BIECHHOTUHPA 4 - Mara Bible RV (BSI)

Noh ry liata hmo pha leipazy

¹ Pachâ via heih na ta, noh ry liata tlybaina zydua hmô na ta. Moh teh u, tlybaipa ta a ypazy cha mothlih chhaota y ei ta, thlah a palôh awpa hnei veih ei. Âmo a tlybaituhpazy cha hmotaotheina hnei ei ta, âmo deikua cha thlah a palôh awpa y veih ei.

² Chatawhcha athipazy kyh patuapalua na ta, a thi hapazy kha a hroh chypazy hlâta vâpha viapa ama châzie ei palôh liata â vaw lâ.

³ Athipa nata ahrohpa hlâ chhao ta, a pih leipa, noh ry liata moleina hmotaopa rai a hmô leipa châ awpa a pha via syulyu.

⁴ Hriapasana nata raihria liata zôthaina zydua chhao he, vaihzy uahvana vâta a vaw ypa a châ tahpa hmô na ta. Cha chhao cha hraoleipa châ ta, thlih a chadaipa deita a châ.

⁵ Ahrupa cha a ku pako ta, Ano sa â nie tyh.

⁶ Chhôhmoh kawpa ta pazah kha hneipa cha, Hriapasa kawpa ta pazah miano hnei ta, Thlih a chadaipa hlâta a pha vai.

⁷ Sai heih na ta, noh ry liata hraoleipa ei hmô via heih.

⁸ Chyhsa matlupa pakha y ta, sawchapaw tlyma, unawh tlyma hnei leipa ta, ano dei ta a o liata pahrâ ta. Châhrasala a hriapasana chhâ thai khao leipa ta, hneirôna liata a mo lôhrâtlô beih leipa ta, “Ahy châta ma he tlupo ta hriapasa na ta, hro pahâh leina taihta ei hria tly?” tahpa ta anosasyh ta a hiahri beih hra vei. Cha chhao cha hraoleipa deita châ ta, thapawh a chhih leipa raihria a châ.

⁹ Pano cha pakha hlâta a pha via, ama hriapasana lymâ a hluh via awpa vâta.

¹⁰ Pakha a pao khiahta cha, pakhapa ta a viasapa cha a pathyu aw. Ano dei ta a ypa deikua cha a hu a po na, a pao tita a pathyu awpa ama y leipa vâta.

¹¹ Chyhsa pano amâ zia khoh khiahta cha, ama lalôh aw. Pakha dei ta â zia khiahta cha, kheihta ma a lalôh thei aw?

¹² Pakha deipa cha chyhsa ta a pahnie thei ngyu ma, pano deikua pahnie thei aw vei. Chaori ri thôh ta charipa cha, thlai ta chie aw vei.

¹³ Bei hrupa machâpa, pachâna lana châh chhao a pahno khao leipa hlâta cha, thyutlia sopa dyhchhiepa a pha via.

¹⁴ Bei hrupa cha, bei châ awpa ta a pihpa châ hra sala, dyhchhiepa vaw châ thei ta, thyutlia sopa dyhchhiepa chhao, patâhna o tawhta beidyuchhai liata â kaw tyuh thei.

¹⁵ Chyhsa a hrohpa zydua noh ry liata ama chareipa hmô na ta, abei su liata a duahpa thyutliapa chhao kha ama hry liata hmô hra na ta.

¹⁶ Bei thyutliapa ta a chhihthapa zawpi zydua cha chhâ tiah veih ei. Chatahrasala ano hnôhlâ ta a vaw y awpazy ta a chô liata a ly hlei aw veih ei. Cha chhao cha hraoleipa châ ta, thlih a chadaipa deita a châ.