BIEPHUAH 21 - Mara Bible RV (BSI)

Avâ thiehpa nata alei thiehpa

¹ Chatawhcha avâ thiehpa nata alei thiehpa hmô na ta. Avâ hmiatuapa nata alei hmiatuapa cha lei ha ta, tilaipi chhao y khao vei.

² Chatawhcha khihpi pathaihpa, Zerusale thiehpa hmô na ta. Myuhthieh ta a vahpa châta a tobi ta, a mâ chiehpa ta a ypa hawhta, avâ liata Khazohpa tawhta za chô ta.

³ Beidyuchhai tawhta ao paro ngaitapa ta, “Moh teh u, Khazohpa pahrâna cha chyhsa hry liata a vaw y haw. Ama hnohta pahrâ aw ta, a chyhsazy ama châ aw. Khazohpa tlai cha ama hnohta y aw ta, ama Khazohpa a châ aw.

⁴ Ama mo liata mothlih zydua a hru khai aw. Hmo parohpazy a lei hapa vâta, thina y khao leipa aw ta, mâchhiesana, chana nata pasana zy y khao aw vei,” tahpa ta a reipa thei na ta.

⁵ Beidyuchhai liata a tyuhpa ta, “Moh tua, hmo to a thiehpa ta ei tao haw,” tah ta. “Roh teh, he biezy he ngâ a chhih ta â do,” tah heih ta.

⁶ Chatawhcha ei hnohta, “A ngoh haw! Kei he Alphâ nata Ômekâ châ na ta, âthaona nata achhâna ei châ. Dâhphipa hnohta hrona tihnawh tawhta ti a saipa ta ei pie aw.

⁷ Pahnietuhpa cha he ryu he a to aw. A Khazohpa châ aw na ta, ei saw a châ aw.

⁸ Riahchhiepazy, ngiapâleipazy, pasichhihpazy, lianycheihpazy, sihryhpazy, dyuthaipazy, nothlahpa achhypazy nata haiphiahpa zydua to awpa deikua cha, mei nata kaih ta a kâ ngâpa tipo châ aw ta, cha cha thina einona a châ,” tah ta.

Zerusale thiehpa

⁹ Chatawhcha vâlyuhchâpa pasari hry liata pakha, potlana hnôhchaipa miasari ta a biepa biebuh miasari a chabapa vâlyuhchâpa a vy ta, ei hnohta, “A vy teh, myuhthieh, Mietakutaw lapinô cha ei cha pahmô aw,” na tah ta.

¹⁰ Thlahpa ta tlâh laipa nata a sâhpa lâ nâ chhi ta, khihpi pathaihpa Zerusale cha vârâh liata Khazohpa tawhta a za chô haipa na pahmô ta.

¹¹ Khazohpa rônahna hnei ta, a khaihnazie cha lôsôh ngaitapa zaspi lô hawhta châ ta, lôsôhpa pasohpa hawhta patliepa a châ.

¹² Thokhy rônahpa nata a sâhpa hnei ta, chhikao miahrawh hleino hnei ta, chhikao thabyzy liata vâlyuhchâpa pahrawh hleino y ei ta, chhikaozy liana cha Izarei pathla chi hrawh hleinopazy moh ropa a châ.

¹³ Nochhi lâ chhikao miathôh, maw lâ chhikao miathôh, chho lâ chhikao miathôh, notla lâ chhikao miathôh y ta.

¹⁴ Khihpi thokhy cha lôbô miahrawh hleino hnei ta, chazy liata Mietakutaw lyuhchâpa pahrawh hleino mohzy a choh ta.

¹⁵ Bie nâ chhotuhpa vâlyuhchâpa cha khihpi nata a chhikaozy nata a thokhy cha thlie nawpa ngôh lohthi hnei ta.

¹⁶ Khihpi cha ki palih hnei ta, a doh nata a hâ a khopa a châ. Khihpi cha lohthi ta thlie ta, lyu 12,000 châ ta, a doh, a hâ nata â sâhna lâ â kho khai.

¹⁷ A thokhy dôhpa cha thlie heih ta, chyhsapa thliezie ta dy 144 châ ta, cha cha vâlyuhchâpa thliezie a châ hra.

¹⁸ A thokhy cha zaspi lô ta dôhpa châ ta, khihpi cha thlalâ pasohpa hawhta ngôh suapa ta taopa a châ.

¹⁹ Khihpi thokhy abônazy cha lôsôhpa chi to ta tobipa a châ. Abôna miakhana cha zaspi châ ta, mianona saphai, miathôhna kalisidôni, miapalihna emerâ,

²⁰ miapangawhna sadôni, miacharuna sâdi, miasarina krisôlite, miachariena beri, miachakina tôpazi, miahrawhna krisôparase, hleikhana zasi nata hleinona amethi lôzy ta tobipa a châ.

²¹ Chhikao miahrawh hleino cha taikulô miahrawh hleino ta taopa châ ta, chhikao to cha taikulô miakha hmâpa ta taopa a châ. Khihpi lâlai cha ngôh suapa ta taopa châ ta, thlalâ mopahlie theipa hawhta a châ.

²² Achhyna o deikua khihpi chhôh liata hmô va na, Abeipa Khazohpa Atotaotheipa nata Mietakutaw cha khihpi Achhyna o a châpa vâta.

²³ Khihpi pakhaihsa awpa ta noh a ngiah leipa ta, thlâpâ chhao a ngiah hra vei, Khazohpa rônahna ta pakhaihsa ta, Mietakutaw cha a meiôh a châ.

²⁴ A khaihna liata phopizy charei aw ei ta, lei beizy ta ama rônahna amâ ngiakhei aw.

²⁵ Nohchhô ta a chhikaozy khawpa châ beih leipa aw ta, cha liata zâ y aw vei.

²⁶ Phopizy ta ama rônahna nata zachhihna cha khihpi liata amâ ngiakhei aw.

²⁷ Hmo puapa deikua cha kheihawhpa hmah a ngia thei aw vei. Hmo pasichhihpa a taopa nata haipa bie a reihpa ahy hmah a ngia thei hra aw veih vei. Mietakutaw hrona châbu liata moh ropazy deita ta amâ ngia thei aw.