BIEPHUAH 11 - Mara Bible RV (BSI)

Pahnokheituhpa pano

¹ Chatawhcha lohthi chôchahrei hawhpa thliena na pie ta, ei hnohta, “Thyu la, Khazohpa Achhyna o nata maisâh zy thlie la, a chhôh liata achhytuhpazy chhao reih teh.

² Achhyna o khôtho lâ dôhpachhôh tlyhmia deikua thlie leipa la, siesai mah y. Cha cha Zenitaizy hnohta piepa châ ha ta, âmo ta khihpi pathaihpa cha thla sypalih nata thla no ama tlypâ aw.

³ Chatawhcha bie nâ pahnokheituhpa pano hnohta biepie aw na ta, latho poh a bupa ta, noh 1,260 chhôh bie ama chhochhielie aw,” tah ta.

⁴ Âmo cha ôli tho miano nata meiôh patyuna alei Beipa hmiakô liata a duah tyhpazy ama châ.

⁵ Ahy rai ta âmo cha pasasa amâ chhuah khiahta cha, ama pakah tawhta mei vaw pua aw ta, ama khakhaipazy cha a kâ khai aw. Âmo pasasa a chhuahpa maih cha, cha hawhta thiepa ama châ aw.

⁶ Hrohsona bie ama rei chhôh noh zydua avâ suah lei awpa ta avâ khaw theina hmotaotheina ama hnei. Ama khona daihti maihta thisaih lâta pachâsa awpa ta tizy chô liata chhao biehnei ei ta, khizaw he potlana to ta hrie awpa ta bie ama hnei hra.

⁷ Pahnokheina bie ama rei khai nahta, aleichiepa khaohtlô tawhta sahrâhpa a vaw pua awpa ta âmo cha a dyuh aw ta, pahnie aw ta, a thie aw ei.

⁸ Ama rizy cha khihpi rônahpa khiliah liata â zawh aw. Cha khihpi rônahpa cha thlahpa kyh lâta Sawdawmâ nata Izi moh bipa châ ta, ama Beipa ama khaipâna su kha a châ.

⁹ Phopizy, chizy, reihzy nata râhzy tawhta chyhsa thokhazy ta ama rizy cha noh thôh nata khophie chhôh moh aw ei ta, thlâ liata pabu pasaih aw veih ei.

¹⁰ Lei chyhsazy rie a patheipa hrohsopa panozy thiepa ama châpa cha, lei chyhsazy a ly kaw aw ei ta, alynazy tao aw ei ta, hmosaipiepazy amâ pie raihrie aw.

¹¹ Noh thôh nata khophie a châ tawhta, Khazohpa tawhta hrona hu ama chhôh liata a vaw ngia ta, ama phei ta a kaw duah ei ta, a hmôtuhpazy ta ama chi ngaita.

¹² Chatawhcha ama hnohta, “He lâ a khy teh u,” tahpa ta avâ tawhta ao paro ngaitapa thei ei ta. Meihdo hry liata avâ lâ khy ei ta, ama khakhaipazy ta moh thlâh ha ei ta.

¹³ Cha daihti lia tlai chata alo thata a vaw sih ta, khihpi su hrawh su kha cha cho ha ta. Alo sihpa liana chata chyhsa sâh sari thi ei ta, a laibâhpazy cha chi ngaita ei ta, vârâh Khazohpa cha palyupalih ei ta.

¹⁴ Hupona einona cha khô ta, hupona eithôhna thlai a vaw tlô aw.

Chiahmie miasarina

¹⁵ Chatawhcha vâlyuhchâpa pasarina ta a chiahmie tô ta, “Khizaw khinarâh cha eima Beipa nata a Krista khinarâh a vaw châ haw. Ano ta chhâzaw nata tlyzaw ta ryu a reih aw,” tahpa ta ao paro ngaitapazy avâ liata vaw y ta.

¹⁶ Chatawhcha Khazohpa hmiakô ta ama beidyuchhai chyu liata a tyuhpa machâ pakih nata papalihzy cha â khu lâta pao ei ta, Khazohpa a chhy ei ta,

¹⁷ “Hy Abeipa Khazohpa Atotaotheipa, A y haipa nata a y hapa y, Na hmotaotheina rônahpa ta ryureih chi ta, Alyna bie eima cha hlâ.

¹⁸ Phopizy ama hiehâh ta, Na pathiiana a vaw tlô; Cha cha athihpazy pachiana daihti châ ta, Châ chakaotuhpa hrohsopazy nata mopathaihpazy Lymâ piena daihti a châ. Na moh a chituhpa a lai a chyh ta Lymâ piena daihti châ ta, Leilô paraotuhpazy paraona daihti a châ,” tahpa ta Khazohpa a chhy ei ta.

¹⁹ Chatawhcha avâ liata Khazohpa Achhyna o cha pahypa châ ta, Achhyna o chhôh liata a biehrai byh a vaw lâ ta. Dôhlazy vaw pathlie ta, aozy vaw pua ta, tôkalôhpazy a vaw thua ta, alo a sih ta, pareih thata a tla.