BIECHHOTUHPA 5 - Mara Bible RV (BSI)

Naosiata ta bie a taih awpa châ vei

¹ Khazohpa o lâ na pangai nota na phei a phapa ta vaih mah y. Ahrupazy atheihna hlâpa hlâta bie nathlie awpa ta a hniapa a pha via, ahrupazy cha khâpa ma ama tao tahpa ama pahno leipa vâta.

² Na pakah a para leipa la, na palôh ta Khazohpa hmiakô ta bie rei awpa chatlie tu khah sy. Khazohpa cha avâ liata y ta, nâ deikua cha alei liata y tlôh chi ta, chavâta bie reih chyh mah y.

³ Pachâna hluh tupa ta mâsapa pahluh ta, bie rei hluh tupa ta hruna bie a papua hluh tyh.

⁴ Khazohpa lâ hmo pie awpa bie nâ taih khiahta cha, na bietai patlô awpa ta pahawhpasâh khah y. Khazohpa cha ahrupazy chô liata a ly vei. Bie nâ taihpa cha patlô mah y.

⁵ Bie a taih tlôh ta patlô leipa hlâta cha, bie a taih leipa a pha via.

⁶ Na pakah ta cha pamoleisa leipa sala, vâlyuhchâpa hmiakô liata, taopasipa a châ tah hra khah y. Khazia Khazohpa cha na bie vâta a hiehâhpa ta, na ku raihriazy a parao aw?

⁷ Mâsana a hluhna liata bie ruapa hluh ta, hraoleipa chhao a hluh tyh. Khazohpa deita na chi awpa a châ.

Sôh nata palyupalihna hraoleina

⁸ Dyhchhiepazy tlybaipa ta ama ypa nata adona nata siana zy thachahra hmâpa ta pahleipa a châzie zy bia liata na hmô khiahta cha, cha kyh liata na noâh khah sy. Hyutuh laipa cha ano hlâta a sâh viapa ta mohpathli ta, âmo pano chô lâta chhao hyutuhpa a sâh viapazy ama y heih.

⁹ Châhrasala mo to chhaohlei kôvei a niepa sai châ ei ta, abei tlai chhao cha lyutaopazy ta ama chyhpa a châ.

¹⁰ Tâkâ a tlaichhaipa cha tâkâ liata a lôhrâ patlô beih leipa aw ta, hneirôna a tlaichhaipa chhao a sôh hmôpa ta a lôhrâ patlô beih aw vei. Cha chhao cha hraoleipa deita a châ.

¹¹ Hneina a pôh khiahta cha, a nietuhpa pôh ei ta; a mokhaoh ta sôh a hmôpa tah leipa ta cha, sôh hneituhpa châta khâpa athôhna ma a hnei?

¹² Raihriatuhpa cha a nie hluh tlyma, a nie chyh tlyma, a mokuh pahâh kaw ta; hneirôhpa deikua cha, rih biena taihta a niepa chhao ta a mô thei vei.

¹³ Hmo pha lei ngaitapa noh ry liata ei hmô: Chyhsa ta ano palôh pasa nawpa ta sôh nata thih a pachôpa hih.

¹⁴ A sôh nata thihzy cha chhiena â tyhna liata lei khai ha ta, a sawchapaw châta a ku liata khâpa hmah y khao vei.

¹⁵ A nô chhi tawhta thluahruapa ta a vaw puapa hawhta, thluahruapa ta kua heih aw ta, a hriapasana theilâpazy chhao khâpa hmah a phao thei aw vei.

¹⁶ He chhao he hmo pha lei ngaitapa a châ: a vaw tlô no hawhna khata a sie heih aw. Thlih châta hriapasapa dei châ ta, a châta khâpa athôhna ma a hnei?

¹⁷ Cha dei châ vei, a hro chhôh noh zydua ta ruchhôpa nata pasapa nata hiehâhpa ta zohna liata pati a nie tyh.

¹⁸ Moh teh u, hmo phapa nata a hmiepa ta ei hmôpa cha, chyhsa ta niepa ta doh ta, Khazohpa ta a piepa noh chyhta a hnei chhôh ta, noh ry liata a hriapasana zydua liata alyna a hnei awpa he a châ. Cha cha a tovyuh a châ.

¹⁹ Cha dei châ vei, Khazohpa ta chyhsa hnohta sôh nata piah nata hneirôna zy a pie tita, chazy liata alyna châh pahno ta, a tovyuh a pyh thaipa ta, a hriapasana liata alyna châh a pahnopa cha, Khazoh hmosaipiepa a châ.

²⁰ Khazohpa ta a palôh khâ a palysa awpa vâta, a daihti khô chiehpazy a thei tu khao aw vei.