BIESOZY 1 - Mara Bible RV (BSI)

Biesozy achhuahna

¹ He he Dâvi sawchapawpa, Izarei bei Sawlawmaw biesozy ta â chhuahpa a châ:

² Sona nata pachuna pahno awpa ta, Pahnona biezy liata novâhna hnei awpa ta,

³ Sona, siana, adona nata akhongâhna kyh zy liata Pachuna dao awpa ta;

⁴ Sona a phahlapazy hnohta sona pie awpa ta, Thyutliapazy hnohta pahnona nata hmia nata hnôh sai thaina pie awpa ta;

⁵ Asopazy ta theipa ta ama pahnona a pôh via nawpa ta, Novâhpazy ta pasopakâna bie ama dao thei nawpa ta,

⁶ Bieso nata pakhona bie liata novâhna hnei awpa ta, Asopazy bie nata ama bie khiakhipazy liata novâhna hnei awpa ta.

⁷ Abeipa china cha novâhna athaona châ ta, Ahrupazy ta sona nata pachuna ama mohnao tyh.

Chhoreina nata zikyurâna

⁸ Ei sawchapawpa y, na paw chhoreina bie nathlie la, Na nô pachuna bie a heihsai khah y;

⁹ Na luh châta pawpi pachhih a ngia ngaitapa châ ei ta, Na rao châta pachhihzy ama châ.

¹⁰ Ei sawchapawpa y, moleipazy ta ama cha reipasao khiahta cha, A pyh khah y.

¹¹ “Eima hnohta a vy la, Thisaih palo awpa ta a byh sih la, A chhâpa y leipa ta paraona a hnei leipazy a byh ei suh u.

¹² Athihkhih hawhta a hrohpa ta âmo cha palâ sih la, Khaohtlô liata a tlapazy hawhta ama pôhpa dua ta palâ ei suh u.

¹³ Hmo sôhpazy hmô aw pi ta, Hraona sôh ta eima o eima pabie aw.

¹⁴ Eima hry liata miah a hlao hra la, Tâkâ sahria miakha eimâ hly aw,” Tahpa ta ama cha reipasao tita,

¹⁵ Ei sawchapawpa y, ama lâpi a chhih hra leipa la, Ama lâpizy tawhta na phei a sysai ha mah y.

¹⁶ Moleina lâta ama pheizy a râ ta, Thisaih palo awpa ta amâ para tyh.

¹⁷ Pavaw mohmô ta sao paraipa cha, Hraoleipa ta paraipa a châ.

¹⁸ He chyhsazy heta âmo thisaih a byh ei ta, Âmo hrona amâ byh.

¹⁹ He he avyuhna ta athôhna a chadaipa karâypa chyhsa zydua chhâna a châ, Avyuhna ta hneipa sôh chata a hneituhpazy hrona a pahlei tyh.

Sona awna ao

²⁰ Sona cha khiliah liata a paropa ta awh ta, Sôhdaoh suzy liata a aony a pasâh.

²¹ Khiliah lôhawh chaina su liata awh ta, Khihpi thokhy chhikaozy liata hetana heta a tah:

²² “Nâmo sona a phahlapazy saih u, So leipa ta ypa he khachâ ma nama pasô chy aw tly? Pasipasawh a thaipazy ta khachâ ma chyhsa pasipasawhpa paphasa aw ei ta, Ahrupazy ta khachâ ma pahnona amâ hao aw tly?

²³ Ei chhoreina lâ namâ vaw heih khiahta cha, Pachâ teh u, ei thlahpa cha hry aw ei na ta, Ei biezy ei cha pahnosa aw ei.

²⁴ Cha aw ei na ta, Khoh leipa ei chi ta; Ei ku pazawh na ta, Ahy hmahta uasa leipa ei chi ta;

²⁵ Ei ryhraopa zydua hraoleipa ta tao ei chi ta, Ei chhoreina rai namâ pyh khoh leipa vâta,

²⁶ Kei chhao ta chhiena namâ tyhna liata cha pahneisao aw ei na ta, Hmo chichhihpa ta a cha tla thlu ti ei ta ei cha pahneisao aw ei.

²⁷ Hmo chichhihpa ta thlihpipa hawhta a cha chhei ti ei ta, Chhiena ta khisô hawhta a châ pahieh thlu ti ei ta, Nôpona nata pachârôhna a cha vaw tlô thlu ti ei ta, Ei cha pahneisao aw ei.

²⁸ Cha tina chata na pado aw ei ta, Châhrasala a chhy aw veih ei na; Thata na tlua awh ei ta, Châhrasala na hmô aw veih ei.

²⁹ Pahnona a hao ei ta, Abeipa china a tlyh leipa ei ta,

³⁰ Ei ryhraopa miakha hmahta khoh leipa ei ta, Ei chhoreina zydua ama papeisa leipa vâta,

³¹ Âmo yzie thei nie aw ei ta, Âmo hmotaopazy ta lôhrâ amâ patlô aw.

³² Sona a phahlapazy cha lâpi ama tleisaina ta âmo cha thie tyh ta, Ahrupazy chhao âmo hruna ta a pahleipadia tyh ei.

³³ Ei bie a nathlietuhpa deikua cha â bohpa ta y aw ta, Chhiena chi leipa aw ta, Chhôhmohpa ta a y aw.”