BIEPHUAH 6 - Mara Bible RV (BSI)

Chahnaona miasari

¹ Chatawhcha Mietakutaw ta chahnaona miasari hry liata miakha a pathlâ nota hmô na ta, hmohrohneipa miapalihzy hry liata miakha ta tôkalôhpa a thuapa hawhta, “A vy teh!” a tahpa thei na ta.

² Kaw moh na ta, arâ râhpa hmô na ta. A chô liata a kiahpa cha libaw a chaba ta, a hnohta lakho piepa châ ta, pahnietuhpa châ awpa nata pahnie lymâ awpa ta pua ha ta.

³ Chahnaona mianona a pathlâpa nahta, hmohrohneipa mianona ta, “A vy teh!” a tahpa thei na ta.

⁴ Arâ hropa, asaihpa vaw pua ta. A chô liata a kiahpa cha, chyhsazy âmo nata âmo pathiesa ta, khizaw tawhta adyhna lapapua awpa ta pasaina piepa châ ta, a hnohta zaozi laipa piepa a châ.

⁵ Chahnaona miathôhna a pathlâpa nahta, hmohrohneipa miathôhna ta, “A vy teh!” a tahpa thei na ta. Kaw moh na ta, arâ vyhpa hmô na ta. A chô liata a kiahpa cha khopathliahna bao kha a chaba ta.

⁶ Hmohrohneipa miapalihzy hry tawhta ao a lyupa vaw pua ta, “Âtâ sâh saikhua kha mâ cha dinâri tlaw kha châ ta, bâli sâh saikhua thôh mâ cha dinâri tlaw kha a châ. Sathaw nata kresawhti deikua parao khah y!” tahpa ta a reipa thei na ta.

⁷ Chahnaona miapalihna a pathlâpa nahta, hmohrohneipa miapalihna ao ta, “A vy teh!” a tahpa thei na ta.

⁸ Kaw moh na ta, arâ peipa hmô na ta, a chô liata a kiahpa moh cha Thina châ ta, a hnôh lâta Athihkhih ta vaw pazi ta. Khizaw zydua he su palih ta pachhaih ta su kha cha, zaozi, chakâhna, hri nata alei liata sahrâhpazy hmâpa ta thie awpa ta, ama hnohta biehneina piepa a châ.

⁹ Chahnaona miapangawhna a pathlâpa nahta, Khazohpa bie vâta nata pahnokheina bie amâ duakheipa vâta ama thiepazy thlahpa maisâh ry liata hmô na ta.

¹⁰ Âmo chata, “Hy Abeipa Chônôchaipa, pathaihpa nata adopa, khachâ ma alei chô liata a pahrâpazy chô liata eima thisaih phuh la leipa ta y aw chi ta, âmo cha pachia leipa ta na y aw tly?” tahpa ta ao paro ngaitapa ta awh ei ta.

¹¹ Ama hnohta poh diehpa pie chyu ei ta, ama chakaolâhpazy nata ama unawhzy âmo hawhta thie khaipa ama châ hlâlei, bohpi leipa chhôh a pahâ chy awpa ta chhopa ama châ.

¹² Chahnaona miacharuna a pathlâ nahta, kaw moh na ta, alo thata a vaw sih ta. Noh cha latho poh hawhta vaw vyh ta, thlâpâ chhao thisaih hawhta saih khai ha ta.

¹³ Avâ liata awhsizy chhao, theiku kô thlihpi ta chanaoh ta, a thei heipazy a zôpa hawhta, alei lâ za tla ei ta.

¹⁴ Avâ cha châbu chatypa hawh tlai ta vaw lei ha ta, tlâhpi nata liahpahlô to chhao ama yna tawhta pasiepa ta y khai ha ei ta.

¹⁵ Chatanachata lei beizy, molaipazy, pheisaih hyutuh chaipazy, hneirôhpazy, thatlôpazy, sei nata khotalaipazy, chyhsa to cha lôpuzy liata nata tlâhpi liata lôpanôzy liata a nyu ei ta,

¹⁶ tlâhpizy nata lôpanôzy hnohta, “Miah vi u la, beidyuchhai liata atyuhpa hmiakô tawhta nata Mietakutaw hiehâhna tawhta miah nyu teh u.

¹⁷ Ama hiehâhna noh rarôh y ngaitapa vaw tlô ha ta, ahy ma a duah thei aw?” tah ei ta.