BIEPHUAH 7 - Mara Bible RV (BSI)

Izarei chyhsa 144,000 chahnaona

¹ Cha hnôhlâ ta alei ki palih liata vâlyuhchâpa papalih a duahpa hmô na ta. Alei chô liata tlyma, tilaipi chô liata tlyma, thokô chô liata tlyma, thlih a pathli lei nawpa ta, alei thlih miapalihpazy cha patu ei ta.

² Vâlyuhchâpa hropa pakha, Khazoh hrohpa chahnaona a chabapa nochhi lâ tawhta a vaw puapa hmô na ta. Ano chata vâlyuhchâpa papalih, alei nata tilaipi parao theina biehneina piepazy hnohta ao paro ngaitapa ta,

³ “Eima Khazohpa chakaotuhpazy ama khi liata eima chahnao hlâlei cha, alei nata tilaipi nata thokô zy parao mâh khuh vy,” tahpa ta awh ta.

⁴ Chatawhcha chahnaopa zie ama reipa kyh thei na ta, Izarei saw chi to tawhta 144,000 chahnaopa ama châ:

⁵ Zudâh chi 12,000, Rubena chi 12,000, Kâdâ chi 12,000,

⁶ Asera chi 12,000, Nâthalai chi 12,000, Manase chi 12,000,

⁷ Simeôna chi 12,000, Livai chi 12,000, Iskâra chi 12,000,

⁸ Zebulawna chi 12,000, Zawsi chi 12,000 nata Benzami chi 12,000 chahnaopa ama châ.

Poh diepa a bupazy

⁹ Cha hnôhlâ ta kaw moh na ta, râh to, chi to, phopi to nata reih to tawhta zawpi hluh ngaitapa, ahy hmahta rei tiah leipazy cha poh diehpa a bupa nata thiahrâ kuah chabapa ta, beidyuchhai hmiakô liata nata Mietakutaw hmiakô liata amâ duapa hmô na ta.

¹⁰ Chazy chata ao paro ngaitapa ta, “Pachhana cha Beidyuchhai liata a tyuhpa eima Khazohpa nata Mietakutaw eih a châ!” tahpa ta awh ei ta.

¹¹ Vâlyuhchâpa zydua cha beidyuchhai nata machâzy nata hmohrohneipa miapalihzy chadôpa ta a duah ei ta, beidyuchhai hmiakô liata â khu lâta pao ei ta,

¹² “Amen! Reithaina, rônahna, sona, alyna biereina, palyupalihna, hmotaotheina nata thatlôna zy cha chhâzaw nata tlyzaw ta eima Khazohpa hnohta y mawh sy! Amen,” tahpa ta Khazohpa a chhy ei ta.

¹³ Machâ hry liata pakha ta ei hnohta, “He poh diehpa a bupazy he ahyzy ma ama châ, khataih tawhta a vypa ma ama châ?” tahpa ta na hiahri ta.

¹⁴ Kei ta a hnohta, “Pâpuh, pahno va na, nâ ta tlao na pahno,” tah na ta. Ano ta ei hnohta, “Hezy he rietheipasana ru ngaitapa tawhta a vaw puapazy ama châ hih. Ama pohzy Mietakutaw thisaih ta pasupa ta ama padiehsa haw.

¹⁵ “Chavâta âmo cha, Khazohpa beidyuchhai hmiakô liata y ei ta, Chhô nah zâ ta ano Achhyna o liata ama chakao tyh; Beidyuchhai liata a tyuh aw ei ta, A ypâna ta a khu aw ei.

¹⁶ Ama nodi khao leipa aw ta, Ama dâhphi khao aw vei; Noh ta âmo vawh leipa aw ta, Noh lona ta ama rie pathei khao aw vei.

¹⁷ Beidyuchhai liah liata a tyuhpa cha, Âmo vaituhpa a châ aw; Hrona tihnawhzy lâ âmo a chhi aw ta, Ama mo liata mothlih zydua Khazohpa ta a hru khai aw,” tah ta.