BIEPHUAH 9 - Mara Bible RV (BSI)

Chiahmie miapangawhna

¹ Chatawhcha vâlyuhchâpa papangawhna ta a chiahmie vaw tô ta, awhsi avâ tawhta alei lâ a tlapa hmô na ta, leichiepa khaohtlô pahyna châhbi a hnohta piepa châ ta.

² Leichiepa khaohtlô cha pahy ta, leichiepa khaohtlô tawhna chata patisana meikhuh ru ngaitapa a lyupa meikhuh kaw pua ta, leichiepa khaohtlô meikhuh vâna chata noh nata aruapa cha vaw zoh ha ta.

³ Meikhuh hry tawhna chata khawsuzy alei lâ vaw pua ei ta, alei liata râhcha-iazy hmotaotheina hawhpa hmotaotheina ama hnohta piepa a châ.

⁴ Ama khi liata Khazohpa chahnaona a hnei leipa chyhsazy tah leipa ta cha, alei liata sibiepazy, tho hrohpa kheihawhpa rai nata thokô kheihawhpa rai parao lei awpa ta chhopa ama châ.

⁵ Ama khi liata Khazohpa chahnaona a hnei leipazy cha thla pangawh chhôh pasa pataosa awpa ta khawsuzy cha pasaipa châ ei ta, ama thie awpa deikua pasaipa châ veih ei. Ama pasasanazie cha râhcha-ia ta chyhsa sie ta a pasasapa hawhta a châ.

⁶ Cha nohzy liata chyhsazy ta thina tlua aw ei ta, châhrasala hmô aw veih ei. Thi khoh ngaita aw ei ta, châhrasala thina ta a râsai aw ei.

⁷ Khawsuzy alânazie cha adyuhna châta pachhuahpanohpa arâzy hawhta ama châ. Ama luhzy liata ngôh lakho lyupa a kho ei ta, ama hmia cha chyhsapa hmia a lyu.

⁸ Ama sâ cha chanô sâ lyu ta, ama hâhzy cha chakeibarôhneipa hâh a lyu.

⁹ Thua chachôhna vyhphao a lyupa chachôhna vyhphao hnei ei ta, ama mathlaw chakhypa pyu cha, adyuhna lâ a râ ngâpa talailih hluhpi nata arâ hluhpi pyu hawhta a châ.

¹⁰ Râhcha-iazy hawhta chaolahmei nata azâpa hnei ei ta, thla pangawh chhôh chyhsazy pasasa theina ama chaolahmei liata a y.

¹¹ Leichiepa khaohtlô vâlyuhchâpa cha ama bei ta hnei ei ta, a moh cha Hebrai reih ta Abadô châ ta, Krikâh reih ta Apôliô a châ.

¹² Hupona hmiatua chaipa khô ha ta, nathlie teh, hupona a vaw tlô awpa miano a y chy.

Chiahmie miacharuna

¹³ Chatawhcha vâlyuhchapa pacharuna ta a chiahmie vaw tô ta, Khazohpa hmiakô liata ngôh maisâh ki palihzy tawhta ao thei na ta.

¹⁴ Ao chata chiahmie a chabapa vâlyuhchâpa pacharuna hnohta, “Ufrâti chavah liata vâlyuhchâpa papalih chahrypazy kha pathlâ teh,” tah ta.

¹⁵ Cha dawh, cha noh, cha thla nata cha kô châta rao chiehpa vâlyuhchâpa papalihzy cha, chyhsa su thôh su kha thie awpa ta pathliepa châ ei ta.

¹⁶ Arâ pheisaihzy maluh zie ama reipa ei theipa cha, thy kha nata thy kha papôhsapa lie no a châ.

¹⁷ He he arâzy nata a kiahtuhpazy kyh liata aluahna ta ei hmôpazy a châ: Mei nata saphai lô nata kaih hawhpa chachôhna vyhphaozy hnei ei ta, arâ luhzy cha chakeibarôhneipa luhzy lyu ta, ama pakah tawhta mei nata meikhuh nata kaihzy a pua.

¹⁸ Ama pakah tawhta a puapa mei nata meikhuh nata kaih potlana miathôh ta khizaw chyhsa su thôh su kha a thie haw.

¹⁹ Arâzy hmotaotheina cha ama pakah liata nata ama chaolahmei liata y ta, ama chaolahmeizy cha parihzy hawhta châ ta, luhzy hnei ei ta, cha chata chyhsa ama pasasa tyh.

²⁰ Khizaw chyhsa hropa, cha potlanazy ta a thie leipazy ta ama ku ta taopazy amâ chhypa tawhta ro khoh to veih ei. A hmô thei leipa, a thei thei leipa nata a sie thei leipa ngôh nothlahpa, tâkâ nothlahpa, dawh nothlahpa, alô nothlahpa nata tho nothlahpa achhyna nata ahripazy achhyna bâsai hlei veih ei.

²¹ Ama lianycheinazy, ama dyuthainazy, amâ patlana moleinazy nata ama parunazy chhao ro hlei veih ei.