BIECHHOTUHPA 8 - Mara Bible RV (BSI)

Abei biepiepa zyh mah y

¹ Ahy ma asopa lyu ta, Ahy ma bieso yzie a pahno? Chyhsapa cha a sona ta a hmia pakhaihsa ta, A hmiaphao nâ a chhih leina chhao a panano.

² Abei cha Khazohpa bietai a daopa a châpa vâta, a biepiepa zyh mah y.

³ Abei hmiakô tawhta pua awpa ta a para leipa la, a hmiakô liata hmo chhiepa a duakhei khah y, ano khozie hawhta hmo a taopa châ tlôh ta.

⁴ Abei bie a bei chai ta, ahy ma a hnohta, “Khâpa ma na tao?” a tah thei aw?

⁵ Biepiepa a zyhpa cha pasa tao aw vei. Palôh sopa cha a daihti pahno thai ta, taozie dopa chhao a pahno.

⁶ Chyhsapa cha a phaohri ta vi hra sala, hmo to a daihti hnei ta, a taozie a hnei khai.

⁷ Hmo a vaw y awpa a pahno chhieliepa y veih ei. Chavâta hmo a vaw y awpa kyh chyhsapa hnohta ahy ma a chho thei aw?

⁸ Ahy hmahta husona patu theina hmotaotheina hnei leipa ei ta, thina noh chô liata bie a hnei theipa y hra veih ei. Adyuhna a y ngâ nota cha, ahy hmahta a pheisaih rai pahâsa thaipa a châ leipa hawhta, moleina ta moleina a taotuhpazy cha papua aw vei.

⁹ Noh ry liata hmo taopa zydua saipa ta ei palôh hmâh na ta, he he ei hmôpa cha a châ: chyhsapa ta chyhsa hropa chô liata biehneina hmâh ta, châhrasala cha cha ano pasa nawpa tlao a châ tyh.

Khazohpa a chipa cha hmo pha a tao aw

¹⁰ Chatawhcha a pha kawpa ta moleipa ama pabupa hmô na ta. He moleipazy he moleina hmo taona chôta su pathaihpa liata a ngia heih pua heih a tahpa nata khihpi liata reithai a hlaopazy ama châ. Cha chhao cha hraoleipa deita a châ.

¹¹ Moleina hmo a taopazy cha thlai ta hriepa ama châ leipa vâta, chyhsa sawzy palôh cha moleina kyh liata a riah a pha tlamaw tyh.

¹² Chyhsa moleipa cha ei za kha a molei hapa chhao ta, hroh thlâh ha chy hra sala, Khazohpa a chituhpazy ta Khazohpa ama chipa cha a pha pyly tahpa ei pahno.

¹³ Moleipa châta deikua cha a hro chypa chhao ta pha hlei aw vei. Khazohpa china a hnei leipa vâta, nohpahlipa hawh deita châ ta, a hro pareih hmeiseih aw vei.

Khazohpa lâpi chyhsapa ta pahno thei vei

¹⁴ Alei chô liata hmo a ypa hraoleipa y ta. Mosiapazy ta moleipazy hmotaopa ty phaoh ei ta, moleipazy ta mosiapazy hmotaopa byhnâ ama to. Cha chhao cha hraoleipa deita a châ tahpa ei pahno.

¹⁵ Chavâta chyhsapa châta hro lyna hnei awpa ei khokhei. Noh ry liana heta niepa ta doh ta, a lypa ta y awpa hlâta a pha viapa chyhsapa châta y vei. Chatanachata noh ry liata Khazohpa ta a piepa a hro chhôh noh zydua liata, alyna chôta a hriapasa lymâ thei aw.

¹⁶ Sona kyh pahno awpa nata alei chô liata chyhsazy hmotaopa pahno awpa ta, chhô nah zâ ta mokuh saihpa ta ei pachâna hmâh na ta.

¹⁷ Khazohpa raihria zydua moh na ta, noh ry liata hmo a ypa zydua he chyhsapa ta pahno khai thei vei tahpa ei pahno haw. Chyhsapa ta thata hriapasapa ta tlua hra sala, hmô papua khai beih aw vei. Chyhsa sopa chhao ta, a pahnopa hawhta a reih hra sala, hmô papua khai thei beih aw vei.