BIECHHOTUHPA 7 - Mara Bible RV (BSI)

Sona phazie

¹ Sathaw sôhpa hlâta moh phana pha via ta, Pi noh hlâta thi noh a pha via.

² Kyhchhi a hlaopa hlâta, Mâchhiesana o lâ vawpa a pha via; Cha cha chyhsa zydua chhâna noh châ ta, Ahrohpazy ta ama palôh liata ama khô awpa a châpa vâta.

³ Hmiaphao pachârôhna ta palôh lyna a taopa vâta, Pachârôhpa cha pahneipa hlâta a pha via.

⁴ Asopa palôh cha mâchhiesana o liata y ta, Ahrupa palôh deikua cha alyna o liata a y.

⁵ Ahrupazy hla sapa nathliepa hlâta cha, Asopazy chhoreina nathliepa a pha via.

⁶ Ahrupazy pahneina pyu cha, Beih ry liata ahloh buh kâpa pyu nata â lyu. Cha chhao cha hraoleipa deita a châ.

⁷ Tlybaina ta asopa chhao pahrusa ta, Panaopapana ta palôh a pamoleisa tyh.

⁸ Hmo chhâna cha â thaona hlâta pha via ta, Palôh maoh oh theina cha palôh laipa hlâta a pha via.

⁹ Hiehâhna cha ahrupazy palôh liata riehmo a paryhpa châ ta, Chavâta hiehâh awpa ta na palôh a para khah y.

¹⁰ “Khazia ma tahmâhlâ daihti hlâta, Hlâno daihti kha a pha via thlâh ha tly?” tah khah y. He na hiahrina he sona tawhta a puapa châ vei.

¹¹ Ryu cha sona nata â pakaoh khiahta cha, Hmo phapa châ ta; Noh a hmôtuhpazy châta chhao, Athôhna a châ.

¹² Sôh ta a pabohsapa hawhta, Sona chhao abohna châ ta; Sona a hneipa ta a hrona a pabohsapa he, Pahnona phahnaina a châ.

¹³ Khazohpa hmotaozie he pachâ tua u, A pako hapa cha ahy ma a patlâsa thei khao aw?

¹⁴ Phana noh liata a ly la, chhiena no liata he he pachâ mah y: Phana chhao, chhiena chhao, Khazohpa taopa a châpa vâta, chyhsapa ta a hmialâ daihti liata hmo a vaw y awpa khâpa hmah pahno vei.

¹⁵ Tihu buakha a vaw lâ ta, a lei heihpa hawhta, daihti chyuta ei hro chhôh heta hmo toti ei hmô haw. Mosiapa ta a siana liata a leidia nota, moleipa ta a paraona chôta a hro a pasi thlâh haw.

¹⁶ Sia tupa ta y leipa la, so tupa ta y hra khah y. Khazia nâmasasyh ta nâ pahleipadia aw?

¹⁷ Molei tupa ta y leipa la, hru hra khah y. Khazia na chhâ a palo leipa ta na thi aw?

¹⁸ He he nâ patu awpa a pha, pathlie cheita khah y. Khazohpa a chituhpa cha, cha hawhta tah tu pâpa hnei lei awpa ta â vaih aw.

¹⁹ Khihpi liata ryureituhpa pahrawh hlâta, Chyhsa sopa cha sona vâta a tha a tlô via.

²⁰ Alei chô liana heta chyhsa siapa, A molei beih leipa pakha hmah y veih ei.

²¹ Chyhsa bie reipa maih nathlie khoh hlei khah y, Chataleipatala châ chakaotuhpa ta Chhie a cha sapa na thei pathlei aw na.

²² Nâma tlai chhao ta mohropazy chô liata Ei hluhpi chhie na vaw sapa na palôh ta a pahnopa kha.

Sona tluazie

²³ He hmo zydua he sona ta ei pasia khai haw. “Ei so kaw bâ aw,” tah na ta, châhrasala a hniasia vei.

²⁴ Sona cha lâhlapi liata y ta, â pathu ngaitapa liata a ypa a châ. Ahy ma a hmô thei aw?

²⁵ Sona patuapalua ta, tlua ta, hmo yziezy pahno awpa ta ei palôh pahei na ta, moleina he hruna a châzie nata hrungâ kathluhna kyhzy pahno awpa ta ei palôh pahei hra na ta.

²⁶ Chatanachata thina hlâta a kha viapa ei hmô haw: Cha cha khoheih palôh nata sao palôh a phaohpa chanô châ ta, a ku keihrai ta a hmâhpa chanô a châ. Khazohpa a palysapa cha, cha chanô tawhta a boh aw ta, moleipa deikua cha a patu aw.

²⁷ Moh teh u, hmo yzie pahno awpa ta, hmo miakha tawhta miakha ei tlua laih nota ei hmôpa cha he he a châ, biechhotuhpa ta a tah.

²⁸ Cha cha ei hro ta khâ a tluapa, châhrasala ei hmô thei leipa a châ. Chapaw sâh kha hry liata pakha hmô na ta, chanôzy hry tawhta deikua, pakha hmah hmô va na.

²⁹ He he ei hmô chhôhpa cha a châ: Khazohpa ta chyhsapa he chyhsa dopa châ awpa ta tao ta, châhrasala hmo chhiepa to ama patuapalua tyh.