BIEPHUAH 13 - Mara Bible RV (BSI)

Sahrâhpa miakhana

¹ Chatawhcha sahrâhpa, ki hrawh nata luh sari a hneipa, tilaipi tawhta a kaw puapa hmô na ta. A kizy liata beilakho miahrawh y ta, a luhzy liata Khazohpa reipachhiena mohzy a y.

² Sahrâhpa ei hmôpa cha keichhoh lyu ta, a pheizy chavyh phei lyu ta, a pakah cha chakeibarôhneipa pakah a lyu. Sahrâhpa hnohna chata Drâkao ta a hmotaotheina, a beidyuchhai nata biehneina lai ngaitapa pie ta.

³ A luh miakha cha thikhei thei awpa taihta hmah phaohpa hawhta y ta, châhrasala thikhei thei awpa taihta a hmah phaopa cha tlâh ha ta, alei chyhsa zydua ta noâh tah ei ta, sahrâhpa cha pazi ei ta.

⁴ Sahrâhpa hnohta a biehneina a piepa vâta, drâkao cha a chhy ei ta. Sahrâhpa chhao cha a chhy ei ta, “Sahrâhpa hawhpa he ahy y, ahy a dyuh thei aw?” tah ei ta.

⁵ Chatawhcha apalaina nata Khazohpa reipachhiena pakah a hnohta piepa châ ta, thla sypalih nata thla no chhôh biehnei awpa ta pasaipa a châ.

⁶ Khazohpa reipachhie awpa ta a pakah â ta, Khazohpa moh nata a pahrâna su nata vârâh liata a pahrâpazy reipachhie ta.

⁷ Mopathaihpazy a dyuh ta pahnie awpa ta pasaipa châ ta, chi to, phopi to, reih to nata râh to chô liata biehneina a hnohta piepa a châ.

⁸ Alei chô liata a pahrâpa zydua, khizaw â thao tua no tawhta thie chiehpa Mietakutaw hrona châbu liata moh ro leipa maihta ano cha amâ chhy aw.

⁹ Nakhaoh a hneipa ta cha thei mawh sy:

¹⁰ Seichâna lâ a sie awpa chyhsa cha, Seichâna lâ sie aw ta; Zaozi ta thie awpa chyhsa cha, Zaozi ta thiepa a châ aw. Cha chata mopathaihpazy cha tao hualuana nata ngiapâna hnei awpa a byuhzie a palâsa.

Sahrâhpa mianona

¹¹ Chatawhcha sahrâhpa hropa alei tawhta a vaw puapa hmô na ta. Mietakutaw hawhta ki no hnei ta, drâkao reih pathliezie hawhta a reih a pathlie.

¹² Sahrâhpa hmiatuapa biehneina zydua kha a mohmô liata hmâh ta, alei nata a chhôh liata a pahrâpa zydua cha sahrâhpa hmiatuapa, thikhei thei awpa taihta hmah phaoh ta a tlâh hapa kha a pachhysa.

¹³ Ngiana nata hmonoâhpa rônah ngaitapazy tao ta, chyhsa mohmô liata avâ tawhta alei lâ mei patlasa theina taihta a tao theipa a châ.

¹⁴ Sahrâhpa hmiatuapa moh ta hmonoâhpa taotheina hmotaotheina piepa a châpa hmâpa ta, alei liata a pahrâpazy dôvei ta, zaozi hmah phaoh ta a hroh heihpa sahrâhpa nothlahpa padua awpa ta a chho ei.

¹⁵ Sahrâhpa nothlahpa cha husona pahneisa awpa ta, sahrâhpa mianona hnohta hmotaotheina piepa châ ta, chatanachata sahrâhpa nothlahpa cha reih pathlie thei aw ta, sahrâhpa nothlahpa a chhy khoh leipa maih a pathiesa aw.

¹⁶ Chyhsa zydua, molaipa nata mochyhpa, hneirôhpa nata dyhchhiepa, sei nata khotalaipazy cha ama ku chachâh lâ tlyma, ama khi liata tlyma, ngiana hnei khai awpa ta tao ta.

¹⁷ Chatanachata ngiana, sahrâhpa moh tlyma, a moh nuby tlyma a hnei leipazy cha, hmo chalei thei leipa aw ei ta, zuah thei hra aw veih ei.

¹⁸ Cha chata sona hnei awpa a byuhzie a palâsa. Pahnona a hneipa ta sahrâhpa nuby cha a laichadai mawh sy. Chyhsapa nuby châ ta, a nuby cha 666 a châ.