BIEPHUAH 14 - Mara Bible RV (BSI)

Mietakutaw nata a chyhsa 144,000

¹ Chatawhcha kaw moh na ta, Mietakutaw Zaio Tlâh liata a duahpa nata ama khi liata ano moh nata a Paw moh ârohpa, chyhsa 144,000 a hnohta a ypazy hmô na ta.

² Avâ tawhta ao vaw pua ta, tisao lai ngaitapa pyu hawhta nata tôkalôhpa thata a thuapa pyu hawhta thei na ta. Ao ei theipa cha totâ tôthaipazy ta ama totâ ama tôpa pyu hawhta a châ.

³ Beidyuchhai hmiakô nata hmohrohneipa miapalih nata machâzy hmiakô liata hla thiehpa sa ei ta. Alei tawhta chatlaipa chyhsa 144,000 zy dei leipa ta cha, ahy hmahta cha hla cha sa thei veih ei.

⁴ Cha chyhsazy cha chanô liata a papua leipa, chapaw kôpazy ama châ. Mietakutaw siena lâ maih a zituhpazy châ ei ta, Khazohpa châta nata Mietakutaw châta a pathei tua chaipazy châ awpa ta, chyhsa hry tawhta chatlaipazy ama châ.

⁵ Ama pakah tawhta haipa bie thei awpa rai y leipa ta, seina hnei leipazy ama châ.

Vâlyuhchâpa pathôh bietapazy

⁶ Chatawhcha vâlyuhchâpa hropa avâ liata a zaw ngâpa hmô na ta. Ano cha alei liata a pahrâpa râh to, chi to, reih to nata phopi to hnohta phuah awpa tlyzaw thâtihpha a hneipa a châ.

⁷ Ano chata ao paro ngaitapa ta, “Khazohpa chi u la, ano cha palyupalih teh u, a pachiana daihti a vaw tlô haw. Avâ nata alei, tilaipi nata tihnawh a taotuhpa cha a chhy teh u,” tah ta.

⁸ Vâlyuhchâpa hropa, panona ta vaw pazi ta, “A pao haw, Babylaw khihpi rônahpa cha a pao haw. Sihryhna vâta phopi to hiehâhna kresawhti a padosatuhpa cha a pao haw,” tah ta.

⁹ Vâlyuhchâpa hropa, pathôhna ta âmo cha vaw pazi ta, ao paro ngaitapa ta, “Ahy rai sahrâhpa nata a nothlahpa a chhypa ta, a khi liata tlyma, a ku liata tlyma, ngiana a hnei khiahta cha,

¹⁰ Khazohpa hiehâhna kresawhti patapa, a hiehâhna nyu liata khâpa hmah pahlao leipa ta patlaipa cha doh aw ei ta, vâlyuhchâpa pathaihpazy mohmô ta nata Mietakutaw mohmô liata mei nata kaih ta pasa pataosapa ama châ aw.

¹¹ Cha chyhsazy pasataona meikhuh cha chhâzaw nata tlyzaw ta pua aw ta, sahrâhpa nata a nothlahpa achhytuhpazy nata a moh ngiana a hneipa maihzy cha, chhô nah zâ ta apahâna rai hnei aw veih ei,” tah ta.

¹² Cha chata mopathaihpa, Khazohpa biepiepazy nata Zisu angiapâna bie a zyhtuhpazy cha tao hualua awpa a byuhzie a palâsa.

¹³ Chatawhcha avâ tawhta ao ta, “Hetana heta roh teh: Tahmâ tawhta la, Abeipa liata athipazy ama nohlao aw,” a tahpa thei na ta. Thlahpa ta, “A châ na, ama hriapasanazy a pahâsai aw ei ta, ama hmotaopazy ta a zi aw ei!” tah ta.

Lei sâhhriana

¹⁴ Chatawhcha kaw moh na ta, meihdo râhpa hmô na ta. Meihdo chô liana chata chyhsa sawchapawpa a lyupa, a luh liata ngôh lakho a kho ta, a ku liata savâ tiah ngaitapa a chabapa ta a tyuhpa hmô na ta.

¹⁵ Achhyna o tawhta vâlyuhchâpa hropa vaw pua ta, meihdo chô liata a tyuhpa hnohna chata ao paro ngaitapa ta, “Na savâ kha hmâh la, sâh kha tai teh. Tai daihti a tlô haw, lei sâhzy liahsa ama maih haw,” tah ta.

¹⁶ Chatanachata meihdo chô liata a tyuhpa chata a savâ cha alei lâ za pathla ta, alei sâh cha taipa châ ha ta.

¹⁷ Chatawhcha avâ liata Achhyna o tawhta vâlyuhchâpa hropa vaw pua heih ta. Ano chhao savâ tiah ngaitapa hnei ta.

¹⁸ Vâlyuhchâpa hropa, mei chô liata biehneituhpa maisâh tawhta vaw pua ta, savâ tiahpa a hneipa hnohta ao paro ngaitapa ta, “Na savâ tiahpa kha hmâh la, alei liata kre zôh tawhta kre saozy za tai teh, kre theizy liahsa ama hmoh haw,” tah ta.

¹⁹ Chatanachata vâlyuhchâpa ta a savâ cha alei lâ za pathla ta, alei liata kre thei cha tai ta, kre saohna khaoh lai ngaitapa, Khazohpa hiehâhna kre saohna khaoh liata thy ta.

²⁰ Khihpi khôtho lâta kre saohna khaoh liata kre cha tlypa ta saoh ei ta, kre saohna khaoh tawhna chata thisaih vaw pua ta, thisaih cha arâ chhâri taih a thu ta, lyu 1,600 a seih.