BIESOZY 13 - Mara Bible RV (BSI)

¹ Sawchapaw sopa cha a paw pachuna nathlie ta, Chhorupa deikua cha chhoreina nathlie khoh vei.

² A pakah thei tawhta chyhsa ta hmo phapa nie aw ta, Nôchhiepa khona deikua cha atudaina a châ tyh.

³ A pakah a sohsi theipa cha a hro pabohsa ta, A hmao a kawhpa deikua cha a hro a rao tyh.

⁴ Thathipa hro cha hmo khoh kaw ta, Châhrasala a hnei theipa y leipa ta; Tiamapa hro deikua cha, Lôhrâtlôna taihta a hnei.

⁵ Mosiapa cha haipa a hao ta, Moleipa deikua cha nozana nata nohzaona a tlôkhei tyh.

⁶ Siana ta adopa ta a ypazy hrôbieh ta, Moleina deikua cha moleipa a papao tyh.

⁷ Chyhsa pakha cha anosasyh hneirôhpa hawhta â tao ta, Châhrasala a hneipa y leipa ta; Chyhsa hropa ta sipasapa hawhta â tao ta, Châhrasala sôh hluhpi a hnei.

⁸ Chyhsa ta a sôh ta a hrona a chatlai ta, Sipasapa deikua cha pachhiparyna a tyh vei.

⁹ Mosiapa khaihna cha khaih pha ta, Moleipa meiôh deikua cha pachhaipa a châ aw.

¹⁰ Apatahsana cha ahryuna dei papua ta, Pachâna a latuhpazy deikua cha sona ama hmô tyh.

¹¹ Dôveina ta sôh hmôpa cha pai aw ta, Hriapasana ta hmôpa deikua cha a pôh aw.

¹² Hnabeiseihna pahawhsapa ta palôh pasasa ta, Saduthliepa a vaw tlôpa deikua cha hrona tho a châ.

¹³ Bie a mohnaopa chyhsa cha anosasyh ta raona a tao ta, Biepiepa a chizapa deikua cha lymâ a hmô aw.

¹⁴ Chyhsa sopa pachuna cha hrona tihnawh châ ta, Thina khoheih ama khôkhâh thei aw.

¹⁵ Pahnona phapa cha khokheina tona châ ta, Piehpiepazy lâpi deikua cha ama raona a châ.

¹⁶ Asopa cha pahnona ta hmo tao ta, Ahrupa deikua cha a hruna a paziah tyh.

¹⁷ Lyuhchâpa moleipa cha tymâna a tyh ta, Vyuhtuapa ngâchhihpa deikua cha tlâhna a tlôkhei tyh.

¹⁸ Pachuna a khoh leipa cha dyhchhiena nata nohzaona ta tlô thlu aw ta, Rana a pyhpa deikua cha palyupalihpa a châ tyh.

¹⁹ Khopa hmôpa cha hro châta thlôh ta, Moleina siesaipa deikua cha ahrupazy châta pasichhihpa a châ.

²⁰ Chyhsa sopa a pakyhpa cha ano chhao soh aw ta, Ahrupazy viasa deikua cha pasa a tao aw.

²¹ Moleipazy cha chhiena ta chadai ei ta, Mosiapazy deikua cha phana ama hmô tyh.

²² Chyhsa phapa cha a samohzy to awpa taihta ryu siesai ta, Moleipa sôh deikua cha mosiapa châta pachôpa a châ.

²³ Sipasapa leipalie ta niedo hluhpi papua ta, Châhrasala ryurei doleipa vâta pahleipadiapa a châ tyh.

²⁴ Sôsi a hmâh khoh leipa cha a sawchapawpa a haopa châ ta, A kyh a pachâpa deikua cha thlai a chhorei tyh.

²⁵ Mosiapa cha a hro lôhrâ patlôna khi hnei ta, Moleipa py deikua cha a rua aw.