BIECHHOTUHPA 9 - Mara Bible RV (BSI)

Thlua hlei a hnei leipa thina

¹ He kyh zydua he a chu pasiapa ta thata pachâ na ta. Mosiapa nata asopa hmotaopazy cha Khazohpa ku liata a ypa a châ tahpa ei pahno haw. Kyhpachâna kyh tlyma, ahaona kyh tlyma, chyhsapa ta pahno chhielie vei. A hmialâ daihti liata hmo a vaw y awpa sai a châ.

² Chyhsa zydua chô liata hmo a vaw tlô awpa â lyu khai. Mosiapa nata moleipa, chyhsa phapa nata chyhsa chhiepa, chyhsa pathaihpa nata chyhsa pathaih leipa nata atheihna a hlâpa nata a hlâ leipa zy chô liata â lyupa ta hmo a vaw tlô tyh. Chyhsa phapa chô liata hmo a tlôpa hawhta, moleipa chô liata tlô ta, bie â taihpa chô liata tlôpa hawhta, bie â taih leipa chô liata chhao a tlô hra.

³ Noh ry liata hmo taopa to liata hmo chhiepa a ypa cha he he a cha: chyhsa zydua ama tovyuh awpa â lyu khaipa hih. Chyhsa sawzy cha ama hro chhôh ta ama palôh liata moleina nata hruna ta bie ta, cha hnôhlâ ta athipazy yna lâ ama sie tyh.

⁴ Ahrohpazy hnohta a pahlao chypa châta deikua cha hnabeiseihna a y. I hrohpa cha chakeibarôhneipa thipa hlâta a phahnai via.

⁵ Ahrohpazy cha ama thi awpa a pahno ei ta, athipazy deikua cha khâpa hmah pahno khao veih ei. Chavâta lymâ ama dao awpa y khao leipa ta, ama moh chhao mypa ta a y.

⁶ Ama kyhpachâna, amâ haona nata ama hiatliana zy lei khai ha ta, noh ry liata hmo taopazy liata tovyuh rai hnei khao veih ei.

Kyhpachâpa hnohta a lypa ta na hro hmâh mah y

⁷ Khazohpa ta na hmo taopazy a pyh ha ta, chavâta sie la, a lypa ta na viahchhâ nie la, palôh tlâhpa ta na kresawhti doh mah y.

⁸ Na chysia khâ dieh sala, na luh liata sathaw hi beih khah sy.

⁹ Tihu buakha a vaw lâ ta a lei heihpa hawhta, Khazohpa ta noh ry liata noh chyhta a cha piepa liana heta, na kyhpachâpa na lapinô hnohta na hro a lypa ta hmâh mah y. Cha cha na hro chhôh ta na tovyuh châ ta, noh ry liata na hriapasana lymâ a châ.

¹⁰ Na ku ta hria awpa a hmôpa maih cha, na theina zydua papuapa ta hria mah y. Na pangai haipa Athihkhih liata cha, rai tlyma, pachâna tlyma, pahnona tlyma, sona tlyma y khao aw vei.

Thatlôna hlâta sona a pha via

¹¹ Noh ry liata ei hmô heihpa cha he he a châ: Arâpasuana liata a râ theipa ta pahniena to hlei leipa ta, Adyuhna liata chhao thatlôpa ta pahniena to hlei vei; Asopa ta nie a phahla ta, Novâhpa hneirôh hlei leipa ta, Athaipa chhao khokheina to hlei vei. Chyhsa to ta daihti nata ryhpaohna ama hnei chyu.

¹² Châhrasala chyhsapa ta ano daihti awpa pahno vei. Sao chichhihpa liata ngazy amâ aopa hawhta nata khoheih liata pavawzy amâ aopa hawhta, daihti chhiepa eikhapi ta a vaw tlô thlu ti ei ta, chyhsa sawzy cha, cha liata amâ ao tyh.

¹³ Sona pakhopâna chhao noh ry liata hmô na ta, rônah ngaitapa ei palyusa.

¹⁴ Chyhsa chyhta pahrâna khihpi chypa miakha y ta. Bei rônahpa ta vaw siehnaopa ta, a khihpi cha dôh ta. A thokhyzy pacho awpa ta thata a hriapasa.

¹⁵ Cha khihpi liata chyhsa sopa dyhchhiepa pakha y ta, a sona ta cha khihpi cha a pachha haw. Châhrasala cha dyhchhiepa cha a thei tlâ khao veih ei.

¹⁶ Chyhsa sipasapa sona cha mohnaopa ta, a biezy nathlie vei hra ei sala, kei la, “Thatlôna hlâta sona a pha via,” ei tah pyly.

¹⁷ Ahrupazy hry liata ao paro ngaitapa ta ryureituhpa awhpa hlâta cha, asopa ta a notata bie a reipa nathlie a pha via.

¹⁸ Sona cha adyuhna chariah chhaichhizy hlâta pha via ta, châhrasala moleipa pakha ta hmo phapa hluhpi a parao tyh.