BIECHHOTUHPA 6 - Mara Bible RV (BSI)

¹ Noh ry liata hmo pha leipa ei hmôpa y ta, cha chata chyhsapa he thata a vi:

² Khazohpa ta chyhsa pakha cha hneirôna, sôh nah piah nata zachhihna zy pie ta, a aoh khopa maih a nie thei leipa y vei. Châhrasala a aoh khopazy a nie awpa cha Khazohpa ta pasaih leipa ta, chihropa ta tlao a nie haw. Cha chhao cha hraoleipa châ ta, hmo pha lei ngaitapa a châ.

³ Chyhsa ta saw za kha hneipa ta kô hluhpi hroh sala, kô khazie leichâ a hro pasipa chhao ta, a hro nohzy cha a khozie hawhta hmâh thei leipa sala, a pha thipa chhao ta pabupa a châ leipa khiahta cha, cha hawhpa chyhsa hlâta cha athipa ta a pihpa a pha via ei tah.

⁴ Cha hawsaih cha hraoleipa ta vaw pih ta, zohna lâ sie heih ta, zohna ta a moh a khu haw.

⁵ Cha dei châ vei, noh khaihpa hmô leipa ta, khâpa hmah pahno hra vei. Chatahrasala kô hluhpi a hrohpa hlâna khata apahâna a hmô pha via.

⁶ Kô sâh lie no hmah hroh hra sala, hmo phapa a hmô tlôh vei khiahta cha, athipa ta a pihpa hlâta a pha viana y vei. Ama pano ta su miakha a pangaipa ama châ.

⁷ Chyhsapa hriapasana zydua cha a aoh châta châ ta, châhrasala a aoh lôhrâ tlô beih vei.

⁸ Chyhsa sopa cha ahrupa hlâta khâpa phahnai viana ma a hnei? Dyhchhiepa chhao mohropazy hmiakô liata yzie a thai kawpa vâta, khâpa athôhna ma a hmô tly?

⁹ Hnei thei leipa hmo khopa vâta palôh a zawvaw ngâpa hlâta cha, mo ta hmôpa hneipa rakha liata palôhtlâh a paopa a pha via. Cha chhao cha hraoleipa châ ta, thlih a chadaipa dei a châ.

¹⁰ Hmo a vaw ypa maih rao chhielie hapa châ ta, chyhsapa chhichâna chhao pahno chiehpa a châ. Chavâta chyhsapa ta ano hlâta thatlô viapa bie cha ei thei vei.

¹¹ Bie a hluh via nahta, hraoleipa hluh via ta, chyhsapa châta khâpa athôhna ma a hnei?

¹² Tihu buakha a vaw luah ta a lei heihpa hawhta, hro chhôh noh chyhta hnei ta, nohpahlipa hawhta a khôpa chyhsapa châta a pha chai awpa ahy ma a pahno tly? Ahy ma chyhsapa hnohta a thi tawhta noh ry liata hmo a vaw y awpa a chho thei aw tly?