BIEPHUAH 22 - Mara Bible RV (BSI)

Hrona chavah

¹ Chatawhcha vâlyuhchâpa ta hrona ti chavah, lôsôhpa pasohpa hawhta a patliepa, Khazohpa nata Mietakutaw beidyuchhai tawhta a vaw lohpa na pahmô ta.

² Khihpi lâlai liah liata loh ta. Chavah ngiahkâ chavei chachâh ta, thei chi hrawh hleino a hneipa, thla chareih ta a patheipa hrona tho pyuh ta. Thohnazy cha phopizy tlâh nawpa a châ.

³ Cha khihpi liana cha chhiesana rai y khao leipa aw ta, Khazohpa nata Mietakutaw beidyuchhai tlao y aw ta, a chakaotuhpazy ta ano cha amâ chhy aw.

⁴ A hmia hmô aw ei ta, ama khi liata a moh â choh aw.

⁵ Zâ y khao leipa aw ta, meiôh khaihpa nata noh khaihpa a ngiah khao aw veih ei. Abeipa Khazohpa cha ama khaihpa châ aw ta, chhâzaw nata tlyzaw ta ryu ama reih aw.

Zisu â vy patoh aw

⁶ Chatawhcha vâlyuhchâpa ta, “He biezy he ngâchhih ta â do. Abeipa, hrohsopazy thlahpa Khazohpa ta hmo thlai a vaw tlô awpazy cha a chakaotuhpazy pahmô awpa ta a vâlyuhchâpa a vaw tuah,” tahpa ta na chho ta.

⁷ Abeipa Zisu ta,“Nathlie teh, ei vy patoh aw. He châbu chhôh liata hrohsona biezy a pyhpa cha a nohlao na,” tah ta.

⁸ Kei, Zawhâna he, cha hmozy a theituhpa nata a hmôtuhpa ei châ. Cha hmozy cha theipa ta ei hmô nahta, nâ pahmôtuhpa vâlyuhchâpa cha a chhy awpa ta, a phei thaby liata kei pao na ta.

⁹ Châhrasala ano ta ei hnohta, “Khata tao khah y! Kei cha nâ nata na unawhpa hrohsopazy nata he châbu biezy a pyhtuhpazy chakaolâhpa mah ei châ tâh. Khazohpa tlao a chhy teh,” na tah ta.

¹⁰ Chatawhcha vâlyuhchâpa ta, “He châbu liata hrohsona biezy he phih khah y, a daihti â hnia haw.

¹¹ Moleipa cha moleina hmo tao lymâ sala, chyhsa puapa cha a puapa ta y lymâ sala, mosiapa cha a siapa ta y lymâ sala, mopathaihpa cha pathaihpa ta y lymâ mawh sy,” tahpa ta na chho ta.

¹² Abeipa Zisu ta,“Nathlie teh, ei vy patoh aw. Chyhsa to ama hmotaopa lymâ hawhta pie awpa lymâ ei hnohta a y.

¹³ Kei he Alphâ nata Ômekâ, hmiatuapa nata hnôhchaipa, âthaona nata achhâna ei châ.

¹⁴ “Ama chysiazy a pasupa cha ama nohlao na. Hrona tho chô liata biehnei thei aw ei ta, chhikaozy lâ tawhta khihpi chhôh lâ amâ ngia thei aw.

¹⁵ Izy, dyuthaipazy, sihryhpazy, lianycheihpazy, nothlahpa a chhypazy nata haipa bie rei a pahâhpazy deikua cha, khihpi khôtho liata ama y aw.

¹⁶ “Kei, Zisu ta, he biezy he Awnanopazy pahnosa awpa ta ei vâlyuhchâpa nâmo lâ ei vaw tuah. Dâvi thari nata a pathla, deiva awhsi khaih ngaitapa ei châ,” tah ta.

¹⁷ Thlahpa nata Myuhthieh ta, “A vy mah y,” tah ei ta. A theipa maihta, “A vy mah y,” tah mawh ei sy. Dâhphipa maih a vy sala, a khohpa maihta hrona ti he a saipa ta doh mawh sy.

¹⁸ He châbu liata hrohsona biezy a theipa maih zikyu ei râ ei. Ahy rai ta he biezy he a baichha khiahta cha, he châbu liata potlana palâsapazy he Khazohpa ta a chô liata a baichha aw.

¹⁹ Ahy rai ta he hrohsona châbu liata biezy he a thy bâ khiahta cha, he châbu liata palâsapa hrona tho nata khihpi pathaihpa liata a tovyuh cha Khazohpa ta a lapa aw.

²⁰ He biezy a reihtuhpa ta, “Ei vy patoh tlai aw,” a tah. Amen. A vy mah y, Beipa Zisu!

²¹ Abeipa Zisu ngiachhiena cha mopathaihpa zydua hnohta y mawh sy. Amen.