BIEPHUAH 16 - Mara Bible RV (BSI)

Khazohpa hiehâhna biebuh miasari

¹ Chatawhcha Achhyna o tawhta ao paro ngaitapa thei na ta, ao chata vâlyuhchâpa pasarizy hnohta, “Sie u la, Khazohpa hiehâhna biebuh miasari alei liata patlai teh u,” tah ta.

² Vâlyuhchâpa pakhana cha sie ta, a biebuh cha alei liata patlai ta. Sahrâhpa ngiana a hneipa chyhsazy nata a nothlahpa a chhypazy chô liata hmahchhiepa nata pasana lâta a vaw lie ta.

³ Vâlyuhchâpa panona ta a biebuh cha tilaipi liata patlai ta. Athihpa thisaih lâta a vaw lie ta, tilaipi liata hmohrohneipa zydua thi khai ei ta.

⁴ Vâlyuhchâpa pathôhna ta a biebuh cha chavahzy nata tihnawhzy liata patlai ta. Thisaih lâta a vaw lie ta.

⁵ Ti vâlyuhchâpa ta, “Hy Mo Pathaihpa y, Nâ cha adopa châ chi ta, A y haipa nata a y hapa na châ; Pachiana dopa na vaw tlôkhei haw.

⁶ Mopathaihpazy nata hrohsopazy thisaih palo ei ta, Thisaih lilaw na padosa ha ei; Amâ phuhpa rai a châ!” a tahpa thei na ta.

⁷ Chatawhcha Maisâh tawhta ao vaw pua ta, “A châ na, Hy Atotaotheipa Abeipa Khazoh, Na pachianazy cha a do ta a sia!” tahpa ta â chhypa thei na ta.

⁸ Vâlyuhchâpa papalihna ta a biebuh cha noh liata patlai ta. Mei ta chyhsazy pakâh awpa ta, noh cha hmotaotheina piepa a châ.

⁹ Chatanachata chyhsazy cha ama u khaina taihta noh sah ngaitapa ta pakâhpa châ ei ta, potlana chô liata biehneituhpa Khazohpa moh cha chhiesapa ei ta. Châhrasala ro khoh hlei leipa ei ta, Khazohpa palyupalih veih ei.

¹⁰ Vâlyuhchâpa papangawhna ta a biebuh cha sahrâhpa beidyuchhai liata patlai ta. Sahrâhpa khinarâh cha vaw zoh khai ha ta. Pasa taopa ta ama paleihzy sie ei ta,

¹¹ ama pasana nata hmahzy vâta vârâh Khazohpa cha chhiesapa ei ta. Châhrasala ama hmotaopazy ro khoh hlei veih ei.

¹² Vâlyuhchâpa pacharuna ta a biebuh cha Ufrâti vahpi liata patlai ta. Nochhi beizy châta lâpi a chhuahdy awpa ta, a ti cha kua ha ta.

¹³ Chatawhcha drâkao nata sahrâhpa nata hrohso pakheipa pakahzy tawhta cha-u a lyupa thlahpa puapa pathôh ama vaw puapa hmô na ta.

¹⁴ Chazy cha ahripa thlahpazy châ ei ta, hmonoâhpa a tao tyhpazy ama châ. Khizaw bei zydua lâta sie ei ta, Khazohpa Atotaotheipa noh rônahpa liata adyuhna châta beizy cha ama awpakhy.

¹⁵ “Moh teh u, parutuhpa hawhta ei vy hai! A hrohrua ta, chysia a tobi chiehpa ta a ypa cha a nohlao na. Chataleipatala thluahruapa ta a khie aw ta, chyhsa ta a thluahruana ama hmô pathlei aw!”

¹⁶ Chatanachata ahripa thlahpazy ta khizaw bei zydua cha Hebrai reih ta Harmakedaw ama tahpa su liata awpakhy ei ta.

Biebuh miasarina

¹⁷ Vâlyuhchâpa pasarina ta a biebuh cha aruapa liata patlai ta. Achhyna o liata beidyuchhai tawhta ao paro ngaitapa vaw pua ta, ao chata, “A ngoh haw!” tah ta.

¹⁸ Dôhlazy vaw patlie ta, aozy vaw pua ta, tôkalôhpazy a vaw thua ta, alo thata a vaw sih ta. Alei liata chyhsa y tua rakha tawhta, cha tlu ta a rupa alosihpa y beih vei. Alosihpa rarôh y ngaipa a châ.

¹⁹ Khihpi rônahpa cha su thôh ta a vaw patlaw ta, phopi to khihpizy cha pao ta. Khazohpa ta Babylaw rônahpa cha a thei thlâh ha ta. Chatanachata a hiehâhna ru ngaitapa kresawhti nyu cha a hnohta pie ta.

²⁰ Liahpahlô zydua a râpai ei ta, tlâhzy hmô awpa y khao vei.

²¹ Chatawhcha pareih lai ngaitapa, talent miakha hlei a hripazy chyhsa chô liata za tla ta. Potlana cha a rarôh y ngaitapa vâta, pareih potlana vâta Khazohpa chô liata chhiesa ei ta.