BIESOZY 10 - Mara Bible RV (BSI)

Mosiapa nata moleipa pakhona

¹ He he Sawlawmaw biesozy a châ: Sawchapaw sopa ta a paw palysa ta, Sawchapaw hrupa deikua cha a nô pachârôhna a tlôkhei tyh.

² Moleina ta sôh hmôpa cha athôhna y leipa ta, Siana deikua cha thina tawhta a pachha tyh.

³ Mosiapa nodi awpa cha Abeipa ta pasaih leipa ta, Moleipa aohkhopa deikua cha a pakhâ ha tyh.

⁴ Ku thathipa ta dyhchhiena tlôkhei ta, Ku tiamapa deikua cha hneirôna a tlôkhei ty.

⁵ Nopi daihti liata a pachô pakhypa cha sawchapaw sopa châ ta, Sâh hria nota a mô thlâh hapa sawchapawpa deikua cha nozana a tlôkhei tyh.

⁶ Mosiapa luh liata vânoh y ta, Moleipa pakah deikua cha nôchhiena ta a pahly.

⁷ Mosiapa atheithlâhna cha vânoh tona châ ta, Moleipa moh deikua cha a thuzao aw.

⁸ Palôh sopa cha biepiepazy a pyh ta, Ahrupa reikah hluhpa deikua cha a pao aw.

⁹ Â dopa ta a siepa cha â bohpa ta sie ta, A lâpi a pakosapa deikua cha â lâ thlyu tyh.

¹⁰ Chyhsa a mopasihpa cha nôpona tlôkhei ta, Ahrupa reikah hluhpa chhao a pao aw.

¹¹ Mosiapa pakah cha hrona tihnawh châ ta, Moleipa pakah deikua cha nôchhiena ta a pahly.

¹² Ahaona ta ahryuna papua ta, Kyhpachâna deikua cha paraona zydua a khu tyh.

¹³ Novâhna a hneipa hmaozy liata sona hmôpa châ ta, Pahnona a phahlapa châta deikua cha a ky châta sôsi a y.

¹⁴ Asopa cha pahnona pachô ta, Ahrupa pakah deikua cha raona a pahniasa tyh.

¹⁵ Chyhsa hneirôhpa sôh cha â bohna khihpi thokhy châ ta, Sipasapazy dyhchhiena cha ama raona a châ.

¹⁶ Mosiapa hriapasana cha hrona tlôkhei ta, Moleipa athôhna deikua cha paraona a tlôkhei tyh.

¹⁷ Pachuna a pyhtuhpa cha hrona lâpi liata sie ta, Rana a dythapa deikua cha mohropazy â chhi chhei tyh.

¹⁸ Ahaona a phihtuhpa cha hmao haihthaipa hnei ta, Kyh reina bie a papuapa cha ahrupa a châ.

¹⁹ Bie hluhpi a reihpa cha paraona a phahla leipa ta, A hmao a sohsi theipa deikua cha chyhsa sopa a châ.

²⁰ Mosiapa paleih cha tâkâ suapa châ ta, Moleipa palôh deikua cha khâpa hmah a phuh vei.

²¹ Mosiapa hmao ta chyhsa hluhpi pasa ta, Ahrupa deikua cha pahnona a phahlapa ta a thi tyh.

²² Abeipa byhnâ cha chyhsa pahneirôhsa ta, Pachârôhna baichha tyh vei.

²³ Ahrupa châta hmo doleipa taopa cha saisopa hawh châ ta, Novâhpa châta deikua sona cha hmo sôhpa a châ.

²⁴ Moleipa cha a chipa hawh tlai ta a chô liata vaw tlô aw ta, Mosiapa khopa deikua cha piepa a châ aw.

²⁵ Khisô vaw pathli ta, Moleipa y khao leipa ta, Mosiapa deikua cha chhâzaw lôbô a châ.

²⁶ Hâh châta kresawhti thaopa nata mo châta meikhuh hawhta, Thathipa chhao ano a tuahtuhpa châta a châ.

²⁷ Abeipa china cha hro pareihna châ ta, Moleipa kôzy deikua cha pachhohsapa a châ aw.

²⁸ Mosiapa hnabeiseihna ta alyna tlôkhei ta, Moleipa saduthliena deikua cha a leidia aw.

²⁹ Abeipa china cha seina hnei leipa châta a thokhy châ ta, Moleina hmo a taotuhpazy châta deikua cha raona a châ.

³⁰ Mosiapa cha râh tawhta papuapa châ leipa aw ta, Moleipa deikua cha râh liata pahrâ aw vei.

³¹ Mosiapa pakah ta sona papua ta, Nôchhiepa paleih deikua cha taipa a châ aw.

³² Mosiapa hmaozy ta a pyh tlâhpa pahno ta, Moleipa pakah deikua cha nôchhiena bie a reih tyh.