BIESOZY 12 - Mara Bible RV (BSI)

¹ Chhoreina a pasôpa cha pahnona a pasôpa châ ta, Rana a haopa deikua cha râhsa hawhpa a châ.

² Chyhsa phapa cha Abeipa kho­kheina hmô aw ta, Moleina palôh a phaohpa deikua cha thailei a pachâ aw.

³ Moleina hmo taona tawhta ahy hmah a duah leipa ei ta, Mosiapa thari deikua cha phiapa châ aw vei.

⁴ Chanô phapa cha a vahpa châta lakho châ ta, Nozana a vaw tlôkheipa chanô deikua cha, A vahpa ru a pahmytuhpa a châ.

⁵ Mosiapa pachânazy cha a do ta, Moleipa ryhraona deikua cha dôveina a châ.

⁶ Moleipa biezy cha thisaih palo awpa ta a byh ta, Adopa pakah deikua cha âmo a pachha tyh.

⁷ Moleipazy cha thypa châ ei ta, y khao veih ei; Mosiapa pathlazy deikua cha amâ duah lymâ aw.

⁸ Pahnona phapa a hneipa chyhsa cha reithaina hlao ta, Palôh chhiepa chyhsa deikua cha mohnaona a hlao tyh.

⁹ Chyhsa pipawpa hawhta â tao ta nie a phahla thlâh hapa hlâta cha, Chyhsa nawhpa châ ta chakaotuhpa hneipa a pha via.

¹⁰ Mosiapa cha a sahroh hrona pachâ peimawh ta, Moleipa zawngiahna deikua cha nôchhiena a châ.

¹¹ A chhaohlei a palietuhpa cha, Nie awpa hluhpi hnei aw ta; Hraoleipa a chadaituhpa deikua cha, Pahnona â phahla.

¹² Moleipa cha hmoparaopa hraona sôh uahva ta, Mosiapa thari deikua cha a pathei aw.

¹³ Moleipa cha ano hmao paraona liata a ao ta, Mosiapa deikua cha tymâna a khôkhâh tyh.

¹⁴ Chyhsa cha a reikah thei tawhta hmo phapa ta a lôhrâ patlô ta, Ano ku hmotaopa tlai ta ano lâ a vaw lie thlu heih tyh.

¹⁵ Ahrupa cha ano mokhaoh liata a lâpi a do ta, Asopa deikua cha chhosina a nathlie tyh.

¹⁶ Ahrupa cha a ruchhôna thlai a lâ tyh ta, Asopa deikua cha hmia pachhiena pahno lei â pachâ tyh.

¹⁷ Pahnokheituh ngâchhihpa cha biedopa reih ta, Pahnokheituh pakheipa deikua cha haipa bie a reih tyh.

¹⁸ Zaozi chhôpa hawhta pasapa ta bie a reihpa y ei ta, Asopa paleih deikua cha tlâhna a châ tyh.

¹⁹ Biedopa hmao cha chhâzaw a daih ta, Haipa paleih deikua cha buakha dei â daih.

²⁰ Hmo chhiepa tao a chhuahpazy palôh liata dôveina y ta, Adyhna a taotuhpazy deikua cha alyna ama hnei.

²¹ Mosiapazy chô liata hmo chhiepa tlô leipa ta, Moleipazy deikua cha tymâna ta ama bie.

²² Paleih haihthaipa cha Abeipa châta pasichhihpa châ ta, Âdopa ta a taotuhpazy deikua cha â ly ei.

²³ Asopa cha a pahnopazy nyu ta, Ahrupa deikua cha hruna bie a phuah tyh.

²⁴ Tiamapa ku ta ryureina chaba aw ta, Thathipa deikua cha ku rai hriatuhpa a châ aw.

²⁵ Palôh rietheina ta chyhsa tha pachhâ ta, Bie phapa deikua ta a palysa tyh.

²⁶ Mosiapa cha a vaih châta chhituhpa châ ta, Moleipa lâpi deikua cha ama paviana a châ.

²⁷ Thathipa cha a sa kapa rao awpa hnei leipa aw ta, Tiamapa deikua cha dyhphana ryusôhpa a hnei aw.

²⁸ Siana lâpi liata hrona y ta, Cha lâthlôh liata cha thina y vei.