BIEPHUAH 20 - Mara Bible RV (BSI)

Kô sâh ryureina

¹ Chatawhcha vârâh tawhta vâlyuhchâpa pakha a za chôpa hmô na ta. Leichiepa khaohtlô châhbi nata bâlia laipa a ku liata a chaba ta.

² Drâkao parih hlôpa, ahripa nata Sâtâ cha patu ta, kô sâh kha châta chahry ta.

³ Leichiepa khaohtlô liata za thy ta, kô sâh kha a tloh hlâlei phopizy a dôvei khao lei nawpa ta, khaohtlô cha khawhlôh ta, pachawhpâ ha ta. Cha khai tawhta bohpi leipa chhôh pathlie chypa a châ aw.

⁴ Chatawhcha beidyuchhaizy hmô na ta, a chô liata a tyuhpazy cha ryurei awpa ta biehneina piepa châ ei ta. Zisu bie nata Khazohpa bie vâta luh taipazy thlahpa, sahrâhpa nata a nothlahpa a chhy leipa nata ama khi liata tlyma, ama ku liata tlyma, ngiana a hnei leipazy thlahpa chhao hmô na ta. Cha sahlao cha vaw hroh ei ta, kô sâh kha chhôh Krista ryureilâh ei ta.

⁵ Athihpa hropazy deikua kô sâh kha a tloh hlâlei cha hroh mâh veih ei. Cha cha thyuheihna eikhana a châ.

⁶ Thyuheihna eikhana liata a hlaopazy cha nohlao ei ta, ama pathaih. Thina einona ta ama chô liata biehnei khao aw vei. Khazohpa nata Krista theihthaipazy châ aw ei ta, a hnohta kô sâh kha ryu ama reih aw.

Sâtâ pahniepa a châ

⁷ Kô sâh kha a lei tawhta, Sâtâ cha patâhna tawhta pathliepa châ aw ta,

⁸ alei ki palih liata phopizy dôvei awpa ta pua aw ta, Kawkâ nata Makawkâ zy cha adyuhna châta a awpakhy aw. Ama maluh hluhzie cha tilaipi liata sadi hawhta a châ.

⁹ Alei chô zydua hrâsie ei ta, mopathaihpazy riehmo nata khihpi kho ngaitapa cha chadô ei ta. Châhrasala avâ tawhta mei za tla ta, a kâ khai ha ei.

¹⁰ Âmo dôveituhpa ahripa cha, sahrâhpa nata hrohso pakheipa yna mei nata kaih tipo liata thypa châ ta, chhô nah zâ ta chhâzaw nata tlyzaw ta pasa pataosapa a châ aw.

Beidyuchhai diehpa rônahpa hmiakô liata pachiana

¹¹ Chatawhcha beidyuchhai diehpa rônahpa nata a chô liata a tyuhpa hmô na ta. A hmiakô tawhta alei nata avâ a râ ei ta, âmo châta su rai y khao vei.

¹² Beidyuchhai hmiakô liata molaipa nata mochyhpa athipazy a duahpa hmô na ta, châbuzy pahypa a châ. Châbu hropa, hrona châbu chhao pahypa châ ta. Athihpazy cha châbuzy liata ropa hawhta, ama hmotaozie lymâ hawhta pachiapa ama châ.

¹³ Tilaipi ta a chhôh liata athihpa a ypazy papuasa ta, Thina nata Athihkhih ta ama chhôh liata athihpa a ypazy papuasa hra ei ta, chyhsa to ama hmotaopa lymâ hawhta pachiapa ama châ.

¹⁴ Chatawhcha Thina nata Athihkhih cha mei tipo liata thypa châ ta. Cha mei tipo cha thina einona a châ.

¹⁵ Ahy rai hrona châbu liata a moh ropa hmô awpa a y leipa cha, mei tipo liata thypa a châ.