BIEPHUAH 5 - Mara Bible RV (BSI)

Châbu chatypa nata Mietakutaw

¹ Chatawhcha beidyuchhai liata a tyuhpa ku chachâh lâta châ chatypa, a hmia a hnôh ta ropa, chahnaona miasari ta chahnaopa hmô na ta.

² Vâlyuhchâpa thatlôpa ta ao paro ngaitapa ta, “Châ chatypa he pahy ta a chahnaonazy a pathlâ tlâhpa ahy ma a y?” tahpa ta tlâh a awpa hmô na ta.

³ Châbu chatypa a pathlâ awpa tlyma, a chhôh lâ a moh awpa tlyma, vârâh liata pakha hmah y leipa ei ta, alei liata y hra leipa ei ta, alei ry liata chhao pakha hmah y veih ei.

⁴ Châbu chatypa a pahy tlâhpa tlyma, a chhôh lâ a moh tlâhpa tlyma, pakha hmah ama y leipa vâta thata cha na ta.

⁵ Chatawhcha machâ pakha ta ei hnohta, “Cha khao khah y, moh teh, Zudâh chi chakeibarôhneipa, Dâvi Thari ta, châbu chatypa pahy awpa nata a chahnaona miasari pathlâ awpa ta a pahnie haw,” tah ta.

⁶ Chatawhcha beidyuchhai nata hmohrohneipa miapalihzy likawh liata machâzy hry liata Mietakutaw a duahpa hmô na ta, Mietakutaw cha thie chiehpa lyu ta, ki miasari nata mokhaoh miasari a hnei. Mokhaoh miasarizy cha, alei chô zydua liata tuapa Khazohpa Thlahpa pasarizy ama châ.

⁷ Mietakutaw cha vawh ta, beidyuchhai liata a tyuhpa ku chachâh lâta châbu chatypa cha kei la ta.

⁸ Châbu chatypa a lapa nahta, hmohrohneipa miapalih nata machâ pakih nata papalihzy cha, totâ nata ngôh ropahâhpa ta a biepa ngôh biebuh a chaba chyupa ta, Mietakutaw hmiakô liata pao ei ta. Cha ropahâhpazy cha mopathaihpazy thlahchhâna a châ.

⁹ Chatawhcha âmo chata, “Nâ cha châbu chatypa a la tlâhpa châ chi ta, A chahnaonazy a pathlâ tlâhpa na châ. Thiepa ta y chi ta, Na thisaih ta, Chi to nata reih to, Phopi to nata râh to zy cha, Khazohpa châta na chatlai ha ei.

¹⁰ Âmo cha eima Khazohpa châta khinarâh ta padua chi ta, Theihthaipazy ta na tao ei; Alei liata ryu ama reih aw,” tahpa ta hla thiehpa ma sa ei ta.

¹¹ Chatawhcha kaw moh na ta, beidyuchhai nata hmohrohneipazy nata machâzy chheipâh liata vâlyuhchâpa hluhpi ao thei na ta, ama hluhzie cha thysâh hluhpi ama châ.

¹² Chazy chata ao paro ngaitapa ta, “Mietakutaw thie chiehpa cha, Hmotaotheina nata hneirôna zy, Sona nata thatlôna zy, Palyupalihna nata rônahna zy, A to tlâh châ ta, Reithaina a to tlâh chhao a châ!” tahpa ta reithai ei ta.

¹³ Chatawhcha avâ nata alei nata alei ry nata tilaipi liata a ypa hmotaopa to nata ama chhôh liata a ypa zydua ta, “Beidyuchhai liata a tyuhpa nata Mietakutaw hnohta, Reithaina nata palyupalihna zy, Rônahna nata thatlôna zy, Chhâzaw nata tlyzaw ta y mawh sy,” tahpa ta ama reithaipa thei na ta.

¹⁴ Hmohrohneipa miapalihzy ta, “Amen!” tah ei ta, machâzy cha a khu ei ta, Mietakutaw cha a chhy ei ta.