BIEPHUAH 12 - Mara Bible RV (BSI)

Chanô nata Drâkao

¹ Chatawhcha ngiana rônahpa avâ liata a vaw lâ ta. Chanô pakha, noh ta a tobi ta, a phei ry liata thlâpâ y ta, awhsi miahrawh hleino ta taopa lakho a khopa vaw y ta.

² Chanô cha saw phaoh ta, saw zeih pasapa nata saw sa riethei taopa vâta thata cha ta.

³ Ngiana hropa avâ liata a vaw lâ heih ta. Drâkao saihpa lai ngaitapa, luh miasari nata ki hrawh a hneipa, a luhzy liata lakho miasari a khopa vaw y ta.

⁴ A chaolahmei ta avâ liata awhsi su thôh su kha a daophi pathlah ta, alei lâ za thy ta. Chanô saw cha a vaw pihpata nahta a palâ thei nawpa ta, drâkao cha chanô nawh a zeihpa hmiakô liana cha a duah thlâh ha ta.

⁵ Chanô chata sawchapawpa, phopi zydua chô liata thua chôchahrei ta ryu a reih awpa sa ta. Châhrasala a saw cha Khazohpa nata a beidyuchhai lâta a chhipa ta y ha ta.

⁶ Chanô cha Khazohpa ta ano châta â chhuahdypa su, râhchawhpa lâ a râ syulyu ha ta. Cha liata noh 1,260 chhôh pasapa a châ aw.

Sâtâ alei lâ thypa a châ

⁷ Chatawhcha vârâh liata adyuhna vaw y ta. Mikaila nata a vâlyuhchâpazy ta drâkao cha a dyuh ei ta. Drâkao nata a vâlyuhchâpazy chhaota a vaw dyuh palie hra ei ta.

⁸ Châhrasala drâkao cha pahniepa châ ha ta, vârâh liata ama châta su y khao vei.

⁹ Chatawhcha drâkao lai ngaitapa, parih hlôpa, ahripa nata Sâtâ tahpa ta moh bipa, khizaw zydua a dôtuhpa cha za thy pathlah ei ta. Alei lâ za thy ei ta, a vâlyuhchâpazy chhao a hnohta za thy pâ hra ei ta.

¹⁰ Chatawhcha avâ liata ao paro ngaitapa thei na ta, ao chata, “Tahmâ cha eima Khazohpa pachhana, hmotaotheina, khinarâh nata a Krista biehneina zy a vaw tlô haw. Eima unawhzy a leihtuhpa, eima Khazohpa hmiakô liata chhô nah zâ ta âmo a leih tyhtuhpa cha, za thy pathlahpa a châ haw.

¹¹ Mietakutaw thisaih nata ama pahnokheina bie vâta ano cha ama pahnie haw. Ama hrona kyh chhao pachâ thei khao leipa ta thina taihta a dyuhpazy ama châ.

¹² Chavâta Hy avâzy nata a chhôh liata a pahrâpazy saih u, a ly teh u! Nâmo, alei nata tilaipi deikua cha, nama hu a po na! Ahripa ta daihti chyuta dei a hnei tahpa a pahnopa vâta, hiehâh ngaitapa ta nâmo lâ za chô ha tlôh ta,” tah ta.

¹³ Drâkao ta alei lâ thy pathlahpa a châpa a hmô nahta, sawchapaw a satuhpa chanô cha a chadai ta.

¹⁴ Châhrasala chanô cha râhchawhpa liata a y nawpa su lâ â zaw thei nawpa ta, pahmôhpi lai ngaitapa mathlaw miano piepa châ ta, cha liata, parih ta a hmô thei khao leina liata kô thôh nata khophie chhôh pasapa a châ aw.

¹⁵ Parih ta chanô cha ti ta a paphaosa thei nawpa ta, chavah hawhta a pakah tawhta ti pachhao ta.

¹⁶ Châhrasala chanô bao awpa ta alei vaw pua ta, alei ta a pakah â ta, drâkao ta a pakah tawhta a pachhaopa chavah cha palâ khai ha ta.

¹⁷ Chavâta drâkao cha chanô chô liata a hiehâh ngaita ta, chanô pathla laibâhpa, Khazohpa biepiepazy a zyhpa nata Zisu bie a pyhpazy a dyuh awpa ta pua ta.

¹⁸ Tilaipi raphyu liata a duah ta.