ta pathiiana padia ta, Reih chahrâhpa deikua ta hiehâhna a pathyu tyh.

² Asopa paleih ta pahnona papua ta, Ahrupa pakah deikua cha bie hrupa a reih tyh.

³ Abeipa mo cha su to liata y ta, Hmo chhiepa nata hmo phapa zy a sai thlâh ha tyh.

⁴ Paleih naipa cha hrona tho châ ta, Paleih haiphiahpa deikua cha palôh a pakeichheih tyh.

⁵ Ahrupa cha a paw pachuna mohnao ta, Asopa deikua cha a paw rana a uasa tyh.

⁶ Mosiapa o liata cha sôh hluhpi y ta, Moleipa sôh hmôpa deikua cha tymâna a tlôkhei tyh.

⁷ Asopazy hmao cha pahnona hiepatla ta, Ahrupazy palôh deikua cha cha hawhta châ vei.

⁸ Moleipa atheihna hlâpa cha Abeipa châta pasichhihpa châ ta, Chyhsa dopa thlahchhâna deikua cha Abeipa ta â ly.

⁹ Moleipa lâpi cha Abeipa châta pasichhihpa châ ta, Siana lâpi a chhituhpa deikua cha Abeipa ta kyh a pachâ.

¹⁰ Lâpi a heihsaituhpa châta chhoreina ru ngaitapa y ta, Rana a haotuhpa chhao a thi aw.

¹¹ Athihkhih nata Chhokhih hmahta Abeipa hmiakô liata â lâ khai khiahta cha, Chyhsa sawzy palôh chhochhi cha khatlu ta ma a hmiakô liata â lâ aw tly!

¹² Chyhsa mohnao a hmâhpa cha rana pasô leipa ta, Chyhsa sopa pangai aw vei.

¹³ Palôh thaphapa ta hmia alyna tao ta, Palôh vâsâhna deikua cha thlahpa hro tha a pachhâ tyh.

¹⁴ Novâhpa palôh cha pahnona tlua ta, Ahrupa pakah deikua cha hruna a nie tyh.

¹⁵ Dyhchhiepa châta cha noh zydua a pha leipa sai châ ta, Palôhtlâh a paohpa châta deikua cha kyhchhi â zao thlâh haw.

¹⁶ Abeipa china chôta a chyhta hneipa cha, Sôh hluhpi hnei ta a tymâpa hlâta a pha via.

¹⁷ Ahaona chôta viahchao tôhpa thawhpa sa niepa hlâta cha, Kyhpachâna chôta âhna pati niepa a pha via.

¹⁸ Chyhsa pathichhiepa cha ahryuna pathyu ta, Nônaipa deikua cha aeichhiana a padia tyh.

¹⁹ Thathipa lâpi cha ahloh thih hawhta châ ta, Adopa lâthlôh deikua cha lâlai a raih pha kawpa a châ.

²⁰ Sawchapaw sopa cha a paw palysa ta, Ahrupa deikua cha a nô a mohnao.

²¹ Hruna cha sona a phahlapa châta â lyna châ ta, Chyhsa novâhpa deikua cha lâpi patlâpa liata a sie tyh.

²² Ryhraona phapa a y leina liata cha achhuahnazy a hlaotloh thei leipa ta, Pasopakâtuhpa ama hluhna liata deikua cha achhuahnazy a hlaotloh tyh.

²³ Thlai ta achhyna pie tyhpa ta chyhsa palysa ta, A daihtita ta bie rei tyhpa cha a pha kaw dia!

²⁴ Asopa châta cha hrona lâpi he â sâh lâta kiah lymâ ta, Chatanachata â hnai lâta Athihkhih lâpi a tleisai thei ha aw.

²⁵ Apalaipa o cha Abeipa ta parao ta, Nôhmei râhri deikua cha a pa-i tyh.

²⁶ Moleipazy pachâna cha Abeipa châta pasichhihpa châ ta, Mopathaihpazy bie deikua cha khochhihpa a châ.

²⁷ Athôhna doleipa hmô khohpa ta karâypa chyhsa cha, A chhôhkha châta tymâna tlôkhei ta; Panaopapana a haopa deikua cha, A hro a pareih aw.

²⁸ Mosiapa palôh cha â chhy hlâta pachâ tua tyh ta, Moleipa pakah deikua cha hmo pha leipazy a reih pôziah tyh.

²⁹ Abeipa cha moleipa tawhta a hla ta, Mosiapa thlahchhâna deikua a thei tyh.

³⁰ Mokhaoh khaihna ta palôh palysa ta, Thâtih pha ta ru a pathawh tyh.

³¹ Hrona chhoreina a nathliepa nakhaoh cha, Asopazy hry liata a pahrâ aw.

³² Pachuna a uasa leipa cha a hro khâpasaw ta a reih leipa châ ta, Chhoreina a nathliepa deikua cha novâhna a to aw.

³³ Abeipa china cha sona pachuna châ ta, Palyupalihna to awpa ta a reisi tua awpa a byuh.