BIEPHUAH 2 - Mara Bible RV (BSI)

Ephesi Awnanopa hnohta bietapa

¹ “Ephesi Awnanopa vâlyuhchâpa hnohta hetana heta roh teh: ‘A ku chachâh lâta awhsi miasari chaba ta, ngôh meiôh patyuna miasarizy hry liata a hlai ngâpa khata he biezy he a reih.

² “‘Na hmotaopa, na hriapasazie, na tao hualuazie nata chyhsa moleipa na chhyh thai leizie zy ei pahno. Lyuhchâpa châ tlôh leipa ta lyuhchâpa â tahpazy pasia chi ta, a haihpa ama châ tahpa na pahno.

³ Tao hualua chi ta, ei moh vâta pasa tao chi ta, châhrasala panao va chi tahpa chhao ei pahno.

⁴ Châhrasala pasina ei cha hnei, na kyhpachâ hmiatuapa na bâhsaipa vâta.

⁵ Chavâta na paosai hapa kha a thei la, ro la, hmiatua ta na tao tyhpa hmozy kha tao heih mah y. Chataleipatala nâ lâ a vy aw na ta, na ro vei khiahta cha, na meiôh patyuna kha a su tawhta ei pasie aw.

⁶ Nikôla py hmotaopazy nâ haopa kyh liata deikua cha, na tao pha kaw. Cha cha kei chhao ta ei hao hra.

⁷ Thlahpa ta Awnanopazy hnohta bie a reipa he, nakhaoh a hneipa ta cha thei mawh sy. Pahnietuhpa cha Khazohpa pârâdi liata hrona tho theilâpa nie awpa ei pasai aw,’ a tah na,” tahpa ta.

Smynâ Awnanopa hnohta bietapa

⁸ “Smynâ Awnanopa vâlyuhchâpa hnohta hetana heta roh teh: ‘Âthaona nata achhâna, thi ha ta, a vaw hroh heihpa khata he biezy he a reih.

⁹ “‘Na pasataozie nata na dyhchhiezie zy ei pahno. Châhrasala hneirôhpa na châ. Zu hmeiseihpa châ tlôh leipa ta Zu â tahpa, Sâtâ pakhyna o a châpazy ta ama cha reipachhiena chhao ei pahno.

¹⁰ Pasa na tao awpazy chi khah y. Pachâ tua, ahripa ta nama hry liata chyhsa thokha patâhna o liata a cha khô aw ei. Pasiapa ta y aw ei chi ta, noh hrawh chhôh rietheipasa nama tao aw. Thina taihta ngâchhihpa ta y mah y, hrona lakho ei cha pie aw.

¹¹ Thlahpa ta Awnanopazy hnohta bie a reipa he nakhaoh a hneipa ta cha thei mawh sy. Pahnietuhpa cha thina einona ta pasasa aw vei,’ a tah na,” tahpa ta.

Pekamu Awnanopa hnohta bietapa

¹² “Pekamu Awnanopa vâlyuhchâpa hnohta hetana heta roh teh: ‘Zaozi hâh no tiahpa a hneipa khata he biezy he a reih.

¹³ “‘Na pahrâna, Sâtâ beidyuchhai yna ei pahno. Châhrasala ei moh khâchâ patu chi ta, ei bie pahnotuhpa ei chyhsa ngâchhihpa Antipâ kha, Sâtâ pahrâna liata nama hry liata ama thie nona khata, einâ ngiapâna chi a paphasai va chi.

¹⁴ Châhrasala pasina chyhta ei cha hnei. Nama hry liata chyhsa thokha Bâlâma pachuna khâchâ a patupazy y ei ta. Bâlâma cha Izarei sawzy hmiakô liata achapiana lô so awpa ta Bâlâka a pachutuhpa châ ta, Izarei sawzy cha nothlahpa lâta hlâpa niedozy paniesa ta, apatlana moleina pataosa a chhuahpa kha a châ.

¹⁵ Nâ chhao Nikôla py pachuna a pyhtuhpazy na ylâh hra.

¹⁶ Chavâta ro mah y. Chataleipatala nâ lâ a vy patoh aw na ta, ei pakah zaozi ta âmo cha ei vaw dyuh aw ei.

¹⁷ Thlahpa ta Awnanopazy hnohta bie a reipa he nakhaoh a hneipa ta cha thei mawh sy. Pahnietuhpa hnohta mânâ nyupa pie aw na ta, lô ngyuhpa chhao ei pie aw. Cha alô chô liata moh thiehpa ropa châ ta, cha cha a totuhpa dei leipa ta cha ahy hmahta pahno veih ei,’ a tah na,” tahpa ta.

Thiatirâ Awnanopa hnohta bietapa

¹⁸ “Thiatirâ Awnanopa vâlyuhchâpa hnohta hetana heta roh teh: ‘Khazohpa Sawchapawpa, meipaleih hawhpa mokhaoh a hneipa, a pheipazah dawh patliepa a lyupa khata he biezy he a reih.

¹⁹ “‘Na hmotaopa, na kyhpachâna, nâ ngiapâna, na chakaona nata na tao hualuana zy ei pahno. Hnôhlâ ta na taopa hmozy cha na tao tuapazy hlâta a pha via tahpa chhao ei pahno.

²⁰ Châhrasala pasina ei cha hnei, Zezebel ama tahpa, anosasyh ta hrohsonô ta â reihpa chanô na chhyh thaipa vâta. Ano cha sihryh awpa nata nothlahpa atheihna pati nie awpa ta nâ chakaotuhpazy pachu ta, a no leipa lâta a paviasa tyhpa a châ.

²¹ A ro nawpa ta daihti pie na ta, châhrasala a sihryhna cha ro khoh vei.

²² Moh teh, ano cha tlâhleipa rakhô liata thy aw na ta, ano a pheikheituhpazy chhao, ama hmotaopazy ama ro vei khiahta cha, riethei pasataona rarôh ypa liata ei thy hra aw ei.

²³ A sawzy tusao aw na ta, chatanachata kei cha pachâna nata palôh mohtuhpa ei châ tahpa Awnanopa zydua ta ama pahno aw. Nama hmotaopazy lymâ hawhta ei cha pie aw ei.

²⁴ Nâmo, Thiatirâ liata a ypa mohropazy, Zezebel pachuna a pyh leipa ta, Sâtâ hmo athupa ama tahpa kyh a chu leipazy deikua cha, ei cha chho ei. Nâmo la phaohri hropa khâpa hmah cha pahnieh thlu aw veih ei na.

²⁵ Nama hnei chiehpa deikua kha, ei vy hlâlei khâchâ patu ha muh vy.

²⁶ Pahnietuhpa nata ei hmotaopazy a chhâna taihta a pyhtuhpa cha phopizy chô liata biehneina ei pie aw.

²⁷ Ei paw tawhta biehneina ei hmôpa hawhna heta, biehneina ei piepa chyhsa chata thua chôchahrei ta ama chô liata ryureih aw ta, alei beihzy pakeichheihpa hawhta a pakeichheih aw ei.

²⁸ Deiva awhsi cha ano ei pie aw.

²⁹ Thlahpa ta Awnanopazy hnohta bie a reipa he, nakhaoh a hneipa ta cha thei mawh sy,’ a tah na,” tahpa ta.