BIESOZY 11 - Mara Bible RV (BSI)

¹ Khopathliahna doleipa cha Abeipa châta hmo pasichhihpa châ ta, Khopathliahna dopa deikua cha â ly tyh.

² Apalaina a vaw y nahta, Maophyuhna vaw y ta; Areisipa deikua cha, Sona a hneipa a châ.

³ Chyhsa dopazy cha amâ dona ta âmo chhihtha ta, Piehpiepazy deikua cha âmo zietiahna ta a pahleipadia tyh ei.

⁴ Hiehâhna noh liata cha, Hneirôna ta phahnaina hnei khao leipa ta; Siana deikua ta cha, Thina tawhta a pachha tyh.

⁵ Phapakipa cha a siana ta a lâpi patlâsa ta, Moleipa deikua cha ano moleina ta a pao tyh.

⁶ Adopazy cha amâ dona ta âmo pachha ta, Piehpiepazy deikua cha âmo aohraohna liata amâ ao tyh.

⁷ Moleipa cha a thi nahta, A hnabeiseihna lei pâ ta, Hneirôh awpa ta a saduthliepa chhao a lei ha tyh.

⁸ Mosiapa cha nôpona tawhta pachhapa châ ta, Moleipa deikua cha nôpona lâ tlao â ngia tyh.

⁹ Khazohpa a pachâ leipa chyhsa cha, A pakah ta a vaih parao ta, Mosiapa deikua cha, A pahnona ta a vaih a pachha tyh.

¹⁰ Mosiapa chô liata hmo pha a tlôh nahta, Khihpi a ly ta; Moleipa a leidia nahta, Thaphapa ta ama rahao tyh.

¹¹ Mosiapazy byhnâ ta khihpi cheihchalo ta, Moleipazy pakah ta khihpi a parao tyh.

¹² A vaih a mohnaopa cha pahnona a phahlapa châ ta, Chyhsa novâhpa deikua cha â chalih tyh.

¹³ Chyhsa kyhchhie a reih thaipa cha bieruzy phuah tyh ta, Ngâchhihna palôh a hneipa deikua cha bie a nyu thei.

¹⁴ Chhihthana y leina liata cha phopi pao tyh ta, Ryhrao thaipa hluhna liata deikua cha abohna a y tyh.

¹⁵ Khichhaipa châta sôhkâ a sokhâhpa cha pasa tao aw ta, Sôhkâ a sokhâh leipa deikua cha palôh pahâpa ta a y aw.

¹⁶ Ngiachhiena a hneipa chanô cha zachhihna hnei ta, Thachahra a hmâhpa chyhsazy ta hneirôna ama hnei.

¹⁷ Zawngiah theipa chyhsa cha ano hro châta hmo phapa tao ta, Chyhsa chhiepa deikua cha ano sapa châta pasana a tlôkhei tyh.

¹⁸ Moleipa cha dôveina hmâpa ta hlao tyh ta, Siana chi a tupa deikua cha lymâ dopa a hmô tyh.

¹⁹ Siana liata â ipa ta a duahpa cha hrona to aw ta, Moleina hmo a chadaituhpa deikua cha a thi aw.

²⁰ Palôh akopazy cha Abeipa châta pasichhihpa châ ei ta, Seina hnei leipazy hrozie deikua cha â lyna a châ tyh.

²¹ Hmeiseihta ta moleipa cha hrie leipa ta y leipa aw ta, Mosiapa pathlazy deikua cha pa­chhapa ta ama y aw.

²² Chanô chhithaipa pachâna a hnei leipa cha, Vao hmaothy liata ngôh rahy pataohpa hawhta a châ.

²³ Mosiapa khopa cha phana ta chhâ tyh ta, Moleipa saduthliena deikua cha hiehâhna ta a chhâ tyh.

²⁴ A saipa ta hiepatlapa cha pôh rilina châ ta, Byuhpa hleikhô ta riakhiehpa deikua cha phahlana a châ.

²⁵ Chyhsa riaphapa cha a dyh pha aw ta, Ti a baotuhpa cha anosasyh â baopa a châ.

²⁶ A sâh a pasaih leipa cha chyhsa ta chhiesapa aw ei ta, A zuahtuhpa luh chô liata deikua cha byhnâ a y aw.

²⁷ Phahnai khohpa ta phana a tluapa cha khokheina hmô ta, Chhiena a tluapa deikua cha chhiena ta a vaw tlô thlu aw.

²⁸ A hneirôna a ngâchhâpa cha pao aw ta, Mosiapa deikua cha sibiepa hrohpa hawhta a laiseih aw.

²⁹ Ano chhôhkha a patypamâtuhpa cha ziza ryu to aw ta, Ahrupa cha palôh sopa chakaotuhpa a châ aw.

³⁰ Mosiapa thei cha hrona tho châ ta, Chyhsa hro a pahnietuhpa cha asopa a châ.

³¹ Mosiapa hmahta alei liata viarithôpa ama châ khiahta cha, Moleipa nata hmoparaopa chhochhi cha, Khatlu ta pasa viapa ta viarithôpa ma ama châ aw tly!