BIESOZY 14 - Mara Bible RV (BSI)

¹ Chanô sopa cha a o sa ta, Chanô hrupa deikua cha ano ku tlai ta a o a parao.

² Â dopa ta a hrohpa cha Abeipa a chipa châ ta, Hrozie akopa deikua cha Abeipa a mohnaopa a châ.

³ Ahrupa pakah liata apalaina sôsi y ta, Asopazy hmao deikua cha âmo a pabohsa tyh.

⁴ Viahchao tôhpazy y leina liata cha sachâki pathaih ta, Châhrasala kôvei phana cha viahchao tôhpa thatlôna vâta a châ.

⁵ Pahnokheituhpa ngâchhihpa cha haipa bie reih leipa aw ta, Pahnokheituhpa pakheipa deikua cha hai­pa biezy a papua tyh.

⁶ Chyhsa a mohnaopa cha sona tlua ta hmô leipa ta, Novâhpa deikua cha a naosiapa ta a pahnona a hmô thei.

⁷ Ahrupa cha a hlasai mah y, Ano tawhta nâ chu awpa biesozy y vei.

⁸ Asopa sona cha a sie nawpa lâpi pahnosa ta, Ahrupazy hruna deikua cha dôveina a châ.

⁹ Ahrupazy cha thaileichâna hlâna pahneisao ei ta, Adopazy deikua cha ngiahthaina liata amâ ly tyh.

¹⁰ Palôh cha ano ngâlâh ta a pasana pahno ta, Â lyna liata chhao khôtho chyhsa a lykheipa y veih ei.

¹¹ Moleipa o cha paraopa châ aw ta, Adopa poh o deikua cha vânoh topa ta a y aw.

¹² Chyhsapa pachâ ta lâpi dopa a lyupa y ta, A chhâna lâta deikua thina lâpi a châ tyh.

¹³ Pahneina liata chhao palôh pasana y thei ta, Thaphana chhao a chhâna lâta cha pachârôhna lâta a pua thei.

¹⁴ Palôh hnôhsypa cha a hrozie theizy ta pabiepa châ aw ta, Chyhsa phapa chhao a hrozie theizy ta pabiepa a châ aw.

¹⁵ Sona a phahlapa cha bie to zo ta, Chyhsa sopa deikua cha a lâpizy a pachâ tyh.

¹⁶ Asopa cha a chado kaw ta, Hmo pha leipa tao vei; Ahrupa deikua cha a riah pha kaw ta, Pachâ tua leipa ta hmo a tao tyh.

¹⁷ Pathi pachhohpa cha hru kawpa ta hmo tao ta, Hmo chhiepa tao â chhuahpa chhao a haopa a châ tyh.

¹⁸ Sona a phahlapazy cha hruna ryu to ei ta, Asopazy deikua cha pahnona lakho pakhopa ama châ.

¹⁹ Chyhsa chhiepazy cha chyhsa phapazy hmiakô liata panawhsapa châ ei ta, Moleipazy chhao mosiapazy chhikao liata panawhsapa ama châ.

²⁰ Sipasapa cha a vaih chhao ta a hao ta, Hneirôhpa deikua cha viasa hluhpi a hnei.

²¹ A vaih a mohnaopa cha moleipa châ ta, Dyhchhiepazy chô liata a ria a phapa deikua cha vânoh a to aw.

²² Hmo pha leipa tao a chhuahpazy cha viavi tyh ei ta, Hmo pha tao a chhuahpazy deikua cha kyhpachâna nata biehmeiseihpa ama hlao tyh.

²³ Hriapasana to liata athôhna y ta, Reih hluh thlâhthlipa deikua cha dyhchhiena a tlôkhei.

²⁴ Asopazy lakho cha hneirôna châ ta, Ahrupazy hruna deikua cha hruna dei a tlôkhei tyh.

²⁵ Pahnokheituhpa dopa cha hronazy pachha ta, Pahnokheituhpa pakheipa deikua cha haipa bie â duakhei tyh.

²⁶ Abeipa a chipa chyhsa cha a riahpha ta, A sawzy ta a chhai awpa ama hnei.

²⁷ Abeipa china cha hrona tihnawh châ ta, Abeipa a chituhpa cha thina khoheih a khôkhâh aw.

²⁸ Phopi maluh hluhpa cha abei rônahna châ ta, Phopi a y vei khiahta cha ryureituhpa chhao a rao aw.

²⁹ Hiehâhna kyh liata nainôsôpa chyhsa cha novâhna a hnei hluhpa châ ta, Thlai ta a hie a hâh thlâh ha tyhpa chyhsa deikua cha hruna a cheihchalo tyh.

³⁰ Palôh alyna cha sapa tlâhna châ ta, Hiatliana deikua cha ru hmyna a châ.

³¹ Sipasapa a tlybaipa cha a Taotuhpa palôh a pasasapa châ ta, Phahlapazy a ngiachhiepa deikua cha a Taotuhpa a palyupalih.

³² Moleipa cha a hmo chhie taopa vâta pao ta, Mosiapa deikua cha thina liata hnabeiseihna a hnei.

³³ Novâhpa palôh liata cha sona a chalih thlâh ha ta, Ahrupazy hry liata deikua cha â chaluah lymâ.

³⁴ Siana ta râh cheihchalo ta, Moleina deikua cha phopi to châta nohzaona a châ.

³⁵ So kawpa ta hmo a taopa chakaotuhpa cha, Abei ta khokhei ta; Nozana a tlôkheituhpa chakaotuhpa chô liata deikua cha, Abei pathiiana ta a tla thlu tyh.