BIECHHOTUHPA 3 - Mara Bible RV (BSI)

Ato châta daihti raopa a châ

¹ Ato châta daihti y ta, Avâ ry liata hmo to châta daihti raopa a châ.

² Pi daihti y ta, thi daihti a y; Lo daihti y ta, lo chiehpa phia daihti a y;

³ Thie daihti y ta, patlâh daihti a y; Phie daihti y ta, sa daihti a y;

⁴ Cha daihti y ta, pahnei daihti a y; Mâchhiesa daihti y ta, lâ daihti a y;

⁵ Alô thy daihti y ta, alô pahmaoh daihti a y; A pyhpahly daihti y ta, a pyhpahly lei daihti a y;

⁶ Tlua daihti y ta, pahlei daihti a y; Paso daihti y ta, thy pathlah daihti a y;

⁷ Hrie daihti y ta, bieh daihti a y; A chalih daihti y ta, bierei daihti a y;

⁸ Kyhpachâ daihti y ta, a hao daihti a y; A dyuh daihti y ta, a dyh daihti a y.

Khazoh piepa raihria

⁹ Raihriatuhpa ta a hriapasana tawhta khâpa athôhna ma a hmo?

¹⁰ Khazohpa ta chyhsa sawzy hnohta a tymâkhei awpa ta rai a vaw piepa cha ei pahno haw.

¹¹ Ato ama daihti chyu liata â ngia ngaitapa ta taopa ta, chyhsapa palôh liata tlyzaw soh ta, châhrasala Khazohpa hmotaopa cha âthaona tawhta achhâna taihta pahno thei hlei vei.

¹² A ly ngaitapa ta y ta, ama hro chhôh zydua hmo phapa taopa hlâta a pha viapa y vei tahpa ei pahno haw.

¹³ Chyhsa to ta niepa ta doh ei sala, ama hriapasana zydua liata a ly mawh ei sy. Cha cha Kha­zohpa kuhria a châ.

¹⁴ Khazohpa ta a taopa maih cha a y kôzaw aw tahpa ei pahno. Khâpa hmahta baichha theipa châ leipa aw ta, la bâ theipa cha aw vei. Chyhsazy ta a hmiakô liata chizapa ta ama y thei nawpa ta, Khazohpa ta a taopa a châ.

¹⁵ A y haipa he, a y chiehpa kha châ ta; a vaw y awpa chhao, a y chiehpa kha a châ. Khazohpa ta a lei hapa a paysa heih tyh.

Dohlei tawhta dohlei lâ

¹⁶ Cha dei châ vei, adona yna su liata paraona y hra ta, siana yna su liata chhao paraona a yzie noh ry liata ei hmô.

¹⁷ Hmo to nata rai to châta daihti raopa a châ khaipa vâta, Khazohpa ta mosiapa chhao moleipa chhao a pachia khai aw ei tahpa ei palôh ta pachâ na ta.

¹⁸ Chyhsa sawzy cha sahrohzy deita ama châzie âmosasyh ta amâ pahno thei nawpa ta, Kha­zopa ta âmo cha a pasia ei tahpa chhao ei palôh ta pachâ na ta.

¹⁹ Chyhsa sawzy chô liata a tlô awpa nata sahrohzy chô liata a tlô awpa cha miakhapa châ ta, pakha thi ta, ahropa chhao a thi hra. Husona miakha a hneipa châ ei ta, chyhsapa cha sahroh hlâta a duahmo pha via hlei vei. Ato zydua hraoleipa a châ khai.

²⁰ Ama pangaina su â lyu khai. Ama zydua ta dohlei tawhtapa châ ei ta, ama zydua ta dohlei lâ ama kua heih.

²¹ Chyhsapa thlahpa chô lâ kiah ta, sahroh thlahpa alei ry lâ a zu tahpa ahy ma a pahno?

²² Chyhsapa châta cha, raihria awpa he a tovyuh a châpa vâta, a raihria liata a ly awpa hlâta a pha viapa y vei tahpa ei hmô haw. ­ A thi khô lâta hmo a ypa pamosa awpa ta, ano cha ahy ma a vaw kuakhei thei aw?