BIECHHOTUHPA 2 - Mara Bible RV (BSI)

Phasana hraoleina

¹ Ei palôh liata, “Khawh, a vy teh, alyna ta duah ei cha pasia tua aw, a ly kawpa ta y teh,” tah na ta. Châhrasala moh tua u, cha chhao cha hraoleipa a châ.

² Pahneina hnohta, “Hruna a châ,” tah na ta, Alyna hnohta, “Khâpa phahnaina ma a hnei,” ei tah tyh.

³ Chyhsa sawzy he hro chhôh noh chyhta ama hnei chhôh ta, avâ ry liata sona hmotaopa ma a pha via, hruna hmotaopa ma, tahpa ei pahno thei nawpa ta, ei palôh cha sona ta pachhihthasa lymâna chôta, ei pôhpa he kresawhti ta palysapa ta hruna patu a chhuah na ta.

⁴ Rai hluhpi hriapa ta, ozy a sa na ta, kre sadôzy ei châta ei tao.

⁵ Sadôzy nata theilâpa thihzy a tao na ta, cha liata theilâpa tho to loh na ta.

⁶ Thody lai haipazy ta a biepa thothihzy a chyh thei awpa ta, tipozy chhao keima châta ei tao.

⁷ Seichapawzy nata seichanôzy chalei na ta, ei o liata a pihpa seizy chhao ei hnei. Viahchao hri hluhpi nata mietaku zaw hluhpi hnei na ta, Zerusale liata a vaw y tuapazy hlâta thata ei hnei hluh via.

⁸ Tâkâ nata ngôh nata abeizy nata râhzy ryusôhpazy pakhy na ta, chapaw nata chanô hlasathaipazy hnei na ta, chyhsa sawchapawzy alyna nôtho hluhpi chhao ei hnei.

⁹ Thata vaw hneirôh na ta, Zerusale liata a vaw pahrâ tuapazy ei ly khai ha ei. Sona chhao ei hnei lymâ.

¹⁰ Ei mo ta a khopa maih thlyu leipa na ta, ei palôh chhao alyna kheihawhpa liata hmahta pakysa va na. Ei hriapasana zydua liata ei palôh a ly ta, cha cha ei hriapasana zydua vâta ei lymâ a châ.

¹¹ Ei hriapasa­na zydua nata ei ku ta ei hriapa zydua pachâ na ta, moh teh u, cha zydua cha hraoleipa châ ei ta, thlih a chadaipa deita a châ; noh ry liana heta hmo phahnaipa khâpa hmah y vei.

Sona hro hraoleina

¹² Chatawhcha sona nata ngâna nata hruna kyh zy lâ a heipa ta pachâ na ta. Abei a thla awpa chyhsa cha, bei tuapazy tao chiehpa tah leipa ta cha, khâpa hropa ma a tao thei aw?

¹³ Khaihna cha zohna hlâta a pha viapa hawhta, sona chhao hruna hlâta a pha via tahpa ei hmô haw.

¹⁴ Chyhsa sopa cha a luh liata mokhaoh hnei ta, ahrupa deikua cha zohna ry liata a sie tyh. Châhrasala ama to awpa cha ama zydua châta miakhapa a châ tahpa ei pahno.

¹⁵ Chatawhcha ei palôh ta, “Ahrupa chô liata hmo a tlôpa cha keima chô liata chhao tlô hra tlôh aw ta, cha hawhpa khiahta cha, ei sona heta khâpa phahnaina ma a hnei tly?” tah na ta. Ei palôh liata, cha chhao cha hraoleipa a châ ei tah tyh.

¹⁶ Asopa chhao, ahrupa chhao, chhâzaw ta a thei thlâh hapa châ aw veih ei. Nohzy khô laih aw ta, mypa ama châ khai aw. Asopa chhao ahrupa hawhta a thi thlâh ha hrapa a châ.

¹⁷ Chavâta hro he ei hao. Noh ry liata hmotaopa zydua he, ei pachâ nâ parôhtuhpa dei châ ei ta, ato zydua hraoleipa châ ei ta, thlih a chadaipa deita a châ.

Hriapasana hro hraoleina

¹⁸ Ei hriapasana zydua he ei hnôhlâ ta a vaw y awpa châta ei râsai awpa deita a châpa ei pahnopa vâta, noh ry liata ei hriapasana zydua he ei hao.

¹⁹ Cha chyhsa cha asopa ma a châ aw, ahrupa ma tahpa ahy a pahno aw tly? Chatanachôta ei sona hmâpa ta noh ry liata ei hriapasana zydua chô liata biehneituhpa a châ pyly aw. Cha chhao cha hraoleipa deita a châ.

²⁰ Chavâta a heihhâ na ta, noh ry liata rai ei hriapasana zydua liata ei hnabei a dy haw.

²¹ Chyhsa ta sona nata novâhna nata zôthaina zy hmâpa ta hriapasa ta, a châh ta cha, a hriapasa leipa to awpa ta siesai awpa a châ thlâh ha tyh. Cha chhao cha hraoleipa nata paraona lai ngaitapa a châ.

²² Chyhsa ta tiamapa nata palôh rietheipa ta noh ry liata a hriapasana tawhta khâpa ma a hmô?

²³ A hro chhôh noh zydua cha vâsâhna sai ta bie ta, a raihria chhao ruchhôna dei a châ. Zâ ta chhao a palôh a pahâ vei. Cha chhao cha hraoleipa deita a châ.

²⁴ Chyhsapa châta, niepa ta doh ta, a hriapasana liata alyna hneipa hlâta a pha viapa y vei. Cha chhao cha Khazohpa tawhta a châ tahpa ei hmô haw.

²⁵ Ano tawhta a châ vei khiahta cha, ahy ma nie thei aw ta, ahy ma alyna a hnei thei aw?

²⁶ Ano a palysatuhpa cha, Khazohpa ta sona nata novâhna nata alyna pie ta, moleipa deikua cha, Khazohpa palôh a patlâhpa hnohta pie awpa lapakhyna nata pahmaohpakhyna rai a pahriasa tyh. Cha chhao cha hraoleipa châ ta, thlih a chadaipa deita a châ.