BIEPHUAH 17 - Mara Bible RV (BSI)

Âzuahnô rônahpa nata sahrâhpa

¹ Chatawhcha vâlyuhchâpa pasari hry liata pakha, biebuh miasari a hneipa a vy ta, ei hnohta, “A vy tua, ti hluhpi chô liata a tyuhpa âzuahnô rônahpa pachiana ei cha pamosa aw.

² Ano cha lei beizy ta amâ pheikheipa châ ta, a sihryhna kresawhti ta lei chyhsazy a parisapa a châ,” tah ta.

³ Chatawhcha Thlahpa ta râhchawhpa lâ na siekhei ta, Khazohpa reipachhiena mohzy ta a biepa, luh sari nata ki hrawh a hneipa sahrâhpa saihlawpa chô liata a kiahpa chanô hmô na ta.

⁴ Chanô cha poh nohsaihpa nata saihlawpa a bu ta, ngôh nata lôsôhpa nata taikulô ta a tobi ta, a ku liata hmo pasichhihpa nata sihryhna moleina ta a biepa ngôh nyu a chaba ta.

⁵ A khi liata bienyupa, “Babylaw khihpi rônahpa, sihryhpazy nata lei hmo pasichhihpazy nô,” tahpa ta moh ropa y ta.

⁶ Cha chanô cha mopathaihpazy thisaih nata Zisu mâtyzy thisaih a paripa ta hmô na ta. Ei hmô nahta, ei noâh ngaita ta.

⁷ Châhrasala vâlyuhchâpa ta ei hnohta, “Khazia na no a âh? Kha chanô nata a phaohtuhpa sahrâhpa, luh sari nata ki hrawh a hneipa kyh bienyupa ei cha chho aw.

⁸ Sahrâhpa na hmôpa kha vaw y ta, y khao heih leipa ta, aleichiepa khaohtlô tawhta kaw pua aw ta, leidiana lâ a sie aw. Chatawhcha lei liata a pahrâpazy, leilô tao tua no tawhta hrona châbu liata moh ro leipazy ta, y ha ta, a y khao heih leipa, a vy heih awpa sahrâhpa cha ama hmô tita, noâh ama tah ngaita aw.

⁹ Cha chata sona palôh hnei awpa a byuhzie a palâsa: Luh saripazy kha chanô atyuna tlâh sarizy a châ.

¹⁰ Bei pasari chhao châ ei ta, papangawhzy pao ha ei ta, pakha y ta, pakha hropa cha vaw y mâh leipa ta, a vaw y tita bohpi leipa chhôh a y awpa a châ.

¹¹ Sahrâhpa vaw y ta, a y khao leipa kha a pachariena châ ta, châhrasala pasarizy hry liata a hlao hrapa a châ. Leidiana lâ a sie aw.

¹² Ki hrawh na hmôpazy kha bei pahrawh châ ei ta, anodeikua khinarâh a hnei mâh leipazy ama châ. Châhrasala beizy hawhta dawh kha chhôh sahrâhpa nata hmaohkha ta biehneina ama to aw.

¹³ Palôh miakha phaohpa ta, ama hmotaotheina nata biehneina cha sahrâhpa ama pie aw.

¹⁴ Mietakutaw a dyuh aw ei ta, châhrasala Mietakutaw ta âmo cha a pahnie aw. Mietakutaw cha hyutuhzy Hyutuhpa nata beizy Beipa châ ta, a hnohta a ypazy cha, awpazy, atlyhpazy nata ngâchhihpazy ama châ,” tah ta.

¹⁵ Chatawhcha vâlyuhchâpa ta ei hnohta, “Âzuahnô atyuna ti na hmôpazy kha, phopizy, zawpizy, râhzy nata reihzy ama châ.

¹⁶ Sahrâhpa nata ki hrawh na hmôpazy khata âzuahnô cha amâ hao aw. Roryhrapa nata thluahruapa ta tao aw ei ta, a sa nie aw ei ta, mei ta ama raosao aw.

¹⁷ Khazohpa biezy pakipa a châ hlâlei a hmochhuahpa ama hria thei nawpa ta, Khazohpa ta âmo cha palôh miakha phaoh awpa ta tao ta, amâ beinarâh chhao sahrâhpa hnohta pie khohna palôh a pahneisa ei.

¹⁸ Chanô na hmôpa kha khihpi rônahpa, lei beizy chô liata ryureituhpa a châ,” tah ta.