BIEPHUAH 10 - Mara Bible RV (BSI)

Vâlyuhchâpa nata châbu chatypa

¹ Chatawhcha vâlyuhchâpa hropa thatlô ngaitapa avâ tawhta a za chôpa hmô na ta. Meihdo ta a tobi ta, a luh chô liata meisaku a zawh ta, a hmia cha noh hawhta khaih ta, a pheizy cha mei tôh hawhta a châ.

² A ku liata châbu chatypa chyhpa cha pahy chiehpa ta chaba ta. A phei chachâh lâ tilaipi chô liata tlypa ta, a chavei lâ alei liata tly ta.

³ Chakeibarôhneipa a rôhpa hawhta ao paro ngaitapa ta awh ta, a awh khai nahta, tôkalôhpa miasari a vaw thua ta.

⁴ Tôkalôhpa miasari â vaw thua nahta, châ ro awpa a chhuah na ta, châhrasala avâ tawhta ao ta, “Tôkalôhpa miasarizy bie reipa kha phih la, roh khah y,” a tahpa thei na ta.

⁵ Tilaipi nata alei liata a duahpa vâlyuhchâpa ei hmôpa khata a ku chachâh lâ avâ lâ pazawh ta,

⁶ chhâzaw nata tlyzaw ta a hroh thlâhpa, avâ nata a chhôh liata a ypazy, alei nata a chhôh liata a ypazy, tilaipi nata a chhôh liata a ypazy a paysatuhpa moh reipa ta bie a taih ta, “Bohpi châ khao aw vei.

⁷ Vâlyuhchâpa pasarina ta chiahmie ta a awna noh liata deikua cha, a chakaotuhpa hrohsopazy hnohta a phuahpa hawhna khata, Khazohpa bienyupa cha pakipa a châ aw,” tah ta.

⁸ Avâ tawhta ao ei theipa khata bie na chho heih ta, ei hnohta, “Sie la, tilaipi nata alei liata a duahpa vâlyuhchâpa ku liata châbu chatypa pahy chiehpa hao kei la teh,” a tahpa thei na ta.

⁹ Vâlyuhchâpa lâ cha vawh na ta, châbu chatypa chyhpa cha na pie awpa ta chho na ta. Ano ta ei hnohta, “La la, nie teh, na chhôh pakhasa aw ta, na pakah liata deikua cha, kheihti hawhta a thlôh aw,” na tah ta.

¹⁰ Vâlyuhchâpa ku tawhta châbu chatypa chyhpa cha la na ta, nie na ta. Ei pakah liata kheihti hawhta thlôh ta, châhrasala ei nie khai nahta, ei chhôh vaw pakhasa ha ta.

¹¹ Chatawhcha ei hnohta, “Phopi hluhpizy, râh hluhpizy, reih hluhpizy nata bei hluhpizy kyh na chhochhielie heih awpa a châ,” tahpa ta na chho ta.