BIEPHUAH 18 - Mara Bible RV (BSI)

Babylaw paona

¹ Cha khai tawhta vâlyuhchâpa hropa avâ tawhta a zâ chôpa hmô na ta. Biehneina lai ngaitapa hnei ta, a rônahna ta alei pakhaihsa khai ha ta.

² Vâlyuhchâpa chata ao thatlô ngaitapa ta, “A pao haw, Babylaw rônahpa a pao haw! Ahripazy pahrâna, Thlahpa puapa to ahrâhna, Pavaw puapa to pahrâna, Hmo puapa nata pasichhihpa to atohna Khihpi lâta â lie haw.

³ A sihryhna kresawhti doh ei ta, Phopi zydua ama pari khai haw; Lei beizy ta sihryhkhei ei ta, Lei liata sôhpalietuhpazy ta hneirôhkhei ei ta, A phasana hro ama hneirôhkhei,” tahpa ta awh ta.

⁴ Chatawhcha avâ tawhta ao hropa thei na ta, ao chata, “Hy ei phopi, Ano tawhta vaw pua teh u; Chataleipatala a moleinazy liata a hlao pathlei aw ei chi ta, A potlana liata namâ hlao pathlei aw na.

⁵ A moleinazy avâ taihta a pacho ta, A paraonazy Khazohpa ta â thei thlâh haw.

⁶ Chyhsazy viari a thô tyhpa hawhta, Ano chhao viarithô u la, A hmotaopazy a lie no ta viarithô teh u; A do awpa pahlaona nyu cha, A lie no ta pahlaopa teh u.

⁷ Anosasyh ta a parônahsa ta, Phasapa ta a y tyhpa kha, Â phuhpa ta pasa pataosa u la, Mâchhie pasasa teh u; A palôh ta, ‘Beinô ta ei tyuh, Nôhmei châ va na, Mâchhiesa beih aw va na,’ Tahpa ta reih tlôh ta.

⁸ Chavâta noh kha chhôh tlai ta, Potlanazy ta a vaw tlô thlu aw; Thina nata mâchhiesana chakâhna vaw tlô thlu aw ta, Mei ta pakâ khaipa a châ aw; Ano a pachiatuhpa Abeipa cha, Khazohpa thatlôpa châ tlôh ta,” tah ta.

⁹ A sihryhkhei tyhpa nata phasana ta a hrolâh tyhpa lei beizy ta Babylaw khihpi mei ta a kâpa khuh ama hmô nahta, chakhei aw ei ta, chaphôh ama tupa aw.

¹⁰ A pasataona chipa ta, lâhlapi ta a duah aw ei ta, hetana heta ama tah aw: “Cha rimâ cha! Cha rimâ cha! Nâ, khihpi rônahpa, Nâ, khihpi thatlôpa, Hy Babylaw khihpi! Dawh kha chhôh ta, Na rao khai ha he zaw.”

¹¹ Lei liata sôhpalietuhpazy cha, ahy hmah ama hmo ama chalei khao leipa vâta, Babylaw cha chakheipa ta mâchhiesa ei ta.

¹² Ama hmo zuapa ngôh, tâkâ, lôsôhpa, taikulô, poh rihdipa, poh nohsaihpa, pu pala, poh saihlawpa, tho ropahâhpa to, sianaoh ta taopa hmobaoh to, tho sôhpa, dawh, thua nata awhlôteihpa ta taopa hmobaoh to,

¹³ lôiasohpa, ia-ô, ropahâhpa raopa, myrâ, sathaw ropahâhpa, kresawhti, sathaw, viahdie dipa, âtâ sâh, viahchao nata mietaku, arâ nata talailih zy nata sei ta chyhsa hrona ama zuapazy a chalei awpa y khao veih ei.

¹⁴ “Na tlaichhaipa theilâpa ta cha siesai ha ta, Na hneirôna nata na laiphanazy a lei khai haw; Hmô heih khao aw va chi!”

¹⁵ Cha hmozy ta sôhpalie ei ta, ano vâta a hneirôhpa sôhpalietuhpazy cha, a pasataona chipa ta lâhlapi ta a duah aw ei ta, hetana heta ao paro ngaitapa ta cha aw ei ta, chaphôh ama tu aw:

¹⁶ “Cha rimâ cha! Cha rimâ cha! Khihpi rônahpa, Poh rihdipa a bu ta, Poh nohsaipapa nata poh saihlawpa a bupa ta, Ngôh nata lôsôhpa ta a tobi ta, Taikulô ta a tobipa khihpi!

¹⁷ Dawh kha chhôh ta, A hneirôna zydua a lei khai ha he zaw!” Balyh hyutuhpa zydua nata balyh ta khitlyhpa zydua, balyh puhpazy nata tilaipi chô liata sôhpalietuhpa zydua cha Lâhlapi ta a duah ei ta,

¹⁸ Babylaw kâpa khuh cha saina chôta, “He hawhta khihpi rônahpa he, Khâpa khih ma a y aw?” tahpa ta awh ei ta.

¹⁹ Ama luh liata buchadoh a mia ei ta, awh ei ta, hetana heta chapa ta mâchhie ama sâ: “Cha rimâ cha! Cha rimâ cha! Khihpi rônahpa, A hneirôna hmâpa ta, Tilaipi balyh hneituhpazy A pahneirôhsapa khihpi! Dawh kha chhôh ta, A lei khai ha he zaw!

²⁰ “Hy avâ, ano vâta a ly la, Nâmo, mopathaihpazy, Nâmo, lyuhchâpazy, Nâmo, hrohsopazy, Ano vâta a ly teh u; Khazohpa ta a chô liata Viari a cha thôpa ha ei hih.”

²¹ Chatawhcha vâlyuhchâpa thatlô ngaitapa ta sâhchariehna lô lai ngaitapa a lyupa alô la ta, tilaipi liata thy ta, hetana heta a tah: “Kha hawhna khata, Babylaw khihpi rônahpa chhao, Pasa kawpa ta thypa châ aw ta, Hmô heihpa châ khao aw vei.

²² Totâ pyu nata pyungiapa pyuzy, Ramo pyu nata chiahmie pyuzy, Na chhôh liata theipa châ khao leipa aw ta, Zôthaipa zôthaina kheihawhpa rai, Na chhôh liata hmôpa châ khao aw vei. Sâh chariehna pyuzy Na chhôh liata theipa châ khao leipa aw ta,

²³ Meiôh khaihna chhao, Na chhôh liata khaih khao aw vei. Myuhneituhpa ao nata myuh aozy chhao, Na chhôh liata theipa châ khao aw vei. Na sôhpalietuhpazy cha, Lei chyhsa rônahpazy châ ei ta, Na dyuthaina ta phopi zydua dôveipa ta ama y.

²⁴ A chhôh liata hrohsopazy thisaih y ta, Mopathaihpazy thisaih chhao y ta, Lei liata thiepa zydua thisaih a y.”