BIEPHUAH 8 - Mara Bible RV (BSI)

Chahnaona miasarina nata ngôh ropahâhpa

¹ Mietakutaw ta chahnaona miasarina a vaw pathlâ nahta, dawh khophie rachhôh avâ liata a chalihna y ta.

² Chatawhcha Khazohpa hmiakô liata a duah tyhpa vâlyuhchâpa pasarizy hmô na ta, ama hnohta chiahmie miasari piepa châ ei ta.

³ Vâlyuhchâpa hropa a vy ta, ngôh ropahâhpa raona byh chhaota maisâh kiapâh liata a vaw duah ta. Ropahâhpa hluhpi a hnohta piepa châ ta, cha cha mopathaihpa zydua thlahchhânazy chhaota beidyuchhai hmiakô ta ngôh maisâh chô liata hlâ awpa a châ.

⁴ Ropahâhpa khuh cha mopathaihpazy thlahchhâna chhaota, vâlyuhchâpa ku tawhta Khazohpa hmiakô lâ khy ta.

⁵ Vâlyuhchâpa ta ropahâhpa raona byh cha la ta, maisâh liata mei ta pabie ta, alei liata thy ta. Chatanachata tôkalôhpazy a vaw thua ta, aozy vaw pua ta, dôhlazy vaw pathlie ta, alozy thata a sih ta.

Chiahmie miasari

⁶ Chatawhcha vâlyuhchâpa pasarizy ta chiahmie miasari amâ chabapazy tô awpa ta a pachyh ei ta.

⁷ Vâlyuhchâpa pakhana ta a chiahmie vaw tô ta, thisaih nata a pahlaopa pareih nata mei ta vaw pazi ta, chazy cha alei liata thypa a châ. Alei su thôh su kha kâ khai ta, thozy chhao su thôh su kha kâ ta, sibie hrohpa zydua a kâ khai haw.

⁸ Vâlyuhchâpa panona ta a chiahmie vaw tô ta, tlâh laipa a lyupa, mei ta a kâ haipa cha tilaipi liata thypa châ ta, chatanachata tilaipi su thôh su kha cha thisaih lâta a vaw lie ha ta.

⁹ Tilaipi liata hrona a hneipazy su thôh su kha thi ei ta, balyhzy chhao su thôh su kha paraopa a châ.

¹⁰ Vâlyuhchâpa pathôhna ta a chiahmie vaw tô ta, meirei hawhta a iapa awhsi laipa avâ tawhta za tla ta, chavahzy su thôh su kha nata tihnawhzy vi ta.

¹¹ Awhsi moh cha Khapa a châ. Tizy su thôh su kha cha ti khapa lâta a vaw lie ta, ti khapa ta taopa a châpa vâta, a ti a dohpa hluhpi thi ei ta.

¹² Vâlyuhchâpa papalihna ta a chiahmie vaw tô ta, noh su thôh su kha, thlâpâ su thôh su kha, awhsizy su thôh su kha paraopa a châ. Ama khaihna su thôh su kha pazohsapa châ ta, chhô daihti su thôh su kha cha khaih khao leipa ta, zâ daihti su thôh su kha chhao khaih khao vei.

¹³ Chatawhcha kaw moh na ta, avâ liata a zawpa pahmôhpi ta ao paro ngaitapa ta, “Vâlyuhchâpa pathôh ta chiahmie ama vaw tô awpa pyuzy vâta, alei liata a pahrâpazy cha ama hu a po na, ama hu a po na, ama hu a po na!” a tahpa thei na ta.